“ਇੰਜ ਪ੍ਰਤੀਤ ਹੁੰਦਾ ਹੈ ਜਿਵੇਂ ਸੰਨ 2028 ਵਿੱਚ ਵਾਈਟ ਹਾਊਸ ਵਿੱਚ ਤਬਦੀਲੀ ਦੇ ਨਵੇਂ ਅਧਿਆਇ ...”
(13 ਨਵੰਬਰ 2025)
ਅੱਜ ਵਿਸ਼ਵ ਦਾ ਕੋਈ ਅਜਿਹਾ ਦੇਸ਼ ਨਹੀਂ ਜਿੱਥੇ ਭਾਰਤੀ ਮੂਲ ਦੇ ਪਰਵਾਸੀਆਂ ਦਾ ਡੰਕਾ ਨਾ ਵੱਜਦਾ ਹੋਵੇ। ਵਿਗਿਆਨ, ਅਰਥਸਾਸ਼ਤਰ, ਇਨਫੋਟੈੱਕ, ਕਾਰੋਬਾਰ, ਟ੍ਰਾਂਸਪੋਰਟ, ਖੇਤੀ, ਜਨਤਕ ਸੇਵਾਵਾਂ, ਡਿਪਲੋਮੇਸੀ, ਅਧਿਆਤਮਿਕ ਖੇਤਰਾਂ ਵਿੱਚ ਹੀ ਨਹੀਂ ਬਲਕਿ ਰਾਜਨੀਤਕ ਖੇਤਰ ਵਿੱਚ ਵੀ ਉਨ੍ਹਾਂ ਦਾ ਅੱਖਾਂ ਦੁੰਧਿਆ ਦੇਣ ਵਾਲਾ ਜਲਵਾ ਕਾਇਮ ਹੈ।
ਕਮਾਲ: ਵਿਸ਼ਵ ਦੇ ਸਭ ਤੋਂ ਤਾਕਤਵਰ ਦੇਸ਼ ਅਮਰੀਕਾ ਅਤੇ ਉਸਦੇ ਅਜੋਕੇ ਕਾਲ ਦੇ ਸਭ ਤੋਂ ਵਿਵਾਦਤ, ਆਪ ਹੁਦਰੇ, ਨਿਰੰਕੁਸ਼, ਬੜਬੋਲੇ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਤਿੱਖੇ ਅਤੇ ਨਿੱਜੀ ਵਿਰੋਧੀ ਦੇ ਬਾਵਜੂਦ 4 ਨਵੰਬਰ, 2025 ਨੂੰ ਅਮਰੀਕਾ ਦੇ ਵੱਡੇ ਮਹਾਂਨਗਰ ਨਿਊਯਾਰਕ (ਜੋ ਕਦੇ ਸੌਂਦਾ ਨਹੀਂ ਦੇ) 111ਵੇਂ ਮੇਅਰ ਵਜੋਂ ਭਾਰਤੀ ਮੂਲ (ਮਾਂ ਪੰਜਾਬੀ ਮੂਲ) ਦੇ ਪਰਿਵਾਰ ਦੇ ਫਰਜੰਦ 34 ਸਾਲਾ ਡੈਮੋਕ੍ਰੈਟਿਕ ਸੋਸ਼ਲਿਸਟ ਜ਼ੋਹਰਾ ਮਮਦਾਨੀ ਦਾ ਚੁਣਿਆ ਜਾਣਾ ਕਿਸੇ ਅਲੌਕਿਕਤਾ ਤੋਂ ਘੱਟ ਨਹੀਂ। ਉਸਦੀ ਜਿੱਤ ਨੇ ਅਮਰੀਕੀ ਵਾਈਟ ਹਾਊਸ ਦੀਆਂ ਨੀਹਾਂ ਹਿਲਾ ਕੇ ਰੱਖ ਦਿੱਤੀਆਂ ਹਨ।
ਕੌਣ ਹੈ ਮਮਦਾਨੀ? ਜੋਹਰਾਂ ਮਮਦਾਨੀ ਪੰਜਾਬ ਦੀ ਧੀ ਮੀਰਾ ਨਾਇਰ, ਜੋ ਦਿੱਲੀ ਪੜ੍ਹੀ ਲਿਖੀ ਉੱਘੀ ਫਿਲਮਸਾਜ਼ ਹੈ ਅਤੇ ਪ੍ਰੋ. ਮਹਿਮੂਦ ਮਮਦਾਨੀ ਜੋ ਮੁੰਬਈ ਦੇ ਜਮਪਲ ਅਤੇ ਇਤਿਹਾਸ ਦੇ ਵਿਦਵਾਨ ਹਨ, ਜੋ ਕਦੇ ਕੰਪਾਲਾ (ਯੂਗਾਂਡਾ) ਚਲੇ ਗਏ ਸਨ, ਦਾ ਪੁੱਤਰ ਹੈ, ਜਿਸਦਾ ਜਨਮ ਕੰਪਾਲਾ ਵਿਖੇ 18 ਅਕਤੂਬਰ, 1991 ਵਿੱਚ ਹੋਇਆ ਸੀ। ਜਦੋਂ ਉਹ 5 ਸਾਲ ਦਾ ਸੀ, ਮਮਦਾਨੀ ਪਰਿਵਾਰ ਕੇਪਟਾਊਨ, ਦੱਖਣੀ ਅਫਰੀਕਾ ਦੋ ਸਾਲ ਰਹਿਣ ਬਾਅਦ ਨਿਊਯਾਰਕ, ਅਮਰੀਕਾ ਪੱਕੇ ਤੌਰ ’ਤੇ ਵਸ ਗਿਆ। ਜ਼ੋਹਰਾਂ ਮਮਦਾਨੀ ਦੀ ਪੜ੍ਹਾਈ ਇੱਥੇ ਹੋਈ। ਸੰਨ 2018 ਵਿੱਚ ਉਸਨੇ ਅਮਰੀਕੀ ਨਾਗਰਿਕਤਾ ਪ੍ਰਾਪਤ ਕੀਤੀ। ਪ੍ਰੋ. ਮਮਦਾਨੀ ਦੇ ਖੱਬੇ ਪੱਖੀ ਵਿਚਾਰਾ ਤੋਂ ਨੌਜਵਾਨ ਮਮਦਾਨੀ ਪੂਰੀ ਤਰ੍ਹਾਂ ਪ੍ਰਭਾਵਿਤ ਹੈ। ਸੰਨ 2020 ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਨਿਊਯਾਰਕ ਰਾਜ ਦੀ ਵਿਧਾਨ ਸਭਾ ਲਈ ਜੋਹਰਾਂ ਮਮਦਾਨੀ ਚੁਣਿਆ ਗਿਆ। ਸੰਨ 2022 ਅਤੇ 2024 ਵਿੱਚ ਉਹ ਮੁੜ ਚੁਣਿਆ ਜਾਂਦਾ ਰਿਹਾ। ਪਿਛਲੇ ਸਾਲ ਉਸਨੇ ਨਿਊਯਾਰਕ ਦੇ ਮੇਅਰ ਦੀ ਚੋਣ ਲੜਨ ਦਾ ਐਲਾਨ ਕੀਤਾ। ਹੈਰਾਨਗੀ ਦੀ ਗੱਲ ਇਹ ਹੈ ਕਿ ਉਸ ਸਮੇਂ ਉਸ ਨੂੰ 1 ਪ੍ਰਤੀਸ਼ਤ ਨਿਊਯਾਰਕ ਮਹਾਂਨਗਰ ਨਿਵਾਸੀਆਂ ਦੀ ਹਿਮਾਇਤ ਵੀ ਹਾਸਲ ਨਹੀਂ ਸੀ।
ਮੁਕਾਬਲਾ: ਮਮਦਾਨੀ ਦਾ ਸਿੱਧਾ ਰਾਜਨੀਤਕ ਮੁਕਾਬਲਾ ਡੈਮੋਕ੍ਰੈਟਿਕ ਪਾਰਟੀ ਦੇ ਉਮੀਦਵਾਰ ਵਜੋਂ ਅਜ਼ਾਦ ਧਨਾਢ ਅਤੇ ਕਾਰਪੋਰੇਟ ਖ਼ਰਬਪਤੀਆਂ ਦੀ ਹਿਮਾਇਤ ਪ੍ਰਾਪਤ ਸਾਬਕਾ ਗਵਰਨਰ ਐਂਡਰਿਉ ਕੂਮੋ ਨਾਲ ਸੀ। ਕੁਝ ਔਰਤਾਂ ਵੱਲੋਂ ਉਸ ’ਤੇ ਛੇੜ-ਛਾੜ ਦੇ ਦੋਸ਼ਾਂ ਕਰਕੇ ਜੋ ਉਹ ਸਿਰੇ ਤੋਂ ਨਕਾਰਦਾ ਰਿਹਾ ਹੈ, ਉਸਨੇ ਸੰਨ 2021 ਵਿੱਚ ਨਿਊਯਾਰਕ ਦੇ ਗਵਰਨਰ ਵਜੋਂ ਅਸਤੀਫਾ ਦੇ ਦਿੱਤਾ ਸੀ। ਪ੍ਰਾਇਮਰੀ ਚੋਣਾਂ ਵਿੱਚ ਕੂਮੋ ਨੂੰ ਮਮਦਾਨੀ ਨੇ ਜੂਨ, 2025 ਵਿੱਚ 13 ਪੁਆਇੰਟਾਂ ’ਤੇ ਚਿੱਤ ਕੀਤਾ ਸੀ। ਇਸ ਜਿੱਤ ਨੇ ਪੂਰੇ ਅਮਰੀਕਾ ਵਿੱਚ ਹਲਚਲ ਪੈਦਾ ਕਰ ਦਿੱਤੀ ਸੀ।
67 ਸਾਲਾ ਕੂਮੋ ਡੈਮੋਕਰੈਟਿਕ ਪਾਰਟੀ ਦੇ ਸਾਬਕਾ ਗਵਰਨਰ ਮਾਰੀਉ ਕੂਮੋ ਦਾ ਪੁੱਤਰ ਹੈ ਜੋ ਸੰਨ 2011 ਤੋਂ ਸੰਨ 2021 ਵਿੱਚ ਆਪਣਾ ਅਸਤੀਫਾ ਦੇਣ ਤਕ ਨਿਊਯਾਰਕ ਦਾ ਗਵਰਨਰ ਰਿਹਾ ਸੀ। ਉਸਦਾ ਰਾਜਨੀਤਕ ਪਿਛੋਕੜ ਬਹੁਤ ਮਜ਼ਬੂਤ ਸੀ। ਪ੍ਰਾਇਮਰੀ ਚੋਣਾਂ ਵਿੱਚ ਉਸ ਵਰਗੇ ਮਜ਼ਬੂਤ ਉਮੀਦਵਾਰ ਨੂੰ ਹਰਾਉਣਾ ਪ੍ਰਵਾਸੀ ਭਾਰਤੀ ਪਰਿਵਾਰ ਦੇ ਫਰਜੰਦ ਮਮਦਾਨੀ ਲਈ ਬਹੁਤ ਜੋਖੋਂ ਭਰਿਆ ਕਾਰਜ ਸੀ। ਉਹ ਅਮਰੀਕੀ ਸਰਕਾਰਾਂ ਵਿੱਚ ਅਹਿਮ ਅਹੁਦੇ ਹਢਾਉਣ ਅਤੇ ਰਾਸ਼ਟਰਪਤੀ ਬਿੱਲ ਕਲਿੰਟਨ ਅਧੀਨ ਸੰਨ 1997 ਤੋਂ 2001 ਤਕ ਸਕੱਤਰ ਪਦ ’ਤੇ ਰਹਿਣ ਵਾਲਾ ਵਿਅਕਤੀ ਸੀ। ਪ੍ਰਾਇਮਰੀ ਚੋਣਾਂ ਹਾਰਨ ਬਾਅਦ ਉਸਨੇ ਟਰੰਪ ਅਤੇ ਧਨਾਢ ਪਿੱਠੂਆਂ ਦੀ ਹਿਮਾਇਤ ਨਾਲ ਅਜ਼ਾਦ ਉਮੀਦਵਾਰ ਵਜੋਂ ਕੁੱਦਣ ਦਾ ਫੈਸਲਾ ਕੀਤਾ ਸੀ।
ਰਿਪਬਲਿਕਨ ਪਾਰਟੀ ਦਾ ਆਫੀਸ਼ੀਅਲ ਉਮੀਦਵਾਰ ਕੁਰਟਿਸ ਸਲੀਵਾ ਸੀ। ਪਰ ਪਾਰਟੀ ਨੇ ਹਿਮਾਇਤ ਚੋਣ ਮੁਹਿੰਮ ਦੌਰਾਨ ਕੂਮੋ ਦੀ ਜਾਰੀ ਰੱਖੀ। ਪਾਰਟੀ ਅਨੁਸ਼ਾਸਨ ਛਿੱਕੇ ’ਤੇ ਟੰਗਦਿਆਂ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਖ਼ੁਦ ਕੂਮੋ ਦੀ ਹਿਮਾਇਤ ਦਾ ਐਲਾਨ 3 ਨਵੰਬਰ, 2025 ਨੂੰ ਕਰ ਦਿੱਤਾ। ਉਸਨੇ ਵੋਟਰਾਂ ਨੂੰ ਅਪੀਲ ਕੀਤੀ ਕਿ ਕੂਮੋ ਨੂੰ ਵੋਟ ਪਾਉ, ਉਹ ਵਧੀਆ ਉਮੀਦਵਾਰ, ਯੋਗ ਵਿਅਕਤੀ ਹੈ ਜੋ ਵਧੀਆ ਕੰਮ ਕਰੇਗਾ। ਮਮਦਾਨੀ ਯੋਗ ਉਮੀਦਵਾਰ ਨਹੀਂ। ਉਸਨੇ ਨਿਊਯਾਰਕ ਵਾਸੀਆਂ ਨੂੰ ਧਮਕੀ ਦਿੱਤੀ ਕਿ ਜੇਕਰ ਉਨ੍ਹਾਂ ਮਮਦਾਨੀ ਨੂੰ ਮੇਅਰ ਚੁਣਿਆ ਤਾਂ ਉਹ ਮਹਾਂਨਗਰ ਦੇ ਫੰਡ ਰੋਕ ਦੇਵੇਗਾ। ਨੈਸ਼ਨਲ ਗਾਰਡ ਤਾਇਨਾਤ ਕਰ ਦੇਵੇਗਾ। ਖ਼ਰਬਪਤੀ ਐਲਨ ਮਸਕ ਨੇ ਵੀ ਨਿਊਯਾਰਕ ਵੋਟਰਾਂ ਨੂੰ ਕੂਮੋ ਦੀ ਹਿਮਾਇਤ ਕਰਨ ਦੀ ਅਪੀਲ ਕੀਤੀ। ਨਿਊਯਾਰਕ ਦੇ ਸੈਨੇਟਰ ਚੱਕ ਸ਼ੁਮਰ ਅਤੇ ਸੈਨੇਟਰ ਗਿਲੀਬ੍ਰਾਂਡ ਨੇ ਵੀ ਮਮਦਾਨੀ ਦਾ ਵਿਰੋਧ ਕੀਤਾ।
ਲੇਕਿਨ ਅਗਾਂਹ ਵਧੂ ਖੱਬੇ ਪੱਖੀ ਵਰਮੌਂਟ ਤੋਂ ਸੈਨੇਟਰ ਬਰਨੀ ਸੈਂਡਰਜ਼ ਅਤੇ ਨਿਊਯਾਰਕ ਕਾਂਗਰਸਮੈਨ ਅਲੈਗਜ਼ੈਂਡਰੀਆ ਓਕਾਸੀਓ ਕੋਰਟੇਜ਼ ਹਰ ਮਹਾਜ਼ ’ਤੇ ਮਮਦਾਨੀ ਦੀ ਪਿੱਠ ’ਤੇ ਰਹੇ। ਨਿਊਯਾਰਕ ਦੇ ਹਰਮਨ ਪਿਆਰੇ ਆਗੂ ਜੇਰੀ ਨਾਦਲਰ ਅਤੇ ਅਟਾਰਨੀ ਲਟੀਟੀਆ ਜੇਮਜ਼ ਨੇ ਵੀ ਉਸਦੀ ਡਟ ਕੇ ਹਿਮਾਇਤ ਕੀਤੀ। ਚੋਣ ਨੇੜੇ ਆਉਣ ’ਤੇ ਅਮਰੀਕੀ ਕਾਂਗਰਸ ਦੇ ਘੱਟ ਗਿਣਤੀ ਆਗੂ ਹਕੀਮ ਜੈਫਰੀਜ਼ ਨੇ ਵੀ ਉਸਦੀ ਹਿਮਾਇਤ ਦਾ ਐਲਾਨ ਕਰ ਦਿੱਤਾ।
ਸ਼ੁਰੂ ਵਿੱਚ ਉਸ ਸਮੇਂ ਦੇ ਮੇਅਰ ਏਰਕ ਐਡਮਜ਼ ਨੇ ਵੀ ਅਜ਼ਾਦ ਉਮੀਦਵਾਰ ਵਜੋਂ ਚੋਣ ਮੈਦਾਨ ਵਿੱਚ ਉੱਤਰਨ ਦਾ ਐਲਾਨ ਕੀਤਾ ਸੀ ਪਰ ਹਿਮਾਇਤ ਨਾ ਮਿਲਦੀ ਦੇਖ ਕੇ ਸਤੰਬਰ, 2025 ਵਿੱਚ ਕਿਨਾਰਾ ਕਰ ਲਿਆ।
ਮੁੱਦੇ: ਨਿਊਯਾਰਕ ਸ਼ਹਿਰ ਇੱਕ ਚੱਕਾਚੌਂਧ ਭਰਿਆ ਮਹਿੰਗਾ ਸ਼ਹਿਰ ਹੈ। ਆਮ ਨਿਵਾਸੀਆਂ ਲਈ ਮਕਾਨਾਂ, ਫਲੈਟਾਂ ਜਾਂ ਕਮਰਿਆਂ ਦਾ ਕਿਰਾਇਆ ਦੇਣਾ ਮੁਹਾਲ ਹੈ। ਘਰ ਖਰੀਦਣਾ ਸੰਭਵ ਨਹੀਂ, ਕੀਮਤਾਂ ਪਹੁੰਚ ਤੋਂ ਬਾਹਰ ਹੋਣ ਕਰਕੇ। ਅਮਨ-ਕਾਨੂੰਨ ਦੀ ਸਥਿਤੀ ਚਿੰਤਾਜਨਕ ਬਣੀ ਰਹਿੰਦੀ ਹੈ। ਨਸ਼ੀਲੇ ਪਦਾਰਥਾਂ, ਦਵਾਈਆਂ ਅਤੇ ਹੋਰ ਵਸਤੂਆਂ ਦੀ ਤਸਕਰੀ ਬਾਦਸਤੂਰ ਚੁਣੌਤੀ ਬਣੀ ਹੋਈ ਹੈ। ਨੌਜਵਾਨਾਂ ਲਈ ਰੋਜ਼ਗਾਰ ਅਤੇ ਘੱਟ ਉਜਰਤ ਸਮੱਸਿਆਵਾਂ ਹਨ।
ਮਮਦਾਨੀ ਨੇ ਨਗਰ ਨਿਗਮ ਵਾਸੀਆਂ ਨੂੰ ਭਰੋਸਾ ਦਿੱਤਾ ਕਿ ਕਿਰਾਇਆ ਸਿਸਟਮ ਅਤੇ ਮਕਾਨ ਖਰੀਦ ਆਮ ਲੋਕਾਂ ਦੀ ਪਹੁੰਚ ਵਾਲੇ ਬਣਾਏ ਜਾਣਗੇ। ਕਿਰਤੀ ਦੀ ਘੱਟੋ-ਘੱਟ ਉਜਰਤ 30 ਡਾਲਰ ਰੋਜ਼ਾਨਾ ਕੀਤੀ ਜਾਏਗੀ। ਅਪਰਾਧੀਆਂ, ਤਸਕਰਾਂ, ਧੋਖੇਬਾਜ਼ਾਂ ਨਾਲ ਕਰੜੇ ਹੱਥੀਂ ਨਿਪਟਿਆ ਜਾਵੇਗਾ। ਅਮੀਰ ਲੋਕਾਂ ’ਤੇ ਟੈਕਸ ਠੋਕਿਆ ਜਾਵੇਗਾ। ਨਿਊਯਾਰਕ ਸਸਤਾ ਅਤੇ ਸੁਰੱਖਿਅਤ ਮਹਾਂਨਗਰ ਸਥਾਪਿਤ ਕੀਤਾ ਜਾਵੇਗਾ। ਬੱਸ ਸੇਵਾ ਮੁਫਤ ਕੀਤੀ ਜਾਵੇਗੀ।
ਆਲੋਚਨਾ: ਮਮਦਾਨੀ ਦੇ ਸਮਾਜਵਾਦੀ ਵਿਚਾਰ, ਗਾਜ਼ਾ ਪੱਟੀ ਅੰਦਰ ਹਮਸ ਦੀ ਨਸਲਕੁਸ਼ੀ, ਇਸਲਾਮੋਫੋਬੀਆ, ਨਸਲਵਾਦ ਦਾ ਵਿਰੋਧ, ਕੱਟੜਵਾਦੀ ਯਹੂਦੀਆਂ ਦੀ ਆਲੋਚਨਾ, ਵਿਸ਼ਵ ਦੇ ਨਸਲਕੁਸ਼ੀ ਅਪਰਾਧੀ ਇਸਰਾਈਲੀ ਪ੍ਰਧਾਨ ਮੰਤਰੀ ਬੈਂਜੀਮਿਨ ਨੇਤਨਯਾਹੂ ਨੂੰ ਨਿਊਯਾਰਕ ਆਉਣ ’ਤੇ ਗ੍ਰਿਫਤਾਰ ਕਰਨ ਦਾ ਐਲਾਨ ਅਮਰੀਕੀ ਰਾਸ਼ਟਰਪਤੀ ਨੂੰ ਸੂਲਾਂ ਵਾਂਗ ਚੁੱਭਦੇ ਸਨ। ਉਹ ਅਤੇ ਉਸਦੇ ਪਿੱਠੂ ਉਸ ਨੂੰ ‘ਜਿਹਾਦੀ’, ਅੱਤਵਾਦੀ, ਕਮਿਊਨਿਸਟ ਕਹਿ ਕੇ ਬਦਨਾਮ ਕਰ ਰਹੇ ਸਨ। ਉਸਦੀ ਜਿੱਤ ਕਰਕੇ ਅਮਰੀਕਾ ਵਿੱਚ ਮੁੜ 9/11 ਹਮਲਿਆਂ ਨੂੰ ਸੱਦਾ ਦੇਣਾ ਐਲਾਨ ਰਹੇ ਸਨ। ਉਸ ਨੂੰ ਮੁਸਲਿਮ ਕੱਟੜਵਾਦੀ ਕਰਾਰ ਦੇ ਰਹੇ ਸਨ। ਉਸਦੀ ਈਰਾਨੀ ਮੂਲ ਦੀ ਪਤਨੀ ਨੂੰ ਨਹੀਂ ਬਖਸ਼ਿਆ।
ਜਿੱਤ ਦਾ ਰਾਜ਼: ਮਮਦਾਨੀ ਨੇ ਆਪਣੀ ਚੋਣ ਲਈ ਵਿਚਾਰਧਾਰਕ ਵਲੰਟੀਅਰ ਫ਼ੌਜ ਤਿਆਰ ਕੀਤੀ। ਲੋਕ ਪੱਖੀ ਹੱਥ ਲਿਖਤ ਬੈਨਰ ਥਾਂ-ਥਾਂ ਲਾਏ। ਹਰ ਘਰ ਦਾ ਦਰਵਾਜ਼ਾ ਖੜਕਾ ਕੇ ਲੋਕਸ਼ਾਹੀ ਅਤੇ ਰਾਜਨੀਤਕ ਤਬਦੀਲੀ ਦੀ ਅਲਖ ਜਗਾਈ। ਯਹੂਦੀ ਮਾਨਵਵਾਦੀ ਲੋਕਾਂ ਨਾਲ ਤਾਲਮੇਲ ਕਾਇਮ ਕੀਤਾ। ਆਰਥਿਕ, ਸਮਾਜਿਕ, ਧਾਰਮਿਕ ਨਾ-ਬਰਾਬਰੀ ਅਤੇ ਨਫਰਤ ਵਿਰੁੱਧ ਅਵਾਜ਼ ਬੁਲੰਦ ਕੀਤੀ ਅਤੇ ਇਸਦੇ ਖਾਤਮੇ ਦੀ ਯੋਜਨਾ ਬਣਾਈ। ਮੁਸਲਿਮ ਹੋਣਾ ਕਬੂਲ ਕਰਕੇ ਸਰਬ ਸਾਂਝੀਵਾਲਤਾ ਦੀ ਅਲਖ ਜਗਾਈ। ਜਿੱਤ ਤੋਂ ਬਾਅਦ ਸਭ ਤੋਂ ਪਹਿਲਾਂ ਕੇਸਕੀ ਸਜ਼ਾ ਕੇ ਉਹ ਗੁਰਦੁਆਰਾ ਸਾਹਿਬ ਸ਼ਰਧਾ ਪੂਰਵਕ ਨਤਮਸਤਕ ਹੋਇਆ। ਇਤਿਹਾਸ ਵਿੱਚ ਪਹਿਲੀ ਵਾਰ 20 ਲੱਖ ਨਿਊਯਾਰਕ ਵੋਟਰ ਹੁੰਮ-ਹੁਮਾ ਕੇ ਵੋਟ ਪਾਉਣ ਪੁੱਜੇ।
ਮਮਦਾਨੀ ਨੇ 1036051 ਭਾਵ 50.3%, ਐਂਡਰਿਊ ਕੂਮੋਨੇ 854995 ਭਾਵ 41.6%, ਕਰਟਿਸ ਸਲੀਵਾ ਨੇ 146137 ਭਾਵ 7.1% ਵੋਟਾਂ ਪ੍ਰਾਪਤ ਕੀਤੀਆਂ। ਉਸਨੇ ਵਿਰੋਧੀਆਂ ਨੂੰ ਕਰਾਰੀ ਹਾਰ ਦਿੱਤੀ। ਪਹਿਲੀ ਜਨਵਰੀ, 2026 ਨੂੰ ਮਮਦਾਨੀ ਮੇਅਰ ਦਾ ਪਦ ਗ੍ਰਹਿਣ ਕਰਨਗੇ।
ਖ਼ਤਰੇ ਦੀ ਘੰਟੀ: ਡੌਨਲਡ ਟਰੰਪ ਦੀ ਚੋਣ ਬਾਅਦ ਇਹ ਪਹਿਲੀਆਂ ਅਹਿਮ ਚੋਣਾਂ ਸਨ। ਨਿਊਯਾਰਕ ਇਲਾਵਾ ਡੈਮੋਕ੍ਰੈਟਿਕ ਉਮੀਦਵਾਰਾ ਮਿੱਕੀ ਸ਼ੈਰਿਲ ਨੇ ਨਿਊਜਰਸੀ, ਅਬੀਗੇਲ ਸਪੈਨਬਰਜਰ ਨੇ ਵਰਜੀਨੀਆ ਦੇ ਗਵਰਨਰਾਂ ਵਜੋਂ ਜਿੱਤ ਹਾਸਲ ਕੀਤੀ। ਪੈਨਸਲਵੇਨੀਆ ਵਿੱਚ ਡੈਮੋਕ੍ਰੈਟਾਂ ਨੇ ਤਿੰਨ ਸੁਪਰੀਮ ਕੋਰਟ ਸੀਟਾਂ ਹਾਸਲ ਕੀਤੀਆਂ। ਵਰਜੀਨੀਆ ਵਿਧਾਨ ਸਭਾ ਵਿੱਚ 13 ਸੀਟਾਂ ’ਤੇ ਜਿੱਤ ਪ੍ਰਾਪਤ ਕੀਤੀ। ਇਸ ਰਾਜ ਦੀ ਉਪ ਮੇਅਰ ਭਾਰਤੀ ਮੂਲ ਦੀ ਗਜ਼ਾਲਾ ਹਾਸ਼ਮੀ, ਸਿਨਸਿਨਾਟੀ (ਓਹੀਓ ਪ੍ਰਾਂਤ) ਮੇਅਰ ਦੀ ਸੀਟ ਪੰਜਾਬੀ ਮੂਲ ਦੇ ਆਫਤਾਬ ਪੁਰੇਵਾਲ ਨੇ ਡੈਮੋਕ੍ਰੈਟ ਉਮੀਦਵਾਰ ਵਜੋਂ ਉਪ ਰਾਸ਼ਟਰਪਤੀ ਜੇ.ਡੀ. ਵਾਂਸ ਦੇ ਮਤੇਏ ਭਰਾ ਕੋਰੀ ਬੋਵਮੈਨ ਨੂੰ ਚਿੱਤ ਕਰਕੇ ਜਿੱਤੀ। ਨੌਰਵਿਚ (ਕੁਨੈਟੀਕਟ) ਵਿਖੇ ਪੰਜਾਬੀ ਮੂਲ ਦੇ ਨਵੰਬਰ 1984 ਦਿੱਲੀ ਸਿੱਖ ਨਸਲਕੁਸ਼ੀ ਕਰਕੇ ਉੱਜੜੇ ਪਰਿਵਾਰ ਦੇ ਪੂਰਨ ਗੁਰਸਿੱਖ ਨੌਜਵਾਨ ਸਵਰਨਜੀਤ ਸਿੰਘ ਖਾਲਸਾ ਡੈਮੋਕ੍ਰੈਟਿਕ ਮੇਅਰ ਚੁਣੇ ਗਏ।
ਟਰੰਪ ਲਈ ਇਹ ਖ਼ਤਰੇ ਦੀ ਘੰਟੀ ਹੈ। ਅਗਲੇ ਸਾਲ ਮੱਧਕਾਲੀ ਚੋਣਾਂ ਤੋਂ ਪਹਿਲਾਂ ਇਹ ਕੌੜਾ ਧਮਾਕੇਦਾਰ ਟ੍ਰੇਲਰ ਹੈ। ਦਰਅਸਲ ਅਮਰੀਕਾ ਦੇ 50 ਰਾਜਾਂ ਦੇ 34 ਕਰੋੜ ਲੋਕ ਉਸਦੀ ਡਿਕਟੇਟਰਸ਼ਿੱਪ, ਅਰਧ ਪਾਗਲਾਨਾ ਹਰਕਤਾਂ, ਟੈਰਿਫ ਟੈਰਰ, ਗੁਆਂਢੀ ਦੇਸ਼ਾਂ ਕੈਨੇਡਾ ਅਤੇ ਮੈਕਸੀਕੋ ਨਾਲ ਹੀ ਨਹੀਂ ਬਲਕਿ ਥਾਂ-ਥਾਂ ਆਢਾ ਲਾਉਣ ਕਰਕੇ ਤੰਗ ਆ ਚੁੱਕੇ ਹਨ। ਇੰਜ ਪ੍ਰਤੀਤ ਹੁੰਦਾ ਹੈ ਜਿਵੇਂ ਸੰਨ 2028 ਵਿੱਚ ਵਾਈਟ ਹਾਊਸ ਵਿੱਚ ਤਬਦੀਲੀ ਦੇ ਨਵੇਂ ਅਧਿਆਇ ਦੀ ਸ਼ੁਰੂਆਤ ਹੋ ਗਈ ਹੋਵੇ।
* * * * *
ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
ਪਾਠਕਾਂ ਨਾਲ ਆਪਣੇ ਵਿਚਾਰ ਸਾਂਝੇ ਕਰਨ ਲਈ ਸਰੋਕਾਰ ਨਾਲ ਸੰਪਰਕ ਕਰੋ: (