“ਉਹਨਾਂ ਦੀ ਉਮਰ ਸਿਰਫ 29 ਸਾਲ ਸੀ ਜਦੋਂ ਉਹ ਡੈਲਾਵੇਅਰ ਤੋਂ ਅਮਰੀਕੀ ਸੈਨੇਟ ਲਈ ਚੁਣੇ ਗਏ ...”
(20 ਜਨਵਰੀ 2021)
ਅੱਜ 20 ਜਨਵਰੀ, 2021 ਨੂੰ ਅਮਰੀਕਾ ਦੇ 46ਵੇਂ ਰਾਸ਼ਟਰਪਤੀ ਦੇ ਰੂਪ ਵਿੱਚ ਸਹੁੰ ਚੁੱਕਣ ਵਾਲੇ ਜੋਅ ਬਾਈਡਨ ਦਾ ਪੂਰਾ ਨਾਮ ਜੋਸੇਫ ਰੌਬਿਨੇਟ ਬਾਈਡਨ ਜੂਨੀਅਰ ਹੈ। ਉਹਨਾਂ ਦਾ ਜਨਮ 20 ਨਵੰਬਰ 1942 ਨੂੰ ਹੋਇਆ। ਜ਼ਿਕਰਯੋਗ ਹੈ ਕਿ ਜੋਅ ਬਾਈਡਨ ਇਸ ਤੋਂ ਪਹਿਲਾਂ ਬਰਾਕ ਓਬਾਮਾ ਦੇ ਕਾਰਜਕਾਲ ਵਿੱਚ ਸੰਯੁਕਤ ਰਾਜ ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਰਹਿ ਚੁੱਕੇ ਹਨ। ਨਵੰਬਰ 2020 ਵਿੱਚ ਹੋਈਆਂ ਰਾਸ਼ਟਰਪਤੀ ਚੋਣਾਂ ਵਿੱਚ ਉਹਨਾਂ ਨੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਹਰਾਇਆ।
ਜਦੋਂ ਅਸੀਂ ਉਹਨਾਂ ਦੇ ਜੀਵਨ ’ਤੇ ਝਾਤ ਮਾਰਦੇ ਹਾਂ ਤਾਂ ਪਤਾ ਚੱਲਦਾ ਹੈ ਕਿ ਇਸ ਤੋਂ ਪਹਿਲਾਂ ਜੋਅ ਬਾਈਡਨ ਡੈਮੋਕ੍ਰੈਟਿਕ ਪਾਰਟੀ ਦੇ ਮੈਂਬਰ ਦੇ ਤੌਰ ’ਤੇ 2009 ਤੋਂ 2017 ਤਕ ਸੰਯੁਕਤ ਰਾਜ ਅਮਰੀਕਾ ਦੇ 47ਵੇਂ ਉਪ ਰਾਸ਼ਟਰਪਤੀ ਦੇ ਤੌਰ ’ਤੇ ਆਪਣੀਆਂ ਸੇਵਾਵਾਂ ਦੇ ਚੁੱਕੇ ਹਨ। ਇਸ ਤੋਂ ਪਹਿਲਾਂ ਉਹ 1973 ਤੋਂ 2009 ਤਕ ਡੈਲਾਵੇਅਰ ਦੇ ਸੈਨੇਟਰ ਦੇ ਤੌਰ ’ਤੇ ਵੀ ਆਪਣੀਆਂ ਸੇਵਾਵਾਂ ਦੇ ਚੁੱਕੇ ਹਨ। ਜੇਕਰ ਜੋਅ ਬਾਈਡਨ ਦੇ ਜੀਵਨ ਦੀ ਗੱਲ ਕਰੀਏ ਤਾਂ ਉਹ ਸਕ੍ਰੈਂਟਨ, ਪੈਨਸਲੇਵੇਨੀਆ ਅਤੇ ਨਿਊ ਕੈਸਲ ਕਾਊਂਟੀ, ਡੈਲਾਵੇਅਰ ਵਿੱਚ ਵੱਡੇ ਹੋਏ ਹਨ। ਉਹਨਾਂ ਨੇ ਆਪਣੀ ਸਿੱਖਿਆ ਡੈਲਾਵੇਅਰ ਯੂਨੀਵਰਸਿਟੀ ਤੋਂ ਹਾਸਲ ਕੀਤੀ ਹੈ। ਉਸ ਮਗਰੋਂ ਉਹਨਾਂ ਨੇ 1968 ਵਿੱਚ ਸਿਰੈਕਿਊਜ਼ ਯੂਨੀਵਰਸਿਟੀ ਤੋਂ ਕਾਨੂੰਨ ਦੀ ਡਿਗਰੀ ਹਾਸਲ ਕੀਤੀ। 1970 ਵਿੱਚ ਉਨ੍ਹਾਂ ਨੂੰ ਨਿਊ ਕੈਸਲ ਕਾਊਂਟੀ ਦਾ ਪਾਰਸ਼ਦ ਚੁਣਿਆ ਗਿਆ। 1972 ਵਿੱਚ ਉਹਨਾਂ ਦੀ ਉਮਰ ਸਿਰਫ 29 ਸਾਲ ਸੀ ਜਦੋਂ ਉਹ ਡੈਲਾਵੇਅਰ ਤੋਂ ਅਮਰੀਕੀ ਸੈਨੇਟ ਲਈ ਚੁਣੇ ਗਏ ਅਤੇ ਇਸ ਤਰ੍ਹਾਂ ਉਹ ਅਮਰੀਕੀ ਇਤਿਹਾਸ ਦੇ ਛੇਵੇਂ ਸਭ ਤੋਂ ਘੱਟ ਉਮਰ ਦੇ ਸੈਨੇਟਰ ਬਣੇ ਸਨ।
ਜੋਅ ਬਾਈਡਨ ਸੈਨੇਟ ਵਿੱਚ ਵਿਦੇਸ਼ ਸੰਬੰਧ ਕਮੇਟੀ ਦੇ ਲੰਬੇ ਸਮੇਂ ਤਕ ਮੈਂਬਰ ਰਹੇ ਅਤੇ ਅਖੀਰ ਵਿੱਚ ਇਸਦੇ ਪ੍ਰਧਾਨ ਦੇ ਅਹੁਦੇ ’ਤੇ ਬਿਰਾਜਮਾਨ ਹੋਏ। ਉਹਨਾਂ ਨੇ 1991 ਵਿੱਚ ਖਾੜੀ ਯੁੱਧ ਦਾ ਵਿਰੋਧ ਕੀਤਾ ਪਰ ਪੂਰਬੀ ਯੂਰਪ ਵਿੱਚ ਨਾਟੋ ਗਠਜੋੜ ਦਾ ਵਿਸਥਾਰ ਕਰਨ ਅਤੇ 1990 ਦੇ ਦਹਾਕੇ ਦੇ ਯੋਗੋਸਲਾਵੀਆ ਯੁੱਧਾਂ ਵਿੱਚ ਦਖਲ ਅੰਦਾਜ਼ੀ ਦੀ ਹਮਾਇਤ ਕੀਤੀ ਸੀ। ਇਸਦੇ ਇਲਾਵਾ ਅਧਿਕਾਰਤ ਤੌਰ ’ਤੇ 2002 ਵਿੱਚ ਇਰਾਕ ਯੁੱਧ ਦੇ ਪ੍ਰਸਤਾਵ ਦਾ ਵੀ ਸਮਰਥਨ ਕੀਤਾ ਸੀ ਜਦਕਿ 2007 ਵਿੱਚ ਅਮਰੀਕੀ ਸੈਨਿਕਾਂ ਦੀ ਗਿਣਤੀ ਵਿੱਚ ਵਾਧੇ ਦਾ ਵਿਰੋਧ ਕੀਤਾ ਸੀ। ਬਾਈਡਨ 1987 ਤੋਂ 1995 ਤਕ ਸੈਨੇਟ ਨਿਆਂਪਾਲਿਕਾ ਕਮੇਟੀ ਦੇ ਪ੍ਰਧਾਨ ਵੀ ਰਹੇ। ਇਸਦੇ ਨਾਲ-ਨਾਲ ਦਵਾਈ ਨੀਤੀ, ਅਪਰਾਧ ਦੀ ਰੋਕਥਾਮ ਅਤੇ ਨਾਗਰਿਕ ਆਜ਼ਾਦੀ ਦੇ ਮੁੱਦਿਆਂ ਨਾਲ ਨਜਿੱਠਣ, ਹਿੰਸਕ ਅਪਰਾਧ ਕੰਟਰੋਲ ਅਤੇ ਕਾਨੂੰਨ ਲਾਗੂ ਕਰਨ ਵਾਲੇ ਐਕਟ ਅਤੇ ਔਰਤਾਂ ਖ਼ਿਲਾਫ਼ ਹਿੰਸਾ ਐਕਟ ਨੂੰ ਪਾਸ ਕਰਾਉਣ ਵਿੱਚ ਵੀ ਉਹਨਾਂ ਆਪਣੀ ਅਹਿਮ ਭੂਮਿਕਾ ਨਿਭਾਈ ਸੀ।
ਬਾਈਡਨ ਨੇ ਰੌਬਰਟ ਬੋਰਕ ਅਤੇ ਕਲੇਰੈਂਸ ਥਾਮਸ ਦੇ ਲਈ ਵਿਵਾਦਿਤ ਸੁਣਵਾਈ ਸਮੇਤ ਅਮਰੀਕੀ ਸੁਪਰੀਮ ਕੋਰਟ ਦੀਆਂ ਛੇ ਸੁਣਵਾਈਆਂ ਦੀ ਨਿਗਰਾਨੀ ਵੀ ਕੀਤੀ ਸੀ। ਇਸ ਤੋਂ ਪਹਿਲਾਂ 1988 ਵਿੱਚ ਅਤੇ ਫਿਰ 2008 ਵਿੱਚ ਉਹਨਾਂ ਨੇ ਡੈਮੋਕ੍ਰੈਟਿਕ ਰਾਸ਼ਟਰਪਤੀ ਅਹੁਦੇ ਦੀ ਨਾਮਜ਼ਦਗੀ ਦੇ ਲਈ ਕੋਸ਼ਿਸ਼ਾਂ ਵੀ ਕੀਤੀਆਂ ਸਨ ਪਰ ਇਹਨਾਂ ਕੋਸ਼ਿਸ਼ਾਂ ਵਿੱਚ ਉਹ ਸਫਲ ਨਹੀਂ ਹੋ ਸਕੇ ਸਨ। ਇੱਥੇ ਜ਼ਿਕਰਯੋਗ ਹੈ ਕਿ ਬਾਈਡਨ ਛੇ ਵਾਰ ਸੈਨੇਟ ਲਈ ਚੁਣੇ ਗਏ ਜਦਕਿ 2008 ਵਿੱਚ ਜਦੋਂ ਉਹਨਾਂ ਨੇ ਬਰਾਕ ਓਬਾਮਾ ਦੇ ਰਾਸ਼ਟਰਪਤੀ ਚੋਣਾਂ ਜਿੱਤਣ ਮਗਰੋਂ ਸਰਕਾਰ ਵਿੱਚ ਉਪ ਰਾਸ਼ਟਰਪਤੀ ਦੇ ਰੂਪ ਵਿੱਚ ਸੇਵਾ ਕਰਨ ਲਈ ਅਸਤੀਫਾ ਦਿੱਤਾ ਸੀ, ਉਦੋਂ ਉਹ ਚੌਥੇ ਸਭ ਤੋਂ ਸੀਨੀਅਰ ਸੈਨੇਟਰ ਸਨ ਪਰ 2012 ਵਿੱਚ ਜਦੋਂ ਓਬਾਮਾ ਅਤੇ ਬਾਈਡਨ ਨੂੰ ਅਮਰੀਕੀ ਲੋਕਾਂ ਨੇ ਇੱਕ ਵਾਰ ਫਿਰ ਸੱਤਾ ਸੌਂਪੀ ਤਾਂ ਬਾਈਡਨ ਨੇ ਉਪ ਰਾਸ਼ਟਰਪਤੀ ਦੇ ਰੂਪ ਵਿੱਚ 2009 ਦੀ ਵੱਡੀ ਮੰਦੀ ਦਾ ਮੁਕਾਬਲਾ ਕਰਨ ਲਈ ‘ਬੁਨਿਆਦੀ ਢਾਂਚੇ ’ਤੇ ਖਰਚ’ ਦੀ ਨਿਗਰਾਨੀ ਕੀਤੀ।
ਆਪਣੇ ਉਪ ਰਾਸ਼ਟਰਪਤੀ ਦੇ ਇਸ ਕਾਰਜਕਾਲ ਵਿੱਚ ਉਹਨਾਂ ਨੇ ਕਾਂਗਰਸ ਰਿਪਬਲਿਕਨ ਮੈਂਬਰਾਂ ਨਾਲ ਗੱਲਬਾਤ ਕਰਕੇ ਰਾਹਤ ਐਕਟ 2010 ਨੂੰ ਪਾਸ ਕਰਾਇਆ ਜਿਸ ਨਾਲ ਇੱਕ ਟੈਕਸ ਗਤੀਰੋਧ ਦੀ ਸਮੱਸਿਆ ਹੱਲ ਹੋਈ। ਇਸਦੇ ਨਾਲ-ਨਾਲ ਉਹਨਾਂ ਨੇ 2011 ਦਾ ਬਜਟ ਕੰਟਰੋਲ ਐਕਟ, ਜਿਸ ਨੇ ਕਰਜ਼ ਹੱਦ ਸੰਕਟ ਨੂੰ ਹੱਲ ਕੀਤਾ ਅਤੇ 2012 ਦੇ ਅਮਰੀਕੀ ਟੈਕਸਪੇਅਰ ਰਾਹਤ ਐਕਟ ਦੇ ਪਾਸ ਹੋਣ ਨਾਲ ਇੱਕ ਹੋਰ ਸਮੱਸਿਆ ਦਾ ਹੱਲ ਕੱਢਿਆ। ਜੋਅ ਬਾਈਡਨ ਨੇ ਸੰਯੁਕਤ ਰਾਜ ਅਮਰੀਕਾ-ਰੂਸ ਨਵੀਂ ਸਟਾਰਟ ਸੰਧੀ, ਲੀਬੀਆ ਵਿੱਚ ਮਿਲਟਰੀ ਦਖਲ ਅੰਦਾਜ਼ੀ ਦਾ ਸਮਰਥਨ ਕਰਨ ਦੀਆਂ ਕੋਸ਼ਿਸ਼ਾਂ ਦੀ ਵੀ ਅਗਵਾਈ ਕੀਤੀ। ਜਨਵਰੀ 2017 ਵਿੱਚ ਓਬਾਮਾ ਨੇ ਜੋਅ ਬਾਈਡਨ ਨੂੰ ਰਾਸ਼ਟਰਪਤੀ ਮੈਡਲ ਨਾਲ ਸਨਮਾਨਿਤ ਕੀਤਾ।
ਅਪ੍ਰੈਲ 2019 ਵਿੱਚ ਬਾਈਡਨ ਨੇ 2020 ਦੀਆਂ ਰਾਸ਼ਟਰਪਤੀ ਚੋਣਾਂ ਵਿੱਚ ਆਪਣੀ ਉਮੀਦਵਾਰੀ ਦਾ ਐਲਾਨ ਕੀਤਾ ਅਤੇ ਜੂਨ 2020 ਵਿੱਚ ਉਹ ਡੈਮੋਕ੍ਰੈਟਿਕ ਨਾਮਜ਼ਦਗੀ ਨੂੰ ਸੁਰੱਖਿਅਤ ਕਰਨ ਲਈ ਲੋੜੀਂਦੀ ਪ੍ਰਤੀਨਿਧੀ ਹੱਦ ਤਕ ਪਹੁੰਚੇ। 11 ਅਗਸਤ ਨੂੰ ਉਹਨਾਂ ਨੇ ਕੈਲੇਫੋਰਨੀਆ ਦੀ ਅਮਰੀਕੀ ਸੈਨੇਟਰ ਕਮਲਾ ਹੈਰਿਸ ਨੂੰ ਆਪਣੇ ਉਪ ਰਾਸ਼ਟਰਪਤੀ ਦੇ ਦਾਅਵੇਦਾਰ ਦੇ ਤੌਰ ’ਤੇ ਪੇਸ਼ ਕੀਤਾ ਜਦਕਿ ਬੀਤੇ ਸਾਲ 3 ਨਵੰਬਰ ਨੂੰ ਉਹਨਾਂ ਨੇ ਚੋਣਾਂ ਵਿੱਚ ਡੋਨਾਲਡ ਟਰੰਪ ਨੂੰ ਹਰਾਉਂਦੇ ਹੋਏ ਅਮਰੀਕਾ ਵਿੱਚ ਆਪਣੀ ਜਿੱਤ ਦੇ ਇੱਕ ਨਵੇਂ ਅਧਿਆਏ ਨੂੰ ਸ਼ੁਰੂ ਕੀਤਾ। ਇਸ ਪ੍ਰਕਾਰ ਆਖਰਕਾਰ ਜੋਅ ਬਾਈਡਨ ਸਯੁੰਕਤ ਰਾਜ ਅਮਰੀਕਾ ਦੇ ਰਾਸ਼ਟਰਪਤੀ ਦੇ ਅਹੁਦੇ ’ਤੇ ਬਿਰਾਜਮਾਨ ਹੋਣ ਵਿੱਚ ਕਾਮਯਾਬ ਹੋਏ। ਇਹ ਵੇਖਣਾ ਹੁਣ ਕਾਫ਼ੀ ਦਿਲਚਸਪ ਹੋਵੇਗਾ ਕਿ ਟਰੰਪ ਸਮਰਥਕਾਂ ਦੁਆਰਾ ਪਿਛਲੇ ਦਿਨੀਂ ਖੇਰੂੰ ਖੇਰੂੰ ਕੀਤੀ ਅਮਰੀਕੀ ਜਮਹੂਰੀਅਤ ਨੂੰ ਬਾਈਡਨ ਕਿਸ ਤਰ੍ਹਾਂ ਅਤੇ ਕਿੰਨੇ ਕੁ ਸਮੇਂ ਵਿੱਚ ਪਹਿਲਾਂ ਵਾਲੀਆਂ ਲੀਹਾਂ ਉੱਤੇ ਲੈ ਕੇ ਆਉਣ ਵਿੱਚ ਕਾਮਯਾਬ ਹੁੰਦੇ ਹਨ।
*****
ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।)
(2536)
(ਸਰੋਕਾਰ ਨਾਲ ਸੰਪਰਕ ਲਈ: This email address is being protected from spambots. You need JavaScript enabled to view it.)
