“ਜਦੋਂ ਸ਼ਹਿਰਾਂ ਅਤੇ ਪਿੰਡਾਂ ਦੇ ਲੋਕ ਲਾਮਬੰਦ ਹੋ ਕੇ ਤਸਕਰਾਂ ਵਿਰੁੱਧ ਉੱਠ ਖੜ੍ਹੇ ...”
(20 ਜੁਲਾਈ 2026)
ਪੰਜਾਬ ਸਰਕਾਰ ਵੱਲੋਂ ਦੋ ਪੜਾਵਾਂ ਵਿੱਚ ਯੁੱਧ ਨਸ਼ਿਆਂ ਵਿਰੁੱਧ ਛੇੜਿਆ ਗਿਆ ਹੈ। ਪਹਿਲਾ ਪੜਾਅ ਇੱਕ ਮਾਰਚ 2025 ਤੋਂ ਸ਼ੁਰੂ ਹੋਇਆ ਅਤੇ 9 ਜਨਵਰੀ 2026 ਤਕ ਚੱਲਿਆ। ਦੂਜਾ ਪੜਾਅ 10 ਜਨਵਰੀ 2026 ਤੋਂ ਲਗਾਤਾਰ ਜਾਰੀ ਹੈ। ਤਸਕਰਾਂ ਵਿਰੁੱਧ ਕਾਨੂੰਨੀ ਕਾਰਵਾਈ, ਨਸ਼ਈਆਂ ਦਾ ਨਸ਼ਾ ਛੁਡਵਾਉਣਾ, ਨਸ਼ਿਆਂ ਦੀ ਸਪਲਾਈ ਲਾਈਨ ’ਤੇ ਸੱਟ ਮਾਰਨੀ ਅਤੇ ਨਸ਼ਾ ਮੁਕਤ ਹੋਏ ਨੌਜਵਾਨਾਂ ਦਾ ਮੁੜ ਵਸੇਬਾ ਕਰਨਾ ਨਸ਼ਿਆਂ ਵਿਰੁੱਧ ਯੁੱਧ ਦਾ ਮੁੱਖ ਮੰਤਵ ਰਿਹਾ ਹੈ। ਸਰਕਾਰੀ ਦਾਅਵਿਆਂ ਅਨੁਸਾਰ ਇਸ ਸਮੇਂ ਦੇ ਦਰਮਿਆਨ 6608 ਕਿਲੋਗ੍ਰਾਮ ਹੈਰੋਇਨ ਫੜੀ ਗਈ। ਤਸਕਰਾਂ ਦੀ 847 ਕਰੋੜ ਦੀਆਂ ਨਜਾਇਜ਼ ਜਾਇਦਾਦ ਜ਼ਬਤ ਕੀਤੀਆਂ ਗਈਆਂ। ਪਬਲਿਕ ਵੱਲੋਂ ਪ੍ਰਾਪਤ 45 ਹਜ਼ਾਰ ਗੁਪਤ ਰਿਪੋਰਟਾਂ ਦੇ ਅਧਾਰ ’ਤੇ 22 ਹਜ਼ਾਰ 8 ਸੌ ਤਸਕਰ ਗ੍ਰਿਫਤਾਰ ਕੀਤੇ ਗਏ, ਜਿਨ੍ਹਾਂ ਵਿੱਚ 3800 ਨਸ਼ੇ ਦੇ ਵੱਡੇ ਤਸਕਰ ਵੀ ਸ਼ਾਮਲ ਹਨ। ਵੱਖ-ਵੱਖ ਨਸ਼ਾ ਛੁੜਾਉ ਕੇਂਦਰਾਂ ਰਾਹੀਂ 38 ਹਜ਼ਾਰ ਨਸ਼ਈਆਂ ਨੂੰ ਨਸ਼ਾ ਮੁਕਤ ਕੀਤਾ ਗਿਆ। 10 ਲੱਖ ਨਸ਼ਈਆਂ ਦਾ ਓ.ਪੀ.ਡੀ. ਰਾਹੀਂ ਇਲਾਜ ਚੱਲ ਰਿਹਾ ਹੈ। ਪੰਜਾਬ ਦੇ ਨਸ਼ਾ ਛੜਾਊ ਕੇਂਦਰਾਂ ਵਿੱਚ 15 ਸੌ ਬਿਸਤਰਿਆਂ ਤੋਂ ਵਧਾ ਕੇ 5 ਹਜ਼ਾਰ ਬਿਸਤਰਿਆਂ ਦਾ ਪ੍ਰਬੰਧ ਕੀਤਾ ਗਿਆ। ਪੰਜਾਬ ਦੀਆਂ ਦਸ ਜੇਲ੍ਹਾਂ ਵਿੱਚ ਓਟ ਕਲੀਨਿਕ ਖੋਲ੍ਹ ਕੇ ਨਸ਼ਈ ਕੈਦੀਆਂ ਦੇ ਇਲਾਜ ਕਰਨ ਦਾ ਉਪਰਾਲਾ ਵੀ ਕੀਤਾ ਗਿਆ ਹੈ। ਵਿਦਿਆਰਥੀ ਵਰਗ ਨੂੰ ਨਸ਼ਿਆਂ ਤੋਂ ਦੂਰ ਰੱਖਣ ਅਤੇ ਇਸਦੇ ਬੁਰੇ ਪ੍ਰਭਾਵਾਂ ਤੋਂ ਸੁਚੇਤ ਕਰਨ ਲਈ 35 ਸੌ ਅਧਿਆਪਕਾਂ ਨੂੰ ਇਸ ਸੰਬੰਧ ਵਿੱਚ ਟ੍ਰੇਨਿੰਗ ਦੇਣ ਦਾ ਪ੍ਰੋਗਰਾਮ ਵੀ ਉਲੀਕਿਆ ਗਿਆ ਹੈ। ਪਾਕਿਸਤਾਨ ਦੀ ਸਰਹੱਦ ’ਤੇ 54.41 ਕਰੋੜ ਖਰਚ ਕੇ ਐਂਟੀ ਡਰੋਨ ਪ੍ਰਣਾਲੀ ਵੀ ਚਾਲੂ ਕੀਤੀ ਗਈ ਹੈ। 6 ਜੁਲਾਈ 2026 ਤੋਂ “ਯੁੱਧ ਨਸ਼ਿਆਂ ਵਿਰੁੱਧ ਐਕਸ਼ਨ ਪਲਾਨ” ਵੀ ਤਿਆਰ ਕੀਤਾ ਹੈ ਜਿਸ ਅਧੀਨ ਲੋਕਾਂ ਦੀ ਸ਼ਮੂਲੀਅਤ ਰਾਹੀਂ ਨਸ਼ਿਆਂ ਦੇ ਤਸਕਰਾਂ ਉੱਤੇ ਸ਼ਿਕੰਜਾ ਕੱਸਣ ਦੇ ਹਰ ਸੰਭਵ ਯਤਨ ਕਰਨ ਦਾ ਪ੍ਰੋਗਰਾਮ ਉਲੀਕਿਆ ਗਿਆ ਹੈ। ਸਮਾਜਿਕ ਸੁਰੱਖਿਆ, ਇਸਤਰੀ ਅਤੇ ਬਾਲ ਵਿਕਾਸ ਵਿਭਾਗ ਵੱਲੋਂ 42.95 ਕਰੋੜ ਨਾਲ ਪੰਜਾਬ ਨੂੰ ਨਸ਼ਾ ਮੁਕਤ ਕਰਨ ਦੀ ਯੋਜਨਾ, ਜਾਗਰੂਕਤਾ ਮੁਹਿੰਮ, ਜੀਵਨ ਕੌਸ਼ਲ ਸਿੱਖਿਆ ਅਤੇ ਨਸ਼ਾ ਮੁਕਤ ਹੋਏ ਨੌਜਵਾਨਾਂ ਦੇ ਪੁਨਰਵਾਸ ਲਈ ਯਤਨ ਕੀਤੇ ਜਾ ਰਹੇ ਹਨ।
ਇਨ੍ਹਾਂ ਉਪਰੋਕਤ ਯਤਨਾਂ ਦੇ ਬਾਵਜੂਦ ਕੀ ਜ਼ਮੀਨੀ ਪੱਧਰ ’ਤੇ ਪੰਜਾਬੀਆਂ ਨੂੰ ਇਸ ਗੰਭੀਰ ਸੰਕਟ ਤੋਂ ਛੁਟਕਾਰਾ ਮਿਲਿਆ ਹੈ? ਪੰਜਾਬ ਦੇ 12673 ਪਿੰਡ ਅਤੇ 237 ਸ਼ਹਿਰ ਨਸ਼ੇ ਦੀ ਕਰੋਪੀ ਦਾ ਸ਼ਿਕਾਰ ਹਨ। ਕੋਈ ਵਿਰਲਾ ਪਿੰਡ ਹੀ ਨਸ਼ਿਆਂ ਦੀ ਮਾਰੂ ਹਨੇਰੀ ਤੋਂ ਬਚਿਆ ਹੋਵੇਗਾ।
ਪਿਛਲੇ ਦਿਨੀਂ ਮਾਣਯੋਗ ਸੁਪਰੀਮ ਕੋਰਟ ਅਤੇ ਹਾਈ ਕੋਰਟ ਨੇ ਤਲਵੰਡੀ ਕਲਾਂ ਦੇ ਪੰਡੋਰੀ ਮੁਹੱਲੇ ਦੀ ਵਿਧਵਾ ਔਰਤ ਦੇ ਉੱਪਰੋਥਲੀ ਚਾਰ ਪੁੱਤਰਾਂ ਅਤੇ ਪਤੀ ਦੀ ਨਸ਼ਿਆਂ ਕਾਰਨ ਮੌਤ ਅਤੇ ਮੌੜ ਮੰਡੀ (ਮਾਨਸਾ) ਵਿਖੇ ਲੋਕਾਂ ਦਾ ਕੰਧਾਂ ’ਤੇ ਇਹ ਲਿਖਣਾ, “ਇੱਥੇ ਨਸ਼ਾ ਆਮ ਵਿਕਦਾ ਹੈ।” ਦਾ ਗੰਭੀਰ ਨੋਟਿਸ ਲੈਂਦਿਆਂ ਪੰਜਾਬ ਸਰਕਾਰ ਨੂੰ ਜਵਾਨੀ ਦੇ ਹੋ ਰਹੇ ਘਾਣ ਨੂੰ ਬਚਾਉਣ ਦੇ ਨਿਰਦੇਸ਼ ਦਿੱਤੇ ਹਨ।
ਪੁਲਿਸ ਵਿਭਾਗ ਨਸ਼ੇ ਦੇ ਤਸਕਰਾਂ ਨੂੰ ਫੜ ਕੇ ਪੰਜਾਬ ਦੀਆਂ 25 ਜੇਲ੍ਹਾਂ ਵਿੱਚ ਭੇਜਣ ਦਾ ਯਤਨ ਕਰਦੀ ਹੈ। ਜੇਲ੍ਹਾਂ ਦਾ ਨਾਂ ‘ਸੁਧਾਰ ਘਰ’ ਰੱਖਿਆ ਗਿਆ ਹੈ। ਪਰ ਤਸਕਰਾਂ ਨੇ ਜੇਲ੍ਹਾਂ ਦੇ ਅਧਿਕਾਰੀਆਂ/ਕਰਮਚਾਰੀਆਂ ਨਾਲ ਮਿਲਕੇ ਆਪਣਾ ਨੈੱਟਵਰਕ ਕਾਇਮ ਕਰਕੇ ਨਸ਼ੇ ਦੇ ਸੰਗਠਤ ਅਪਰਾਧਾਂ ਦੀ ਲੜੀ ਨੂੰ ਟੁੱਟਣ ਨਹੀਂ ਦਿੱਤਾ। ਹੁਸ਼ਿਆਰਪੁਰ ਦੀ ਕੇਂਦਰੀ ਜੇਲ੍ਹ ਵਿੱਚ ਇੱਕ ਗੈਂਗਸਟਰ ਨੇ ਮੋਬਾਇਲ ਰਾਹੀਂ ਲਾਈਵ ਹੋ ਕੇ ਜੇਲ੍ਹ ਵਿੱਚ ਨਸ਼ਿਆਂ ਦੀ ਸਪਲਾਈ ਅਤੇ ਕੁਰਪਸ਼ਨ ਦੇ ਬੇਹੱਦ ਗੰਭੀਰ ਇਲਜ਼ਾਮ ਲਾਏ ਹਨ। ਉਸਨੇ ਦੱਸਿਆ ਕਿ ਜਿਸ ਮੋਬਾਇਲ ਦੀ ਉਹ ਵਰਤੋਂ ਕਰ ਰਿਹਾ ਹੈ, ਇਹ ਵੀ ਜੇਲ੍ਹ ਕਰਮਚਾਰੀ ਵੱਲੋਂ ਇੱਕ ਲੱਖ ਰੁਪਇਆ ਲੈ ਕੇ ਸਪਲਾਈ ਕੀਤਾ ਹੈ। ਇੱਥੇ ਗੰਭੀਰ ਪ੍ਰਸ਼ਨ ਹੈ ਕਿ ਬੇਹੱਦ ਸੁਰੱਖਿਆ ਵਾਲੀ ਜੇਲ੍ਹ ਵਿੱਚ ਜੇਕਰ ਇਸ ਤਰ੍ਹਾਂ ਨਸ਼ਾ ਅਤੇ ਹੋਰ ਗੈਰ ਕਾਨੂੰਨੀ ਕੰਮ ਹੁੰਦੇ ਹਨ ਤਾਂ ਪੰਜਾਬ ਦੀਆਂ ਦੂਜੀਆਂ ਜੇਲ੍ਹਾਂ ਨੂੰ ਵੀ ਸ਼ੱਕ ਦੀ ਨਜ਼ਰ ਨਾਲ ਦੇਖਿਆ ਜਾਂਦਾ ਹੈ।
ਪੰਜਾਬ ਦੇ ਵੱਖ-ਵੱਖ ਥਾਂਵਾਂ ’ਤੇ 153 ਨਬਾਲਿਗਾਂ ਦੀ ਨਸ਼ਾ ਸਪਲਾਈ ਵਿੱਚ ਸ਼ਮੂਲੀਅਤ ਗੰਭੀਰ ਚਿੰਤਾ ਦਾ ਵਿਸ਼ਾ ਹੈ। ਇੱਥੇ ਹੀ ਬੱਸ ਨਹੀਂ, ਨਸ਼ੇ ਦੇ ਤਸਕਰਾਂ ਨੇ ਅਗਲਾ ਪੜਾਅ ਸਕੂਲਾਂ, ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਵਿੱਚ ਪੜ੍ਹਦੇ ਵਿਦਿਆਰਥੀਆਂ ਨੂੰ ਸ਼ਾਹੀ ਜ਼ਿੰਦਗੀ, ਮਹਿੰਗੇ ਮੋਬਾਇਲ, ਬਰਾਂਡਿਡ ਕੱਪੜੇ, ਮਹਿੰਗੇ ਬਾਈਕਾਂ ਅਤੇ ਅਸਾਨ ਕਮਾਈ ਦਾ ਲਾਲਚ ਦੇ ਕੇ ਨਸ਼ਾ ਸਪਲਾਈ ਚੇਨ ਦਾ ਹਿੱਸਾ ਬਣਾਉਣ ਦਾ ਯਤਨ ਕੀਤਾ ਹੈ। ਵਿਦਿਆਰਥੀਆਂ ਅਤੇ ਨਾਬਾਲਗ ਮੁੰਡਿਆਂ ਉੱਤੇ ਪੁਲਿਸ ਨੂੰ ਸ਼ੱਕ ਨਹੀਂ ਹੁੰਦਾ, ਇਸ ਲਈ ਉਹ ਅਸਾਨੀ ਨਾਲ ਨਸ਼ਾ ਇੱਕ ਥਾਂ ਤੋਂ ਦੂਜੀ ਥਾਂ ਪਹੁੰਚਾਉਣ ਵਿੱਚ ਕਾਮਯਾਬ ਹੋ ਜਾਂਦੇ ਹਨ। ਇਸ ਸੰਬੰਧ ਵਿੱਚ ਕਈ ਵਿਦਿਆਰਥੀ ਅਤੇ ਨਾਬਾਲਗ ਪੁਲਿਸ ਵੱਲੋਂ ਫੜੇ ਵੀ ਗਏ ਹਨ। ਇੱਕ ਲਾਅ ਕਾਲਜ ਦਾ ਵਿਦਿਆਰਥੀ ਤਾਂ ਆਪਣੇ ਕਾਲਜ ਵਿੱਚ ਹੀ ਨਸ਼ਾ ਸਪਲਾਈ ਕਰਦਾ ਫੜਿਆ ਗਿਆ।
ਪੰਜਾਬ ਦੇ ਜਗਰਾਓਂ ਸ਼ਹਿਰ ਵਿੱਚ ਲੋਕਾਂ ਨੇ ਲਾਮਬੰਦ ਹੋ ਕੇ ਹੱਥਾਂ ਵਿੱਚ ਨਸ਼ੇ ਕਾਰਨ ਮ੍ਰਿਤਕ ਨੌਜਵਾਨਾਂ ਦੀਆਂ ਫੋਟੋਆਂ ਲੈ ਕੇ ਰੋਸ ਪ੍ਰਦਰਸ਼ਨ ਕੀਤਾ। ਉਹਨਾਂ ਦਾ ਭਰੇ ਮਨ ਨਾਲ ਕਹਿਣਾ ਸੀ ਕਿ ਦੁਕਾਨਾਂ ਤੋਂ ਆਟਾ ਖਤਮ ਹੋ ਸਕਦਾ ਹੈ, ਪਰ ਚਿੱਟਾ ਨਹੀਂ। ਚਿੱਟਾ ਤਾਂ ਰਿਉੜੀਆਂ ਵਾਂਗ ਵਿਕ ਰਿਹਾ ਹੈ।
ਕਈ ਪਿੰਡਾਂ ਵਿੱਚ ਤਾਂ ਨੇੜੀ ਨਸ਼ਾ ਵੇਚਣ ਵਾਲੇ ਦੇ ਘਰ ਵਿੱਚ ਹੀ ਮੌਤ ਦਾ ਸ਼ਿਕਾਰ ਹੋਏ ਹਨ। ਤਸਕਰਾਂ ਵੱਲੋਂ ਚਿੱਟੇ ਦੇ ਨਾਲ ਨਾਲ ਸਰਿੰਜ ਵੀ ਸਪਲਾਈ ਕੀਤੀ ਜਾਂਦੀ ਹੈ। ਤਸਕਰਾਂ ਦੇ ਘਰਾਂ ਵਿੱਚ ਹੀ ਮੌਤ ਦਾ ਸ਼ਿਕਾਰ ਹੋਏ ਨੌਜਵਾਨਾਂ ਦੀ ਮੌਤ ਦੇ ਰੋਸ ਵਜੋਂ ਲੋਕਾਂ ਨੇ ਪੰਚਾਇਤ ਨੂੰ ਨਾਲ ਲੈ ਕੇ ਤਸਕਰਾਂ ਦੇ ਘਰਾਂ ਅੱਗੇ ਧਰਨੇ ਵੀ ਦਿੱਤੇ ਹਨ। ਕਈ ਅੱਕੀਆਂ ਹੋਈਆਂ ਪੰਚਾਇਤਾਂ ਅਤੇ ਲੋਕਾਂ ਨੇ ਇਕੱਠੇ ਹੋ ਕੇ ਨਸ਼ੇ ਦੇ ਤਸਕਰਾਂ ਨੂੰ ਪਿੰਡ ਛੱਡਣ ਦਾ ਕਰੜਾ ਸੁਨੇਹਾ ਵੀ ਦਿੱਤਾ ਹੈ।
ਇਹ ਮਾਰੂ ਦੁਖਾਂਤ ਹੀ ਹੈ ਕਿ ਕਈ ਥਾਂਵਾਂ ’ਤੇ ਭੂਤਰੇ ਹੋਏ ਤਸਕਰਾਂ ਨੇ ਨਸ਼ਿਆਂ ਵਿਰੁੱਧ ਅਵਾਜ਼ ਬੁਲੰਦ ਕਰਨ ਵਾਲਿਆਂ ਉੱਤੇ ਜਾਨਲੇਵਾ ਹਮਲੇ ਵੀ ਕੀਤੇ ਹਨ। ਤਸਕਰਾਂ ਨੂੰ ਫੜਨ ਗਈ ਪੁਲਿਸ ਪਾਰਟੀ ਨੂੰ ਵੀ ਕਈ ਥਾਂਵਾਂ ’ਤੇ ਅਜਿਹੀ ਸਥਿਤੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਸ ਵੇਲੇ ਪਾਕਿਸਤਾਨ ਤੋਂ ਡਰੋਨ ਰਾਹੀਂ ਹੈਰੋਇਨ ਦੀ ਸਪਲਾਈ, ਘਾਤਕ ਕੈਮੀਕਲ ਮਿਲਾ ਕੇ ਤਿਆਰ ਕੀਤਾ ਚਿੱਟਾ, ਦਿੱਲੀ ਤੋਂ ਨਾਈਜੇਰੀਅਨਾਂ ਰਾਹੀਂ ਚਿੱਟੇ ਦੀ ਸਪਲਾਈ ਅਤੇ ਮੈਡੀਕਲ ਨਸ਼ਿਆਂ ਨੇ ਜਵਾਨੀ ਨੂੰ ਖੁੰਘਲ ਕਰ ਦਿੱਤਾ ਹੈ। ਜਦੋਂ ਕੋਈ ਨਸ਼ਈ ਤਸਕਰਾਂ ਤੋਂ ਚਿੱਟਾ ਲੈਣ ਦੀ ਮੰਗ ਕਰਦਾ ਹੈ ਤਾਂ ਅੱਗਿਓਂ ਤਸਕਰ ਦਾ ਜਵਾਬ ਹੁੰਦਾ ਹੈ, “ਕਿਹੜਾ ਲੈਣਾ ਹੈ, ਦਿੱਲੀ ਵਾਲਾ ਜਾਂ ਪਾਕਿਸਤਾਨ ਵਾਲਾ?”
ਸਰਵੇਖਣ ਵਿੱਚ ਇਹ ਗੱਲ ਸਾਹਮਣੇ ਆਈ ਹੈ ਕਿ ਨਸ਼ਿਆਂ ਦੀ ਸਪਲਾਈ ਲਾਈਨ ਹਾਲਾਂ ਟੁੱਟੀ ਨਹੀਂ। ਹਾਂ, ਉਹਨਾਂ ਨੇ ਹੁਣ ਆਪਣੇ ਅੱਡੇ ਬਦਲ ਲਏ ਹਨ। ਪੰਜਾਬ ਪੁਲਿਸ ਭਾਵੇਂ ਇਸ ਸੰਬੰਧ ਵਿੱਚ ਸਰਗਰਮ ਹੈ ਪਰ ਕਈ ਕਾਲੀਆਂ ਭੇਡਾਂ ਦੀ ਨਸ਼ਿਆਂ ਦੇ ਕਾਰੋਬਾਰੀਆਂ ਨਾਲ ਮਿਲੀ ਭੁਗਤ ਕਾਰਨ ਪੁਲਿਸ ਵਿਭਾਗ ਨੂੰ ਨਮੋਸ਼ੀ ਦਾ ਸਾਹਮਣਾ ਵੀ ਕਰਨਾ ਪਿਆ ਹੈ। ਬਠਿੰਡਾ ਦੇ ਨੇੜੇ ਇੱਕ ਪਿੰਡ ਵਿੱਚ ਨਸ਼ਈ ਨੌਜਵਾਨਾਂ ਦੀ ਨਮੋਸ਼ੀ ਭਰੀ ਕਰਤੂਤ ਸਾਹਮਣੇ ਆਈ ਹੈ। ਪਿੰਡ ਦੀ ਸ਼ਮਸ਼ਾਨ ਭੂਮੀ ਵਿੱਚ ਸੂਈ ਕੁਤੀ ਦੇ ਕਤੂਰਿਆਂ ਦਾ ਸਰਿੰਜ ਰਾਹੀਂ ਖੂਨ ਕੱਢ ਕੇ ਚਿੱਟਾ ਉਸ ਵਿੱਚ ਘੋਲ ਕੇ ਟੀਕੇ ਲਾਏ। 10 ਕਤੂਰੇ ਮੌਤ ਦੇ ਘਾਟ ਉਤਾਰ ਦਿੱਤੇ ਅਤੇ ਕਈ ਨਸ਼ਈ ਵੀ ਜਾਨ ਤੋਂ ਹੱਥ ਧੋ ਬੈਠੇ ਹਨ।
ਇੱਕ ਪਾਸੇ ਪੰਜਾਬ ਸਰਕਾਰ ਵੱਲੋਂ ਯੁੱਧ ਨਸ਼ਿਆਂ ਵਿਰੁੱਧ ਛੇੜਿਆ ਹੋਇਆ ਹੈ ਅਤੇ ਦੂਜੇ ਪਾਸੇ ਭਾਰਤ ਸਰਕਾਰ ਵੱਲੋਂ ਨਸ਼ਾ ਮੁਕਤ ਭਾਰਤ ਅਭਿਆਨ ਜਾਰੀ ਕੀਤਾ ਹੈ। ਪਰ ਦੋਨਾਂ ਮੁਹਿੰਮਾਂ ਵਿੱਚ ਆਪਸੀ ਤਾਲਮੇਲ ਦੀ ਘਾਟ ਰੜਕਦੀ ਹੈ। ਨਸ਼ਿਆਂ ਕਾਰਨ ਸਿਰਫ ਜਵਾਨੀ ਹੀ ਨਹੀਂ, ਕਿਰਸਾਨੀ ਉੱਤੇ ਵੀ ਗੰਭੀਰ ਖਤਰੇ ਦੇ ਬੱਦਲ ਮੰਡਲਾ ਰਹੇ ਹਨ। ਨਸ਼ਈਆਂ ਦੇ ਝੁੰਡ ਖੇਤਾਂ ਵਿੱਚੋਂ ਟਰਾਂਸਫਾਰਮ ਲਾਹ ਕੇ ਉਨ੍ਹਾਂ ਦਾ ਤੇਲ ਕੱਢ ਕੇ ਅਤੇ ਕੇਬਲ ਤਾਰਾਂ ਵਿੱਚੋਂ ਤਾਂਬਾ ਕੱਢ ਕੇ ਵੇਚ ਰਹੇ ਹਨ। ਇਸ ਕਾਰਨ ਜਿੱਥੇ ਕਿਰਸਾਨ ਨੂੰ ਆਰਥਿਕ ਖੋਰਾ ਲੱਗ ਰਿਹਾ ਹੈ, ਉੱਥੇ ਹੀ ਨਸ਼ਈਆਂ ਦੇ ਹਮਲਿਆਂ ਕਾਰਨ ਹੁਣ ਕਿਰਸਾਨ ਖੇਤ ਵਿੱਚ ਇਕੱਲਾ ਜਾਣ ਤੋਂ ਸੰਕੋਚ ਕਰਦਾ ਹੈ।
ਦਰਅਸਲ ਨਸ਼ਿਆਂ ਦੇ ਖਾਤਮੇ ਲਈ ਲੋਕ ਲਹਿਰ ਦੀ ਲੋੜ ਹੈ। ਜਦੋਂ ਸ਼ਹਿਰਾਂ ਅਤੇ ਪਿੰਡਾਂ ਦੇ ਲੋਕ ਲਾਮਬੰਦ ਹੋ ਕੇ ਤਸਕਰਾਂ ਵਿਰੁੱਧ ਉੱਠ ਖੜ੍ਹੇ ਹੋਣਗੇ, ਫਿਰ ਹੀ ਤਸਕਰਾਂ ਦੀਆਂ ਸ਼ੀਸ਼ੀਆਂ ਭੰਨਣ ਦੇ ਨਾਲ ਨਾਲ ਇਨ੍ਹਾਂ ਨੂੰ ਪੈਰਾਂ ਤੋਂ ਉਖੇੜਿਆ ਜਾ ਸਕਦਾ ਹੈ।
* * * * *
ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
ਪਾਠਕਾਂ ਨਾਲ ਆਪਣੇ ਵਿਚਾਰ ਸਾਂਝੇ ਕਰਨ ਲਈ ਸਰੋਕਾਰ ਨਾਲ ਸੰਪਰਕ ਕਰੋ: (sarokar2015@gmail.com)
