BalrajSidhu7 “ਵਹਿਮੀ ਲੋਕ ਕਈ ਸਾਲ ਤੱਕ ਉਸਦੀ ਮੌਤ ਦਾ ਇੰਤਜ਼ਾਰ ਕਰਦੇ ਰਹੇ ਪਰ ਉਹ ...”
(1 ਮਾਰਚ 2019)

ਵਧ ਰਹੀ ਬੇਤਹਾਸ਼ਾ ਟਰੈਫਿਕ ਕਾਰਨ ਪੰਜਾਬ ਦੀਆਂ ਅਨੇਕਾਂ ਸੜਕਾਂ ਚੌੜੀਆਂ ਕੀਤੀਆਂ ਜਾ ਰਹੀਆਂ ਹਨ। ਇਹਨਾਂ ਸੜਕਾਂ ਦੇ ਕਿਨਾਰਿਉਂ ਸੈਂਕੜੇ ਸਾਲ ਪੁਰਾਣੇ ਛਾਂਦਾਰ ਦਰਖਤ ਇੰਨੀ ਫੁਰਤੀ ਨਾਲ ਪੁੱਟੇ ਗਏ ਸਨ ਜਿਵੇਂ ਦੇਸ਼ ਦੀ ਤਰੱਕੀ ਦੇ ਰਾਹ ਵਿੱਚ ਸਭ ਤੋਂ ਵੱਡਾ ਰੋੜਾ ਇਹੀ ਹਨ। ਰਸਤੇ ਵਿੱਚ ਪੈਣ ਵਾਲੇ ਸਾਰੇ ਸਕੂਲ, ਕਾਲਜ, ਘਰ, ਦੁਕਾਨਾਂ ਅਤੇ ਹੋਰ ਇਮਾਰਤਾਂ ਮਿੰਟਾਂ ਸਕਿੰਟਾਂ ਵਿੱਚ ਢਹਿ ਢੇਰੀ ਕਰ ਦਿੱਤੀਆਂ ਗਈਆਂ ਹਨ। ਪਰ ਜਿਵੇਂ ਹੀ ਸਰਕਾਰੀ ਜ਼ਮੀਨ ’ਤੇ ਕਬਜ਼ਾ ਕਰ ਕੇ ਬਣਾਇਆ ਗਿਆ ਕੋਈ ਧਾਰਮਿਕ ਸਥਾਨ ਸੜਕ ਨਿਰਮਾਣ ਵਿੱਚ ਰੁਕਾਵਟ ਬਣਦਾ ਹੈ, ਅਧਿਕਾਰੀਆਂ ਨੂੰ ਸੱਪ ਸੁੰਘ ਜਾਂਦਾ ਹੈ। ਮੜ੍ਹੀਆਂ ਮਸਾਣਾਂ ’ਤੇ ਲੱਗੇ ਨੀਲੇ, ਪੀਲੇ, ਹਰੇ, ਕੇਸਰੀ ਝੰਡੇ ਵੇਖ ਕੇ ਉਹਨਾਂ ਦੇ ਹੱਥ ਪੈਰ ਠੰਢੇ ਪੈ ਜਾਂਦੇ ਹਨ। ਉਨ੍ਹਾਂ ਨੂੰ ਢਾਹੁਣ ਦੀ ਬਜਾਏ ਕਰੋੜਾਂ ਦਾ ਖਰਚਾ ਕਰ ਕੇ ਸੜਕਾਂ ਵਿੱਚ ਵਿੰਗ ਪਾ ਦਿੱਤੇ ਜਾਂਦੇ ਹਨ।

ਉਹਨਾਂ ਨੂੰ ਹਟਾਉਣ ਦੀ ਜ਼ੁਰਅਤ ਕੋਈ ਨਹੀਂ ਕਰਦਾ। ਜੇ ਕੋਈ ਬਹਾਦਰ ਅਫਸਰ ਹਿੰਮਤ ਕਰ ਵੀ ਲਵੇ ਤਾਂ ਚਾਰ ਮਲੰਗ ਇਕੱਠੇ ਹੋ ਕੇ ਧਰਨਾ ਲਗਾ ਕੇ ਰੋਡ ਜਾਮ ਕਰ ਦਿੰਦੇ ਹਨ। ਨਾਲ ਦੀ ਨਾਲ ਪ੍ਰਸ਼ਾਸਨਿਕ ਅਧਿਕਾਰੀ ਨਿਮਰਤਾ ਸਹਿਤ ਉਸ ਜਗ੍ਹਾ ਨੂੰ ਨਾ ਢਾਹੁਣ ਦਾ ਵਾਅਦਾ ਕਰ ਲੈਂਦੇ ਹਨ। ਇਹਨਾਂ ਭੂਮੀ ਹੜੱਪਾਂ ਨੂੰ ਧਰਮ ਨਾਲ ਕੋਈ ਮਤਲਬ ਨਹੀਂ ਹੈ। ਧਰਮ ਮਨੁੱਖਤਾ ਦੀ ਭਲਾਈ ਵਾਸਤੇ ਹੁੰਦਾ ਹੈ ਨਾ ਕਿ ਪਰੇਸ਼ਾਨ ਕਰਨ ਲਈ। ਪਰ ਇਹਨਾਂ ਮੁਸ਼ਟੰਡਿਆਂ ਨੂੰ ਸਿਰਫ ਆਪਣੀ ਦੁਕਾਨਦਾਰੀ ਤੱਕ ਮਤਲਬ ਹੁੰਦਾ ਹੈ ਕਿ ਜੇ ਇਹਨਾਂ ਦੀ ਦੁਕਾਨ ਢਹਿ ਗਈ ਤਾਂ ਤੋਰੀ ਫੁਲਕਾ ਬੰਦ ਹੋ ਜਾਵੇਗਾ। ਸੜਕ ’ਤੇ ਰੁਹਾਨੀ ਦੁਕਾਨਦਾਰੀ ਵੈਸੇ ਵੀ ਵਧੀਆ ਚੱਲਦੀ ਹੈ। ਲੰਘਦਾ ਵੜਦਾ ਕੋਈ ਨਾ ਕੋਈ ਅੱਖ ਦਾ ਅੰਨ੍ਹਾ ਰੁਕ ਹੀ ਜਾਂਦਾ ਹੈ। ਪੰਗਾ ਪੈਣ ਦੇ ਡਰੋਂ ਜਦੋਂ ਅਧਿਕਾਰੀ ਅਜਿਹੀ ਇਮਾਰਤ ਨੂੰ ਨਹੀਂ ਤੋੜਦੇ ਤਾਂ ਉਸਦੀ ਮਹਿਮਾ ਦੂਣ ਸਵਾਈ ਹੋ ਜਾਂਦੀ ਹੈ। ਅਫਵਾਹਾਂ ਫੈਲਾ ਦਿੱਤੀਆਂ ਜਾਂਦੀਆਂ ਹਨ ਕਿ ਜਗ੍ਹਾ ਤੋੜਨ ਆਏ ਅਧਿਕਾਰੀ ਅੰਨ੍ਹੇ ਹੋ ਗਏ ਸਨ ਜਾਂ ਰਾਤ ਨੂੰ ਉਨ੍ਹਾਂ ਦੀ ਛਾਤੀ ’ਤੇ ਬਾਬਾ ਚੜ੍ਹਦਾ ਸੀ।

ਅਜਿਹੀਆਂ ਥਾਵਾਂ ਅਨੇਕਾਂ ਹਨ। ਵਾਈ.ਪੀ.ਐੱਸ. ਚੌਂਕ ਮੁਹਾਲੀ ਵੱਲੋਂ ਆਉਂਦੀ ਰਿੰਗ ਰੋਡ ਅਜੇ ਤੱਕ ਇੱਕ ਅਜਿਹੇ ਧਾਰਮਿਕ ਸਥਾਨ ਕਾਰਨ ਹੀ ਮੁਕੰਮਲ ਨਹੀਂ ਹੋ ਸਕੀ। ਚੌਂਕ ਦੇ ਵਿੱਚਕਾਰ ਬਣਿਆ ਧਾਰਮਿਕ ਸਥਾਨ ਸਾਲਾਂ ਤੋਂ ਅਜਿਹਾ ਫਾਨਾ ਫਸਾ ਕੇ ਬੈਠਾ ਹੈ ਕਿ ਚੰਡੀਗੜ੍ਹ-ਮੁਹਾਲੀ ਦਾ ਆਪਸ ਵਿੱਚ ਲਿੰਕ ਹੀ ਨਹੀਂ ਜੁੜ ਸਕਿਆ। ਨਵੀਂ ਬਣੀ ਚੰਡੀਗੜ੍ਹ-ਰਾਜਪੁਰਾ ਹਾਈਵੇ ’ਤੇ ਵੀ ਅਜਿਹੇ ਤਿੰਨ ਚਾਰ ਧਾਰਮਿਕ ਸਥਾਨ ਮੌਜੂਦ ਹਨ ਜਿਹਨਾਂ ਨੂੰ ਹਟਾਉਣ ਦੀ ਬਜਾਏ ਸੜਕ ਵਿੱਚ ਵਿੰਗ ਪਾ ਦਿੱਤੇ ਗਏ ਹਨ। ਉੱਥੇ ਸੜਕਾਂ ਦੀਆਂ ਬਰਮਾਂ ਨਾ ਹੋਣ ਕਾਰਨ ਹਰ ਵੇਲੇ ਐਕਸੀਡੈਂਟ ਦਾ ਖਤਰਾ ਬਣਿਆ ਰਹਿੰਦਾ ਹੈ। ਖਰੜ ਤੋਂ ਮੋਰਿੰਡੇ ਨੂੰ ਬਣ ਰਹੀ ਹਾਈਵੇ ’ਤੇ ਤਾਂ ਨੈਸ਼ਨਲ ਹਾਈਵੇ ਦੇ ਇੰਜੀਨੀਅਰਾਂ ਨੇ ਕਮਾਲ ਹੀ ਕਰ ਦਿੱਤੀ ਹੈ। ਖਰੜ ਤੋਂ ਥੋੜ੍ਹਾ ਬਾਹਰ ਜਾ ਕੇ ਦਸ ਬਾਈ ਦਸ ਫੁੱਟ ਦਾ ਇੱਕ ਧਾਰਮਿਕ ਸਥਾਨ ਸੜਕ ਦੇ ਐਨ ਵਿਚਕਾਰ ਸਰਕਾਰੀ ਜਗ੍ਹਾ ਰੋਕੀ ਖੜ੍ਹਾ ਹੈ। ਉਸ ਨੂੰ ਢਾਹੁਣ ਦੀ ਥਾਂ ਉਸਦੇ ਚਾਰੇ ਪਾਸੇ ਸੜਕ ਬਣਾ ਦਿੱਤੀ ਗਈ ਹੈ। ਪੱਕਾ ਹੈ ਕਿ ਇਸ ਕਾਰਨ ਧੁੰਦਾਂ ਵਿੱਚ ਵੱਡੇ ਹਾਦਸੇ ਹੋਣਗੇ ਤੇ ਬਾਬਾ ਇਸ ਸਥਾਨ ’ਤੇ ਸਰਬੱਤ ਦੇ ਭਲੇ ਅਤੇ ਐਕਸੀਡੈਂਟ ਰੋਕਣ ਲਈ ਪੂਜਾ ਪਾਠ ਕਰ ਕੇ ਮੋਟਾ ਮਾਲ ਕਮਾਵੇਗਾ। ਲੁਧਿਆਣੇ ਬਾਈਪਾਸ ’ਤੇ ਇੱਕ ਚੌਂਕ ਵਿੱਚ ਬਣੇ ਨਜਾਇਜ਼ ਧਾਰਮਿਕ ਸਥਾਨ ਨੇ ਉੱਥੇ ਅਜੇ ਤੱਕ ਫਲਾਈ ਓਵਰ ਨਹੀਂ ਬਣਨ ਦਿੱਤਾ। ਉਸਦੀ ਵੇਖਾ ਵੇਖੀ ਸ਼ੇਰਪੁਰ ਚੌਂਕ ਵਿੱਚ ਵੀ ਬਹੁਤ ਵੱਡਾ ਧਾਰਮਿਕ ਸਥਾਨ ਬਣ ਗਿਆ ਹੈ।

ਸੜਕ ਵਿਭਾਗ ਦੀਆਂ ਅਜਿਹੀਆਂ ਹਰਕਤਾਂ ਕਾਰਨ ਭੂਮੀ ਮਾਫੀਆ ਨੂੰ ਭਾਰੀ ਉਤਸ਼ਾਹ ਮਿਲ ਰਿਹਾ ਹੈ। ਲੋਕ ਕਬਜ਼ਾ ਕਰ ਕੇ ਸੜਕ ਵਾਲੇ ਪਾਸੇ ਇੱਕ ਧਾਰਮਿਕ ਸਥਾਨ ਬਣਾ ਲੈਂਦੇ ਹਨ ਜਿਸ ਕਾਰਨ ਉਹਨਾਂ ਦੀ ਇਮਾਰਤ ਟੁੱਟਣ ਤੋਂ ਬਚ ਜਾਂਦੀ ਹੈ। ਹਾਈ ਕੋਰਟ -ਸੁਪਰੀਮ ਕੋਰਟ ਦਾ ਸਟੇਅ ਉਹ ਕਮਾਲ ਨਹੀਂ ਕਰ ਸਕਦਾ ਜੋ ਦੋ ਹਜ਼ਾਰ ਇੱਟਾਂ ਦੀ ਬਣਾਈ ਮਟੀ ਕਰ ਵਿਖਾਉਂਦੀ ਹੈ। ਸੜਕ ਵਿਭਾਗ ਦੇ ਅਫਸਰਾਂ ਨੂੰ ਚਾਹੀਦਾ ਹੈ ਕਿ ਜਾਂ ਤਾਂ ਗਰੀਬਾਂ ਦੀਆਂ ਝੁੱਗੀਆਂ ਵੀ ਨਾ ਢਾਹੁਣ, ਜਾਂ ਇਹਨਾਂ ਵਿਹਲੜਾਂ ਵੱਲੋਂ ਲੋਕਾਂ ਨੂੰ ਮੂਰਖ ਬਣਾਉਣ ਲਈ ਬਣਾਈਆਂ ਗਈਆਂ ਅਜਿਹੀਆਂ ਨਜਾਇਜ਼ ਇਮਾਰਤਾਂ ਵੀ ਢਾਹ ਦੇਣ। ਅੱਜ ਤੋਂ 30-35 ਸਾਲ ਪਹਿਲਾਂ ਜਲੰਧਰ ਸ਼ਹਿਰ ਦੇ ਬਹੁਤੇ ਚੌਂਕਾਂ ਵਿੱਚ ਵੱਖ ਵੱਖ ਬਾਬਿਆਂ ਦੇ ਉੱਸਰ ਗਏ ਮਜ਼ਾਰਾਂ ਕਾਰਨ ਵੀਰਵਾਰ ਨੂੰ ਟਰੈਫਿਕ ਜਾਮ ਹੋ ਜਾਂਦੀ ਸੀ। ਇੱਕ ਬਹਾਦਰ ਮਿਊਂਸਪਲ ਕਮਿਸ਼ਨਰ ਨੇ ਹਿੰਮਤ ਵਿਖਾਈ ਤੇ ਰਾਤੋ ਰਾਤ ਸਾਰੇ ਮਜ਼ਾਰ ਸਾਫ ਕਰ ਦਿੱਤੇ। ਵਹਿਮੀ ਲੋਕ ਕਈ ਸਾਲ ਤੱਕ ਉਸਦੀ ਮੌਤ ਦਾ ਇੰਤਜ਼ਾਰ ਕਰਦੇ ਰਹੇ ਪਰ ਉਹ ਹੋਰ ਤਰੱਕੀ ਕਰ ਗਿਆ। ਇਸ ਲਈ ਸਭ ਨੂੰ ਨਿਡਰ ਹੋ ਕੇ ਆਪਣੀ ਡਿਊਟੀ ਕਰਨ ਚਾਹੀਦੀ ਹੈ, ਵਰਨਾ ਅਜਿਹੇ ਠੱਗਾਂ ਦੀਆਂ ਦੁਕਾਨਾਂ ਲੋਕਾਂ ਦੀ ਜਾਨਾਂ ਦਾ ਖੌਅ ਬਣਦੀਆਂ ਰਹਿਣਗੀਆਂ।