“ਭਾਜਪਾ ਦੇ ਮੰਤਰੀ ਵਿਜੇ ਸ਼ਾਹ ਦੀ ਘਟੀਆ ਸ਼ਬਦਾਵਲੀ ਨੇ ਜਿੱਥੇ ਸਿਆਸਤਦਾਨਾਂ ਦੀ ਅਕਲ ...”
(18 ਮਈ 2025)

ਕਰਨਲ ਸੋਫ਼ੀਆ ਕੁਰੈਸ਼ੀ 

ਤੁਸੀਂ ਭਲਾ ਕਦੇ ਸੋਚਿਆ ਕਿ ਦਾਨੇ ਲੋਕ ਸਿਆਸਤ ਤੋਂ ਦੂਰ ਕਿਉਂ ਰਹਿਣ ਲੱਗੇ ਹਨ? ਬਹੁਤੇ ਸਮਝਦਾਰ ਲੋਕ ਤਾਂ ਹੁਣ ਰਾਜਨੀਤੀ ਅਤੇ ਧਰਮ ਬਾਰੇ ਬਹਿਸ ਕਰਨ ਤੋਂ ਵੀ ਟਲਣ ਲੱਗੇ ਹਨ। ਬੁਰੀ ਨਾ ਸਿਆਸਤ ਹੈ ਅਤੇ ਨਾ ਹੀ ਧਰਮ ਵਿੱਚ ਕੋਈ ਖੋਟ ਹੈ। ਬੱਸ ਚਿੱਟੀ ਸਿਉਂਕ ਨੇ ਸਾਡੇ ਸਿਸਟਮ ਨੂੰ ਖੋਖਲਿਆਂ ਕਰ ਦਿੱਤਾ ਹੈ। ਸਿਆਣੇ ਤਾਂ ਇਹ ਵੀ ਕਹਿਣ ਲੱਗੇ ਹਨ ਕਿ ਚਿੱਕੜ ਵਿੱਚ ਪੱਥਰ ਮਾਰਨ ਨਾਲ ਛਿੱਟੇ ਆਪਣੇ ਉੱਤੇ ਹੀ ਪੈਣੇ ਹੁੰਦੇ ਹਨ।

ਮੱਧ ਪ੍ਰਦੇਸ਼ ਤੋਂ ਭਾਰਤੀ ਜਨਤਾ ਪਾਰਟੀ ਦੇ ਮੰਤਰੀ ਵਿਜੇ ਸ਼ਾਹ ਨੇ ਸਿਆਸਤਦਾਨਾਂ ਦੀ ਅਕਲ ਦਾ ਜਲੂਸ ਕੱਢ ਕੇ ਰੱਖ ਦਿੱਤਾ ਹੈ। ਇਹ ਨਹੀਂ ਕਿ ਇਸ ਤੋਂ ਪਹਿਲਾਂ ਸਿਆਸਤਦਾਨ ਔਲ ਪਟੌਲੀਆਂ ਨਹੀਂ ਸੀ ਮਾਰਦੇ ਪਰ ਵਿਜੇ ਸ਼ਾਹ ਨੇ ਤਾਂ ਸਿਆਸੀ ਲੀਡਰਾਂ ਨੂੰ ਹੀ ਨਹੀਂ ਸਗੋਂ ਪੂਰੀ ਮਨੁੱਖਤਾ ਨੂੰ ਵੀ ਸ਼ਰਮਸਾਰ ਕਰ ਦਿੱਤਾ ਹੈ। ਮੱਧ ਪ੍ਰਦੇਸ਼ ਦੀ ਸਰਕਾਰ ਅਤੇ ਪੁਲਿਸ ਉਸ ਤੋਂ ਵੀ ਢੀਠ ਨਿਕਲੀ। ਆਪਣੀ ਸਰਕਾਰ ਦੇ ਮੰਤਰੀ ਖ਼ਿਲਾਫ਼ ਐੱਫਆਈਆਰ ਲਿਖਣ ਵੇਲੇ ਅਪਰਾਧ ਦਾ ਜ਼ਿਕਰ ਹੀ ਨਹੀਂ ਕੀਤਾ। ਹਾਈ ਕੋਰਟ ਨੇ ਇਸ ਨੂੰ ਸਰਕਾਰ ਦੀ ਨੀਅਤ ਵਿੱਚ ਖੋਟ ਦੱਸਿਆ ਹੈ। ਵਿਜੇ ਸ਼ਾਹ, ਜਿਸ ਨੇ ਅੰਬੇਦਕਰ ਨਗਰ ਵਿੱਚ ਇੱਕ ਇਕੱਠ ਨੂੰ ਸੰਬੋਧਨ ਕਰਦਿਆਂ ਭਾਰਤੀ ਫ਼ੌਜ ਦੀ ਮਹਿਲਾ ਅਫਸਰ ਸੋਫੀਆ ਕੁਰੈਸ਼ੀ ਦਾ ਨਾਂ ਲਏ ਬਗੈਰ ਕਹਿ ਦਿੱਤਾ ਸੀ ਕਿ ਜਿਨ੍ਹਾਂ ਨੇ ਭੈਣਾਂ ਦੇ ਸਿੰਦੂਰ ਉਜਾੜੇ ਹਨ, ਉਹਨਾਂ ਦੀ ਭੈਣ ਨੂੰ ਹੀ ਭੇਜ ਕੇ ਐਸੀ ਤੈਸੀ ਕਰਵਾਈ ਹੈ। ਪਹਿਲਾਂ ਬੋਲਣ ਲੱਗੇ ਨੇ ਕੁਝ ਸੋਚਿਆ ਨਹੀਂ, ਹੁਣ ਬਿਆਨ ਨੂੰ ਤੋੜ ਮਰੋੜ ਕੇ ਛਾਪਣ ਦੇ ਬਹਾਨੇ ਲੱਭਦਾ ਹੈ। ਹਾਈ ਕੋਰਟ ਅਤੇ ਸੁਪਰੀਮ ਕੋਰਟ ਦੇ ਡੰਡੇ ਤੋਂ ਬਚਣ ਲਈ ਲੁਕਣ ਲਈ ਕੋਈ ਰਾਹ ਨਹੀਂ ਲੱਭ ਰਿਹਾ।

ਮੱਧ ਪ੍ਰਦੇਸ਼ ਹਾਈ ਕੋਰਟ ਨੇ ਉੱਥੋਂ ਦੇ ਮੰਤਰੀ ਵਿਜੇ ਸ਼ਾਹ ਦੇ ਕਰਨਲ ਸੋਫੀਆ ਕੁਰੈਸ਼ੀ ਨੂੰ ਲੈ ਕੇ ਦਿੱਤੇ ਸ਼ਰਮਨਾਕ ਬਿਆਨ ਉੱਤੇ ਦਰਜ ਐੱਫਆਈਆਰ ਨੂੰ ਕਮਜ਼ੋਰ ਅਤੇ ਗ਼ੈਰ ਤਸੱਲੀਬਖਸ਼ ਕਰਾਰ ਦੇ ਦਿੱਤਾ ਹੈ। ਅਦਾਲਤ ਨੇ ਕਿਹਾ ਹੈ ਕਿ ਕੇਸ ਨੂੰ ਕਮਜ਼ੋਰ ਕਰਨ ਦੇ ਲਈ ਰਾਜ ਸਰਕਾਰ ਦੀ ਨੀਅਤ ਵਿੱਚ ਸਾਫ ਖੋਟ ਦਿਸਦਾ ਹੈ। ਐੱਫ ਆਈ ਆਰ ਵਿੱਚ ਮੁਲਜ਼ਮ ਮੰਤਰੀ ਦੇ ਅਪਰਾਧ ਦਾ ਜ਼ਿਕਰ ਤਕ ਨਹੀਂ ਕੀਤਾ ਗਿਆ। ਅਦਾਲਤ ਨੇ ਕਿਹਾ ਕਿ ਅਜਿਹੇ ਧੋਖੇ ਨੂੰ ਸ਼ੁਰੂ ਵਿੱਚ ਹੀ ਰੋਕਣ ਦੀ ਜ਼ਰੂਰਤ। ਮੱਧ ਪ੍ਰਦੇਸ਼ ਦੀ ਹਾਈ ਕੋਰਟ ਨੇ ਆਪਣੇ ਪੱਧਰ ਉੱਤੇ ਬਿਆਨ ਦਾ ਨੋਟਿਸ ਲੈ ਕੇ ਸਰਕਾਰ ਨੂੰ ਵਿਜੇ ਸ਼ਾਹ ਦੇ ਖ਼ਿਲਾਫ਼ ਐੱਫਆਈਆਰ ਦਰਜ ਕਰਨ ਲਈ ਕਹਿ ਦਿੱਤਾ ਸੀ। ਅਦਾਲਤ ਨੇ ਤਾਂ ਇੱਥੋਂ ਤਕ ਕਹਿ ਦਿੱਤਾ ਸੀ ਕਿ ਜੇ ਡੀਜੀਪੀ ਕਿਸੇ ਤਰ੍ਹਾਂ ਦੀ ਢਿੱਲ ਮੱਠ ਦਿਖਾਉਂਦੇ ਹਨ ਤਾਂ ਉਹਨਾਂ ਨੂੰ ਵੀ ਬਖਸ਼ਿਆ ਨਹੀਂ ਜਾਵੇਗਾ। ਸਰਕਾਰ ਨੇ ਇੰਦੌਰ ਦੇ ਮਾਨਪੁਰ ਥਾਣੇ ਵਿੱਚ ਐੱਫ ਆਈ ਆਰ ਦਰਜ ਕਰਕੇ ਅਦਾਲਤ ਨੂੰ ਸੂਚਨਾ ਦੇ ਦਿੱਤੀ ਸੀ।

ਐੱਫ ਆਈ ਆਰ ਦੀ ਸ਼ਬਦਾਵਲੀ ਵਿੱਚ ਮੰਤਰੀ ਦੇ ਨਾਂ ਦਾ ਸਿਰਫ ਦੋ ਵਾਰ ਜ਼ਿਕਰ ਕੀਤਾ ਗਿਆ ਹੈ ਅਤੇ ਦੋਨੋਂ ਵਾਰ ਉਸ ਨੂੰ ਸ੍ਰੀ ਵਿਜੇ ਸ਼ਾਹ ਲਿਖਿਆ ਗਿਆ ਹੈ। ਦੂਜੇ ਪਾਸੇ ਪੁਲਿਸ ਕਾਰਵਾਈ ਕਰਨ ਦੀ ਥਾਂ ਟਾਲਾ ਵੱਟ ਰਹੀ ਹੈ। ਹਾਈ ਕੋਰਟ ਵੱਲੋਂ ਵਿਜੇ ਸ਼ਾਹ ਨੂੰ ਕੋਈ ਰਾਹਤ ਨਾ ਮਿਲਣ ਤੋਂ ਬਾਅਦ ਉਹ ਗਾਇਬ ਹੋ ਗਿਆ ਹੈ। ਉਸਦੇ ਸਰਕਾਰੀ ਬੰਗਲੇ ਅਤੇ ਦਫ਼ਤਰ ਵਿੱਚ ਸੰਨਾਟਾ ਛਾਅ ਗਿਆ ਹੈ। ਭਾਰਤੀ ਜਨਤਾ ਪਾਰਟੀ ਦੀ ਹਾਈ ਕਮਾਂਡ ਹਾਲੇ ਤਕ ਚੁੱਪ ਹੈ ਪਰ ਮੰਤਰੀ ਦੇ ਅਸਤੀਫ਼ੇ ਅਤੇ ਬਰਖਾਸਤਗੀ ਦੀ ਚਰਚਾ ਜ਼ਰੂਰ ਛਿੜ ਪਈ ਹੈ। ਉੱਥੋਂ ਦੇ ਮੁੱਖ ਮੰਤਰੀ ਡਾਕਟਰ ਮੋਹਨ ਯਾਦਵ ਨੇ ਕਿਹਾ ਹੈ ਕਿ ਹੁਣ ਤਕ ਹਾਈਕੋਰਟ ਦੇ ਆਦੇਸ਼ਾਂ ਦੀ ਪਾਲਣਾ ਕੀਤੀ ਗਈ ਹੈ ਅਤੇ ਭਵਿੱਖ ਵਿੱਚ ਵੀ ਆਦੇਸ਼ਾਂ ਨੂੰ ਮੰਨਿਆ ਜਾਵੇਗਾ।

ਸ਼ਾਹ ਨੂੰ ਆਖਰ ਆਪਣੇ ਵਕੀਲ ਰਾਹੀਂ ਮੁਲਕ ਦੀ ਸਿਖ਼ਰਲੀ ਅਦਾਲਤ ਸੁਪਰੀਮ ਕੋਰਟ ਵਿੱਚ ਸ਼ਰਨ ਲੈਣੀ ਪਈ। ਸੁਪਰੀਮ ਕੋਰਟ ਨੇ ਕੇਸ ’ਤੇ ਸੁਣਵਾਈ ਕਰਦਿਆਂ ਇੱਥੋਂ ਤਕ ਕਹਿ ਦਿੱਤਾ ਕਿ ਉਸ ਨੂੰ ਮੰਤਰੀ ਦੇ ਅਹੁਦੇ ਉੱਤੇ ਬਣੇ ਰਹਿਣ ਦਾ ਕੋਈ ਹੱਕ ਨਹੀਂ। ਸੁਪਰੀਮ ਕੋਰਟ ਨੇ ਇਹ ਵੀ ਕਿਹਾ ਕਿ ਮੰਤਰੀ ਵੱਲੋਂ ਗਟਰ ਭਾਸ਼ਾ ਵਰਤੀ ਗਈ ਹੈ। ਜਸਟਿਸ ਅਨੁਰਾਧਾ ਸ਼ੁਕਲਾ ਅਤੇ ਅਤੁਲ ਸ਼੍ਰੀਧਰਨ ਨੇ ਮੁਲਜ਼ਮ ਦੇ ਵਕੀਲ ਤੋਂ ਪੁੱਛਿਆ ਕਿ ਕੀ ਉਸਨੇ ਐੱਫਆਈਆਰ ਪੜ੍ਹੀ ਹੈ। ਉਹਨਾਂ ਨੇ ਵਕੀਲ ਨੂੰ ਝਾੜ ਪਾਉਂਦਿਆਂ ਕਿਹਾ ਕਿ ਐੱਫ ਆਈ ਆਰ ਵਿੱਚ ਇਹ ਤਕ ਨਹੀਂ ਲਿਖਿਆ ਗਿਆ ਕਿ ਅਪਰਾਧ ਕੀ ਹੈ? ਐੱਫਆਈਆਰ ਨੂੰ ਰੱਦ ਕਰਨ ਦੀ ਗੁੰਜਾਇਸ਼ ਰੱਖੀ ਗਈ ਹੈ। ਇਸ ਕਰਕੇ ਨਿਗਰਾਨੀ ਰੱਖਣੀ ਹੋਰ ਵੀ ਜ਼ਰੂਰੀ ਹੋ ਗਈ ਹੈ।

ਸੁਪਰੀਮ ਕੋਰਟ ਵਿੱਚ ਮੁਲਜ਼ਮ ਦੇ ਵਕੀਲ ਨੇ ਤਰਲਾ ਪਾਇਆ ਕਿ ਹਾਈ ਕੋਰਟ ਵਿੱਚ ਉਸ ਦਾ ਪੱਖ ਨਹੀਂ ਸੁਣਿਆ ਗਿਆ ਹੈ, ਜਿਸ ਕਰਕੇ ਉੱਚ ਅਦਾਲਤ ਦੇ ਹੁਕਮਾਂ ਉੱਤੇ ਰੋਕ ਲੱਗਣੀ ਚਾਹੀਦੀ ‌ਹੈ। ਇਸ ਉੱਤੇ ਸੁਪਰੀਮ ਕੋਰਟ ਦੇ ਨਵ ਨਿਯੁਕਤ ਜਸਟਿਸ ਬੀ ਆਰ ਗਵਈ ਨੇ ਕਿਹਾ ਕਿ ਮੰਤਰੀ ਨੇ ਸ਼ਬਦਾਂ ਦੀ ਮਰਯਾਦਾ ਦਾ ਖਿਆਲ ਬਿਲਕੁਲ ਨਹੀਂ ਰੱਖਿਆ। ਅਜਿਹੇ ਨਾਜ਼ੁਕ ਸਮੇਂ ਵਿੱਚ ਸੰਵਿਧਾਨਿਕ ਅਹੁਦੇ ਉੱਤੇ ਬੈਠੇ ਵਿਅਕਤੀ ਨੂੰ ਸੋਚ ਸਮਝ ਕੇ ਬਿਆਨ ਦੇਣਾ ਚਾਹੀਦਾ ਹੈ। ਸਦਾ ਹਰੇਕ ਸ਼ਬਦ ਜ਼ਿੰਮੇਦਾਰੀ ਦੀ ਭਾਵਨਾ ਵਾਲਾ ਹੋਵੇ। ਮੰਤਰੀ ਨੇ ਬੋਲਣ ਤੋਂ ਪਹਿਲਾਂ ਸੋਚਿਆ ਤਕ ਨਹੀਂ। ਅਦਾਲਤ ਨੇ ਇਹ ਵੀ ਕਿਹਾ ਕਿ ਉਹਨਾਂ ਨੂੰ ਸਮਝ ਨਹੀਂ ਲੱਗ ਰਹੀ ਕਿ ਅਜਿਹੇ ਬਿਆਨ ਦੀ ਲੋੜ ਕੀ ਸੀ? ਸਿਖਰਲੀ ਅਦਾਲਤ ਨੇ ਹਾਈ ਕੋਰਟ ਤੋਂ ਰਾਹਤ ਮੰਗਣ ਲਈ ਕੇਸ ਮੁੜ ਵਾਪਸ ਮੋੜ ਦਿੱਤਾ ਹੈ। ਇਸ ਤੋਂ ਪਹਿਲਾਂ ਮੁਲਜ਼ਮ ਦੇ ਵਕੀਲ ਨੇ ਅਦਾਲਤ ਨੂੰ ਦੱਸਿਆ ਕਿ ਵਿਜੇ ਸ਼ਾਹ ਵੱਲੋਂ ਆਪਣੇ ਦਿੱਤੇ ਬਿਆਨ ਲਈ ਦਸ ਵਾਰ ਮੁਆਫ਼ੀ ਮੰਗ ਲਈ ਗਈ ਹੈ।

ਭਾਰਤ ਅਤੇ ਪਾਕਿਸਤਾਨ ਦਰਮਿਆਨ ਅਣਐਲਾਨੀ ਜੰਗ ਤਿੰਨ-ਚਾਰ ਦਿਨ ਲਈ ਚੱਲੀ। ਦੋ ਮਹਿਲਾ ਸੈਨਿਕ ਅਫਸਰਾਂ ਸਮੇਤ ਭਾਰਤੀ ਫੌਜ ਨੇ ਪਾਕਿਸਤਾਨ ਦੇ ਦੰਦ ਖੱਟੇ ਕਰ ਦਿੱਤੇ। ਪਾਕਿਸਤਾਨ ਦੀਆਂ ਮਿਜ਼ਾਈਲਾਂ ਨੂੰ ਹਵਾ ਵਿੱਚ ਹੀ ਉਡਾ ਦਿੱਤਾ ਜਾਂਦਾ ਰਿਹਾ। ਇਸ ਤੋਂ ਪਹਿਲਾਂ ਭਾਰਤੀ ਫੌਜ ਵੱਲੋਂ ਪਾਕਿਸਤਾਨ ਦੇ ਅੱਤਵਾਦੀਆਂ ਦੇ ਨੌਂ ਟਿਕਾਣੇ ਤਬਾਹ ਕਰ ਦਿੱਤੇ ਗਏ ਸਨ। ਮੁਲਕ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵਾਰ ਵਾਰ ਸਪਸ਼ਟ ਕਰਦੇ ਰਹੇ ਸਨ ਕਿ ਉਹਨਾਂ ਦਾ ਮਕਸਦ ਸਿਰਫ਼ ਪਾਕਿਸਤਾਨ ਵਿੱਚ ਅੱਤਵਾਦੀਆਂ ਦੇ ਅੱਡਿਆਂ ਨੂੰ ਤਬਾਹ ਕਰਨਾ ਹੈ ਪਰ ਉਹਨਾਂ ਨੇ ਫੌਜ ਨੂੰ ਕਦੇ ਵੀ ਸੈਨਾ ਦੇ ਅੱਡਿਆਂ ਜਾਂ ਪਾਕਿਸਤਾਨ ਦੇ ਨਾਗਰਿਕਾਂ ਨੂੰ ਨਿਸ਼ਾਨਾ ਬਣਾਉਣ ਲਈ ਨਹੀਂ ਸੀ ਕਿਹਾ। ਜ਼ਿਕਰਯੋਗ ਗੱਲ ਇਹ ਕਿ ਭਾਰਤੀ ਫੌਜ ਨੇ ਜ਼ਾਬਤਾ ਬਣਾ ਕੇ ਰੱਖਿਆ। ਇੱਕ ਹੋਰ ਵਿਸ਼ੇਸ਼ ਗੱਲ ਇਹ ਕਿ ਜਦੋਂ ਦੋਹਾਂ ਮੁਲਕਾਂ ਦੌਰਾਨ ਸੀਜ਼ਫਾਇਰ ਹੋ ਗਈ ਤਾਂ ਉਸ ਤੋਂ ਬਾਅਦ ਪਾਕਿਸਤਾਨ ਭਾਵੇਂ ਸਮਝੌਤੇ ਦੀ ਉਲੰਘਣਾ ਕਰਦਾ ਰਿਹਾ‌ ਪਰ ਭਾਰਤ ਨੇ ਆਪਣੇ ਬੋਲਾਂ ਦਾ ਧਰਮ ਪੁਗਾਇਆ ਹੈ।

ਇੱਥੇ ਇਹ ਚੇਤੇ ਕਰਾਉਣਾ ਜ਼ਰੂਰੀ ਹੋਵੇਗਾ ਕਿ 22 ਅਪਰੈਲ ਨੂੰ ਅੱਤਵਾਦੀਆਂ ਵੱਲੋਂ ਪਹਿਲਗਾਮ ਵਿੱਚ ਸੈਰ ਕਰਨ ਗਏ 26 ਸੈਲਾਨੀਆਂ ਦਾ ਕਤਲ ਕਰ ਦਿੱਤਾ ਗਿਆ ਸੀ। ਅੱਤਵਾਦੀਆਂ ਨੇ ਸੈਲਾਨੀਆਂ ਨੂੰ ਮਾਰਨ ਤੋਂ ਪਹਿਲਾਂ ਉਹਨਾਂ ਦਾ ਧਰਮ ਅਤੇ ਨਾਂ ਪੁੱਛੇ। ਪ੍ਰਧਾਨ ਮੰਤਰੀ ਉਸੇ ਵੇਲੇ ਕਹਿਣ ਲੱਗ ਪਏ ਸਨ ਕਿ ਅਸੀਂ ਬਦਲਾ ਨਹੀਂ ਲਵਾਂਗੇ, ਇਨਸਾਫ਼ ਕਰਾਂਗੇ। ਉਸ ਤੋਂ ਬਾਅਦ ਅਪਰੇਸ਼ਨ ਸਿੰਧੂਰ ਤਹਿਤ ਪਾਕਿਸਤਾਨ ਸਥਿਤ ਅੱਤਵਾਦੀਆਂ ਦੇ ਨੌਂ ਟਿਕਾਣੇ ਤਬਾਹ ਕਰ ਦਿੱਤੇ ਗਏ ਸਨ। ਇਸ ਗੱਲ ਵਿੱਚ ਕੋਈ ਸ਼ੱਕ ਦੀ ਗੁੰਜਾਇਸ਼ ਨਹੀਂ ਹੈ ਕਿ ਪਾਕਿਸਤਾਨ ਅੱਤਵਾਦੀਆਂ ਦੀ ਸਰਪ੍ਰਸਤੀ ਕਰ ਰਿਹਾ ਹੈ। ਇਹ ਵੀ ਝੂਠ ਨਹੀਂ ਕਿ ਪਾਕਿਸਤਾਨ ਅੱਤਵਾਦੀਆਂ ਨੂੰ ਭਾਰਤ ਵਿੱਚ ਖ਼ੂਨ ਡੋਲ੍ਹਣ ਲਈ ਸਲਾਹ ਰਿਹਾ ਹੈ।

ਭਾਰਤ ਦੀ ਫੌਜ ਨੇ ਜਿਸ ਦਲੇਰੀ ਨਾਲ ਭਾਰਤ ਦੀ ਸ਼ਾਨ ਵਿੱਚ ਵਾਧਾ ਕੀਤਾ ਹੈ, ਇਸ ਨਾਲ ਇਸ ਵਾਰ ਮਹਿਲਾ ਅਫਸਰਾਂ ਦੀ ਅੰਦਰਲੀ ਸ਼ਕਤੀ ਉੱਭਰ ਕੇ ਸਾਹਮਣੇ ਆਈ ਹੈ। ਉਸ ਨਾਲ ਸਾਰੇ ਭਾਰਤੀਆਂ ਦਾ ਸੀਨਾ ਫੁੱਲ ਕੇ ਚੌੜਾ ਹੋ ਗਿਆ ਹੈ। ਭਾਜਪਾ ਦੇ ਮੰਤਰੀ ਵਿਜੇ ਸ਼ਾਹ ਦੀ ਘਟੀਆ ਸ਼ਬਦਾਵਲੀ ਨੇ ਜਿੱਥੇ ਸਿਆਸਤਦਾਨਾਂ ਦੀ ਅਕਲ ਦਾ ਜਲੂਸ ਕੱਢਿਆ ਹੈ, ਉੱਥੇ ਭਾਰਤੀ ਜਨਤਾ ਪਾਰਟੀ ਦੀ ਸੋਚ ਬਾਰੇ ਵੀ ਸਵਾਲ ਖੜ੍ਹੇ ਕਰਨ ਦਾ ਮੌਕਾ ਦੇ ਦਿੱਤਾ ਹੈ। ਸਮਝਿਆ ਤਾਂ ਇਹ ਜਾ ਰਿਹਾ ਸੀ ਕਿ ਭਾਰਤ ਪਾਕਿਸਤਾਨ ਦੀ ਜੰਗ ਤੋਂ ਬਾਅਦ ਭਗਵਾਂ ਰੰਗ ਫਿੱਕਾ ਪੈਣ ਲੱਗ ਪਵੇਗਾ ਪਰ ਵਿਜੇ ਸ਼ਾਹ ਨੇ ਭਾਜਪਾ ਅਤੇ ਘੱਟ ਗਿਣਤੀਆਂ ਦਰਮਿਆਨ ਹੋਰ ਡੂੰਘੀ ਲਕੀਰ ਖਿੱਚ ਦਿੱਤੀ ਹੈ। ਆਮ ਲੋਕ ਮੂਰਖਾਂ ਨਾਲ ਉਲਝਣ ਤੋਂ ਗੁਰੇਜ਼ ਕਰਨਗੇ। ਸਿਆਣਪ ਅਤੇ ਸਬਰ ਦੀ ਪਰਖ਼ ਹਮੇਸ਼ਾ ਤੋਂ ਹੁੰਦੀ ਆ ਰਹੀ ਹੈ।

*       *       *       *      *

ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
ਪਾਠਕਾਂ ਨਾਲ ਆਪਣੇ ਵਿਚਾਰ ਸਾਂਝੇ ਕਰਨ ਲਈ ਸਰੋਕਾਰ ਨਾਲ ਸੰਪਰਕ ਕਰੋ: (This email address is being protected from spambots. You need JavaScript enabled to view it.om)