DarshanSRiar7ਨਵਾਂ ਸਾਲ ਫਿਰ ਲੋਕ ਸਭਾ ਦੀਆਂ ਚੋਣਾਂ ਨਾਲ ਚੋਣਾਂ ਦਾ ਸਾਲ ਬਣ ਕੇ ...
(31 ਦਸੰਬਰ 2018)

 

ਪਹਿਲੀ ਜਨਵਰੀ 2018 ਨੂੰ ਬੜੇ ਜੋਸ਼ੋ ਖਰੋਸ਼ ਨਾਲ ਸ਼ੁਰੂ ਹੋਇਆ ਸਾਲ ਆਪਣੀ ਅਉਧ ਹੰਡਾ ਕੇ ਇਤਿਹਾਸ ਦਾ ਹਿੱਸਾ ਬਣਨ ਜਾ ਰਿਹਾ ਹੈ ਅਤੇ ਉਸਦੀ ਖਾਲੀ ਕੀਤੀ ਥਾਂ ਭਰਨ ਲਈ 2019 ਪੂਰੇ ਚਾਵਾਂ ਨਾਲ ਆਪਣੀ ਮੰਜ਼ਿਲ ਸਰ ਕਰਨ ਲਈ ਅੱਗੇ ਵਧ ਰਿਹਾ ਹੈਇਹ ਕੁਦਰਤ ਦਾ ਅਸੂਲ ਹੈ ਕਿ ਇੱਥੇ ਜੋ ਵੀ ਆਉਂਦਾ ਹੈ, ਉਸਨੂੰ ਇੱਕ ਦਿਨ ਜਾਣਾ ਹੀ ਪੈਂਦਾ ਹੈਪਸ਼ੂ ਪੰਛੀ, ਜੀਵ ਪੌਦੇ ਤੇ ਮਨੁੱਖ, ਜੋ ਵੀ ਕੁਛ ਇਸ ਬ੍ਰਹਿਮੰਡ ਵਿੱਚ ਹੈ ਸਭ ਦਾ ਇਹੀ ਦਸਤੂਰ ਹੈਹਰ ਸਾਲ ਦਾ ਆਪਣਾ ਆਪਣਾ ਵਜੂਦ ਹੁੰਦਾ ਹੈ ਤੇ ਉਸ ਵਿੱਚ ਵੱਖ ਵੱਖ ਘਟਨਾਵਾਂ ਵਾਪਰਦੀਆਂ ਹਨਕੁਦਰਤੀ ਘਟਨਾਵਾਂ ਤੋਂ ਬਿਨਾਂ ਰਾਜਨੀਤਕ, ਸਮਾਜਿਕ ਤੇ ਧਾਰਮਿਕ ਘਟਨਾਵਾਂ ਅਕਸਰ ਮਨੁੱਖੀ ਕਾਰ ਵਿਹਾਰ ਤੋਂ ਪ੍ਰਭਾਵਤ ਹੁੰਦੀਆਂ ਹਨਮਨੁੱਖ ਕਿਉਂਕਿ ਸਮਾਜਿਕ ਜੀਵ ਹੈ ਜਿਸ ਨੂੰ ਮਨੁੱਖੀ ਮਨ ਦੇ ਲਾਲਚਾਂ ਤੇ ਲੋੜਾਂ ਨਾਲ ਵੀ ਦੋ ਚਾਰ ਹੋਣਾ ਪੈਂਦਾ ਹੈ, ਇਸ ਲਈ ਥੋੜ੍ਹੀ ਬਹੁਤੀ ਵਾਧ ਘਾਟ ਵੀ ਹੋ ਜਾਂਦੀ ਹੈਮਨੁੱਖ ਗਲਤੀਆਂ ਦਾ ਪੁਤਲਾ ਹੋਣ ਦਾ ਭਰਮ ਪਾਲ ਕੇ ਅਕਸਰ ਇਨ੍ਹਾਂ ਊਣਤਾਈਆਂ ਤੋਂ ਸੁਰਖਰੂ ਹੋਣ ਦਾ ਯਤਨ ਕਰਦਾ ਹੈਪਰ ਜਦੋਂ ਗਲਤੀਆਂ ਉਹਨੇ ਜਾਣ ਬੁੱਝ ਕੇ ਕਿਸੇ ਸਵਾਰਥ ਜਾਂ ਲਾਲਚ ਅਨੂਸਾਰ ਕੀਤੀਆਂ ਹੋਣ, ਉਦੋਂ ਮੁਆਫੀ ਵਾਲਾ ਬਹਾਨਾ ਲੋਕਾਂ ਦੇ ਗਲੋਂ ਨਹੀਂ ਉੱਤਰਦਾ

ਪਹਿਲੇ ਸਾਲਾਂ ਵਾਂਗ ਹੀ ਇਸ ਸਾਲ ਦੇ ਕੰਮਾਂ ਅਤੇ ਘਟਨਾਵਾਂ ਦੀ ਸੂਚੀ ਵੀ ਲੰਬੀ ਤੇ ਖੁਸ਼ੀਆਂ ਤੇ ਗਮੀਆਂ ਭਰਪੂਰ ਹੈਆਰਥਿਕ ਪਾੜੇ ਦਾ ਗਰਾਫ ਲਗਾਤਾਰ ਵਧਦਾ ਹੀ ਜਾ ਰਿਹਾ ਹੈਰੁਜ਼ਗਾਰ ਦੇ ਸਾਧਨਾਂ ਦੀ ਕਮੀ, ਵਾਤਾਵਰਣ ਦਾ ਵਧਦਾ ਪ੍ਰਦੂਸ਼ਣ, ਅਨੂਸ਼ਾਸਨ ਦੀ ਅਣਹੋਂਦ, ਭ੍ਰਿਸ਼ਟਾਚਾਰ ਦਾ ਵਾਧਾ, ਗਰੀਬੀ ਤੇ ਅਨਪੜ੍ਹਤਾ, ਨਿਰੰਤਰ ਵਧਦੀਆਂ ਬੀਮਾਰੀਆਂ ਤੇ ਨਿੱਘਰਦੀਆਂ ਸਿਹਤ ਸਹੂਲਤਾਂ ਭਾਵੇਂ ਸਾਰੀਆਂ ਹੀ ਰਾਜਨੀਤਕ ਪਾਰਟੀਆਂ ਦੇ ਚੋਣ ਮਨੋਰਥ ਪੱਤਰਾਂ ਦਾ ਮੁੱਖ ਹਿੱਸਾ ਹੁੰਦੀਆਂ ਹਨ ਪਰ ਤਾਕਤ ਦਾ ਸਿੰਘਾਸਨ ਮਿਲਦਿਆਂ ਹੀ ਇਹ ਸਭ ਉਹਨਾਂ ਦੇ ਚੇਤੇ ਵਿੱਚੋਂ ਮਨਫੀ ਹੋ ਜਾਂਦਾ ਹੈਸਾਲ 2014 ਵਿਚ ਕੇਂਦਰ ਵਿਚ ਨਰਿੰਦਰ ਮੋਦੀ ਜੀ ਦੀ ਪ੍ਰਧਾਨਗੀ ਵਿੱਚ ਬਣੀ ਭਾਜਪਾ ਸਰਕਾਰ ਦੇ ਅੱਛੇ ਦਿਨਾਂ ਦਾ ਇੰਤਜ਼ਾਰ ਇਸ ਸਾਲ ਵਿੱਚ ਵੀ ਲੋਕਾਂ ਲਈ ਮ੍ਰਿਗ ਤ੍ਰਿਸ਼ਨਾ ਹੀ ਬਣਿਆ ਰਿਹਾਸਗੋਂ ਡੀਜ਼ਲ ਤੇ ਪੈਟਰੋਲ ਦੇ ਵਧਦੇ ਮੁੱਲ ਨੇ ਲੋਕਾਂ ਦੀ ਭੂਤਨੀ ਹੀ ਭੁਲਾ ਛੱਡੀਦੇਸ਼ ਭਰ ਵਿੱਚ ਕਿਸਾਨ ਖੁਦਕੁਸ਼ੀਆਂ ਤੇ ਕਰਜ਼ੇ ਦੇ ਬੋਝ ਦਾ ਰੌਲਾ ਗੌਲਾ ਨਿਰੰਤਰ ਜਾਰੀ ਰਿਹਾਚਾਰ ਸਾਲਾਂ ਤੋਂ ਵੀ ਵੱਧ ਸਮੇਂ ਤੋਂ ਹਾਰਾਂ ਨਾਲ ਗ੍ਰਸਤ ਕਾਂਗਰਸ ਪਾਰਟੀ ਲਈ ਇਹ ਸਾਲ ਵੱਡੀ ਰਾਹਤ ਲੈ ਕੇ ਆਇਆਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਭਾਵੇਂ ਲਗਾਤਾਰ ਕਾਂਗਰਸ ਮੁਕਤ ਭਾਰਤ ਦੇ ਸੋਹਿਲੇ ਗਾ ਰਹੇ ਸਨ ਪਰ ਇਸ ਸਾਲ ਨੇ ਪਹਿਲਾਂ ਕਰਨਾਟਕ ਵਿੱਚ ਤੇ ਹੁਣ ਆਖਰੀ ਮਹੀਨੇ ਮੱਧ ਪ੍ਰਦੇਸ਼, ਛਤੀਸ਼ਗੜ੍ਹ ਤੇ ਰਾਜਸਥਾਨ ਵਿੱਚ ਕਾਂਗਰਸ ਦੀਆਂ ਸਰਕਾਰਾਂ ਬਣਾ ਕੇ ਭਾਜਪਾ ਨੂੰ ਤਕੜਾ ਝਟਕਾ ਦਿੱਤਾ ਹੈਲੋਕਰਾਜ ਦੀ ਇਹ ਵਿਡੰਬਨਾ ਹੈ ਕਿ ਚਾਹੇ ਦੇਰ ਨਾਲ ਹੀ ਸਹੀ ਇਹ ਲੋਕਾਂ ਨੂੰ ਅਸਲੀਅਤ ਤੋਂ ਜਾਣੂ ਕਰਵਾ ਹੀ ਦਿੰਦਾ ਹੈ

ਉਂਜ ਸਾਡੇ ਦੇਸ਼ ਦੇ ਸਿਆਸੀ ਧਨੰਤਰ ਅਜੀਬ ਜਿਹੀ ਸੋਚ ਦੇ ਧਾਰਨੀ ਬਣਦੇ ਜਾ ਰਹੇ ਹਨਉਹਨਾਂ ਨੇ ਇਹ ਸੋਚਣਾ ਸ਼ੁਰੂ ਕਰ ਦਿੱਤਾ ਸੀ ਕਿ ਲੋਕ ਤਾਂ ਬੁੱਧੂ ਹਨ, ਇਨ੍ਹਾਂ ਨੂੰ ਜਿਵੇਂ ਚਾਹੋ ਮੂਰਖ ਬਣਾਇਆ ਜਾ ਸਕਦਾ ਹੈਅਸਲ ਵਿੱਚ ਇਨ੍ਹਾਂ ਲੋਕਾਂ ਨੇ ਤਾਂ ਲੋਕਤੰਤਰ ਦੀ ਪ੍ਰੀਭਾਸ਼ਾ ਹੀ ਤੋੜਨੀ ਮਰੋੜਨੀ ਸ਼ੁਰੂ ਕਰ ਦਿੱਤੀ ਸੀਲੋਕ ਤਾਂ ਹੁਣ ਕੇਵਲ ਵੋਟਾਂ ਪਾ ਕੇ ਸਰਕਾਰ ਚੁਣਨ ਵਾਲੇ ਹੀ ਰਹਿ ਗਏ ਸਨ‘ਲੋਕਾਂ ਲਈ ਤੇ ਲੋਕਾਂ ਦੀ ਸਰਕਾਰ’ ਤਾਂ ਉਹਨਾਂ ਲਈ ਸੁਪਨਾ ਹੀ ਬਣਦੀ ਜਾ ਰਹੀ ਸੀਰਾਜਨੀਤਕ ਨੇਤਾਵਾਂ ਨੇ ਲੋਕਾਂ ਨੂੰ ਮੁਫਤ ਦਾ ਲਾਲਚ ਦੇ ਕੇ ਉਹਨਾਂ ਦੀ ਅਜ਼ਾਦ ਸੋਚ ਨੂੰ ਹੀ ਘੁਣ ਲਗਾ ਦਿੱਤਾ ਹੈ ਤੇ ਰਾਜਨੀਤਕ ਲੀਡਰਾਂ ਵੱਲ ਵੇਖਣਾ ਤੇ ਉਹਨਾਂ ’ਤੇ ਨਿਰਭਰ ਕਰਨਾ ਉਹਨਾਂ ਦੀ ਸੋਚ ਦਾ ਹਿੱਸਾ ਬਣ ਗਿਆ ਹੈਇਹ ਸੋਚ ਲੋਕਤੰਤਰ ਲਈ ਖਤਰੇ ਦੀ ਘੰਟੀ ਹੈ

ਸਾਲ 2018 ਦੌਰਾਨ ਪੰਜਾਬ, ਦੇਸ਼ ਅਤੇ ਵਿਸ਼ਵ ਭਰ ਵਿੱਚ ਬੜੀਆਂ ਅਹਿਮ ਘਟਨਾਵਾਂ ਵਾਪਰੀਆਂ ਸਨਵਿਸ਼ਵ ਦੀ ਗੱਲ ਕਰੀਏ ਤਾਂ ਉੱਤਰੀ ਕੋਰੀਆ ਦੇ ਰਾਸ਼ਟਰਪਤੀ ਅਤੇ ਅਮਰੀਕਾ ਦੇ ਰਾਸ਼ਟਰਪਤੀ ਦਰਮਿਆਨ ਸ਼ਬਦਾਂ ਦੀ ਤਿੱਖੀ ਜੰਗ ਨੇ ਲੋਕਾਂ ਨੂੰ ਭੈਭੀਤ ਕਰ ਦਿੱਤਾ ਸੀਇੱਕ ਵੇਲਾ ਤਾਂ ਅਜਿਹਾ ਆ ਗਿਆ ਲਗਦਾ ਸੀ ਕਿ ਜੰਗ ਛਿੜੀ ਕਿ ਛਿੜੀ ਪਰ ਹੋਲੀ ਹੌਲੀ ਇਹ ਮੁਸੀਬਤ ਟਲ ਹੀ ਗਈਆਈ ਐੱਸ ਆਈ ਐੱਸ ਵਰਗੀਆਂ ਹੋਰ ਅਤਿਵਾਦੀ ਜਥੇਬੰਦੀਆਂ ਦੀਆਂ ਮਨੁੱਖਤਾ ਵਿਰੋਧੀ ਕਾਰਵਾਈਆਂ ਤਾਂ ਨਿਰੰਤਰ ਚੱਲਦੀਆਂ ਹੀ ਰਹਿੰਦੀਆਂ ਨੇਏਸੇ ਤਰਾ੍ਹ ਲੱਖ ਯਤਨਾਂ ਦੇ ਬਾਵਜੂਦ ਭਾਰਤ ਪਾਕਿਸਤਾਨ ਦੇ ਬਾਰਡਰ ’ਤੇ ਵੀ ਸ਼ਾਂਤੀ ਕਾਇਮ ਨਹੀਂ ਹੋ ਸਕੀ, ਜੋ ਚਿੰਤਾ ਦਾ ਵਿਸ਼ਾ ਹੈਪਰ ਹਿੰਦ ਪਾਕਿ ਦਰਮਿਆਨ ਇਸ ਸਾਲ ਇੱਕ ਗੱਲ ਜਰੂਰ ਚੰਗੀ ਵਾਪਰੀ ਹੈ ਕਿ ਦੋਹਾਂ ਦੇਸ਼ਾਂ ਨੇ ਸਰਹੱਦ ’ਤੇ ਕਰਤਾਰਪੁਰ ਦਾ ਲਾਂਘਾ ਖੋਲ੍ਹਣ ਲਈ ਸਾਰਥਿਕ ਕਦਮ ਚੁੱਕੇ ਹਨ ਤੇ ਨੀਂਹ ਪੱਥਰ ਵੀ ਰੱਖ ਦਿੱਤਾ ਹੈਭਾਂਵੇ ਕਿ ਹਾਲੇ ਵੀ ਕਈ ਬੇਵਿਸ਼ਵਾਸ਼ੀ ਵਾਲੇ ਬਿਆਨ ਦੋਹਾਂ ਪਾਸਿਆਂ ਤੋਂ ਹੀ ਗਾਹੇ ਬਗਾਹੇ ਆਉਂਦੇ ਰਹਿੰਦੇ ਹਨ, ਜਿਨ੍ਹਾਂ ਨਾਲ ਇਸ ਲਾਂਘੇ ਦਾ ਮਸਲਾ ਫਿਰ ਤਾਰਪੀਡੋ ਹੋਣ ਦਾ ਡਰ ਬਣ ਜਾਂਦਾ ਹੈਆਸ ਕਰਨੀ ਬਣਦੀ ਹੈ ਕਿ ਜਗਤ ਗੁਰੂ ਬਾਬਾ ਨਾਨਕ ਦੇਵ ਜੀ ਦੇ 550ਵੇਂ ਜਨਮ ਦਿਨ ਦੇ ਮੁਬਾਰਕ ਮੌਕੇ ਇਹ ਲਾਂਘਾ ਮਨੁੱਖਤਾ ਲਈ ਸਕੂਨ ਲੈ ਕਿ ਆਵੇਜੇ ਇਹ ਉਦਮ ਸਿਰੇ ਚੜ੍ਹ ਜਾਂਦਾ ਹੈ ਤਾਂ ਇਸ ਪਵਿੱਤਰ ਕੰਮ ਦਾ ਸਿਹਰਾ ਪਾਕਿ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੇ ਨਾਲ ਨਾਲ ਉਸ ਦੇ ਭਾਰਤੀ ਦੋਸਤ ਨਵਜੋਤ ਸਿੰਘ ਸਿੱਧੂ ਨੂੰ ਜਾਂਦਾ ਹੈ

ਅਸਹਿਣਸ਼ੀਲਤਾ ਦੀਆਂ ਖਬਰਾਂ ਗਾਹੇ ਬਗਾਹੇ ਭਾਰਤ ਦੇ ਕਿਸੇ ਨਾ ਕਿਸੇ ਕੋਨੇ ਤੋਂ ਆਉਂਦੀਆਂ ਹੀ ਰਹਿੰਦੀਆਂ ਹਨਪਹਿਲਾਂ ਆਮਿਰ ਖਾਨ ਦੇ ਬਿਆਨ ਨੇ ਤਰਥੱਲੀ ਮਚਾਈ ਸੀ, ਹੁਣ ਨਸੀਰੂਦੀਨ ਸ਼ਾਹ ਦੇ ਬਿਆਨ ਨੇ ਪਾਰਾ ਫਿਰ ਗਰਮਾ ਦਿੱਤਾ ਹੈਸਾਰੇ ਲੋਕ ਭਲੀਭਾਂਤ ਜਾਣਦੇ ਹਨ ਕਿ ਸਾਡੇ ਦੇਸ਼ ਦਾ ਮੁੱਖ ਕਰੈਕਟਰ ਵਿਭਿੰਨਤਾ ਵਿੱਚ ਏਕਤਾ ਹੈਧਰਮ, ਜਾਤੀਆਂ ਜਾਂ ਫਿਰਕੇ ਸਭ ਇਨਸਾਨੀਅਤ ਤੋਂ ਪਿੱਛੋਂ ਆਉਂਦੇ ਹਨਭਗਵਾਕਰਣ, ਹਿੰਦੂਤਵ ਜਾਂ ਫਿਰ ਦੇਵੀ ਦੇਵਤਿਆਂ ਨੂੰ ਜਾਤਾਂ-ਪਾਤਾਂ ਦੇ ਖਲਜਗਣ ਵਿੱਚ ਘਸੋੜਨਾ ਚੰਗੇ ਇਨਸਾਨਾਂ ਜਾਂ ਦਿਮਾਗਾਂ ਦੀ ਉਪਜ ਨਹੀਂ ਹੈਮਨੁੱਖਤਾ ਦਾ ਅਸਲ ਮਕਸਦ ਤਾਂ ਪ੍ਰੇਮ ਪਿਆਰ ਨਾਲ ਰਹਿਣਾ, ਜ਼ਿੰਦਗੀ ਬਸਰ ਕਰਨਾ ਤੇ ਭਾਈਚਾਰਾ ਵਧਾਉਣਾ ਹੈ ਨਾ ਕਿ ਇਸ ਵਿੱਚ ਵੰਡੀਆਂ ਪਾਉਣਾ? ਕੋਈ ਵੀ ਧਰਮ ਨਫਰਤ ਫੈਲਾਉਣ ਦੀ ਸਿੱਖਿਆ ਨਹੀਂ ਦਿੰਦਾਇਸ ਸਾਲ ਵਿੱਚ ਏਕਤਾ ਦੇ ਨਾਮ ’ਤੇ ਸਿਆਸੀ ਰੋਟੀਆਂ ਸੇਕਣ ਲਈ ਵਿਸ਼ਵ ਭਰ ਵਿੱਚ ਸੱਭ ਤੋਂ ਉੱਚਾ ਸਰਦਾਰ ਪਟੇਲ ਦਾ ਬੁੱਤ ਬਣਾ ਕੇ ਕਰੋੜਾਂ ਰੁਪਏ ਬੇਕਾਰ ਕਰ ਦਿੱਤੇ ਗਏ ਜਦੋਂ ਕਿ ਬੇਰੁਜ਼ਗਾਰੀ, ਗਰੀਬੀ ਅਨਪੜ੍ਹਤਾ ਤੇ ਭੁੱਖਮਰੀ ਹਾਲੇ ਸਾਡਾ ਸਭ ਦਾ ਮੂੰਹ ਚਿੜਾਉਂਦੇ ਹਨਅਜਿਹੇ ਬੁੱਤ ਉਦੋਂ ਸ਼ੋਭਾ ਦਿੰਦੇ ਹਨ ਜਦੋਂ ਮਨੁੱਖਤਾ ਨੂੰ ਦਰਪੇਸ਼ ਜ਼ਰੂਰੀ ਲੋੜਾਂ ਦੀ ਪੂਰਤੀ ਹੋ ਜਾਵੇ

ਰਾਜਨੀਤੀ ਪੜ੍ਹੇ ਲਿਖੇ ਯੋਗ ਵਿਅਕਤੀਆਂ ਦਾ ਖੇਤਰ ਹੈਪਰ ਸਾਡੇ ਦੇਸ਼ ਵਿੱਚ ਤਾਂ ਸੀਟਾਂ ਦੀ ਗਿਣਤੀ ਪੂਰੀ ਕਰਨ ਲਈ ਚੋਣ ਜਿੱਤਣ ਵਾਲੇ ਚਿਹਰੇ ਲੱਭੇ ਜਾਂਦੇ ਹਨ, ਚਾਹੇ ਉਹ ਅਨਪੜ੍ਹ ਹੋਣ, ਸਾਧੂ ਹੋਣ ਜਾਂ ਫਿਰ ਜੁਰਮਾਂ ਵਿੱਚ ਘਿਰੇ ਹੋਣਅਜਿਹਾ ਵਤੀਰਾ ਨਾ ਤਾਂ ਦੇਸ਼ ਦੇ ਹਿਤ ਵਿੱਚ ਹੈ ਤੇ ਨਾ ਹੀ ਲੋਕਤੰਤਰ ਦੇ ਹਿਤ ਵਿੱਚਬੇਸਮਝ ਲੋਕ ਬਿਆਨ ਜਾਰੀ ਕਰਨ ਲੱਗੇ ਵੀ ਕੁਝ ਨਹੀਂ ਸੋਚਦੇ, ਮਜ਼ਾਕ ਤੇ ਨਫਰਤ ਦੇ ਪਾਤਰ ਬਣ ਬਹਿੰਦੇ ਹਨਇਸ ਸਾਲ ਚਿਰਾਂ ਤੋਂ ਪ੍ਰਚਲਤ ਕੁਝ ਸ਼ਹਿਰਾਂ ਦੇ ਨਾਮ ਬਦਲ ਕੇ ਇਲਾਹਾਬਾਦ ਨੂੰ ਪ੍ਰਯਾਗਰਾਜ ਬਣਾ ਦਿੱਤਾ ਗਿਆ ਹੈਇਸੇ ਤਰ੍ਹਾਂ ਮੁਗਲਸਰਾਏ ਦਾ ਨਾਮ ਵੀ ਬਦਲ ਦਿੱਤਾ ਗਿਆ ਹੈਇੰਜ ਹੀ ਪਹਿਲਾਂ ਬੰਬਈ ਨੂੰ ਮੁੰਬਈ ਬਣਾਇਆ ਗਿਆ ਸੀ ਤੇ ਮਦਰਾਸ ਨੂੰ ਚੇਨਈਇਤਿਹਾਸਕ ਛੇੜਛਾੜ ਤੋਂ ਗੁਰੇਜ਼ ਹੀ ਕਰਨਾ ਚਾਹੀਦਾ ਹੈਇਸ ਸਾਲ ਰਫੇਲ ਜਹਾਜ਼ਾਂ ਦੀ ਖਰੀਦ ਦਾ ਮਸਲਾ ਵੀ ਚਰਚਾ ਦਾ ਵਿਸ਼ਾ ਬਣਿਆ ਰਿਹਾ ਹੈਆਸ ਕਰਨੀ ਬਣਦੀ ਹੈ ਕਿ ਇਹ ਮਸਲਾ ਵੀ ਮਿਲ ਬੈਠ ਕੇ ਹੱਲ ਹੋ ਜਾਵੇ

ਪੰਜਾਬ ਦੇ ਸਿਆਸੀ ਮੁਹਾਜ਼ ਵਿੱਚ ਨਵੀਂ ਉੱਭਰੀ ਆਮ ਆਦਮੀ ਪਾਰਟੀ ਵਿੱਚ ਇਸ ਸਾਲ ਫਿਰ ਭੁਚਾਲ ਆ ਗਿਆ ਹੈਅਚਾਨਕ ਵਿਰੋਧੀ ਪਾਰਟੀ ਦੇ ਲੀਡਰ ਦੀ ਤਬਦੀਲੀ ਉਪਰੰਤ ਸਮੀਕਰਣ ਇਸਕਦਰ ਬਦਲੇ ਹਨ ਕਿ ਜੇ ਕੋਈ ਸਮਝੌਤਾ ਨਾ ਹੋਇਆ ਤਾਂ ਇਸ ਪਾਰਟੀ ਕੋਲੋਂ ਵਿਰੋਧੀ ਧਿਰ ਦਾ ਅਹੁਦਾ ਵੀ ਖੁਸ ਸਕਦਾ ਹੈਦੂਜੇ ਪਾਸੇ ਸ਼੍ਰੋਮਣੀ ਅਕਾਲੀ ਦਲ ਦੀਆਂ ਮੁਸ਼ਕਿਲਾਂ ਵੀ ਖਤਮ ਹੋਣ ਦਾ ਨਾਮ ਨਹੀਂ ਲੈ ਰਹੀਆਂਉਹਨਾਂ ਦੇ ਰਾਜ ਵਿੱਚ ਹੋਈਆਂ ਧਾਰਮਿਕ ਬੇਅਦਬੀਆਂ ਉਹਨਾਂ ਦਾ ਖਹਿੜਾ ਨਹੀਂ ਛੱਡ ਰਹੀਆਂਪਾਰਟੀ ਵਿੱਚ ਦੱਬੀਆਂ ਹੋਈਆਂ ਅਵਾਜ਼ਾਂ ਨੇ ਬਾਹਰ ਆ ਕੇ ਵੱਖਰਾ ਟਕਸਾਲੀ ਅਕਾਲੀ ਦਲ ਬਣਾ ਲਿਆ ਹੈਇਸ ਪਾਰਟੀ ਦੀ ਕਾਰਗੁਜ਼ਾਰੀ ਦਾ ਪਤਾ ਤਾਂ ਬਾਦ ਵਿਚ ਲੱਗੇਗਾ ਹਾਲ ਦੀ ਘੜੀ ਤਾਂ ਰਾਜਸੀ ਖਿੱਚੋਤਾਣ ਜਾਰੀ ਹੈਜਿਲਾ ਪੀਸ਼ਦਾਂ ਦੀਆਂ ਚੋਣਾਂ ਤੋਂ ਬਾਦ ਹੁਣ ਪੰਚਾਇਤੀ ਚੋਣਾਂ ਦੇ ਰੌਲੇਗੌਲੇ ਨੇ ਠੰਡ ਵਿੱਚ ਵੀ ਮਹੌਲ ਨੂੰ ਗਰਮ ਕੀਤਾ ਹੋਇਆ ਹੈਪਤਾ ਨਹੀਂ ਲੋਕ ਸਰਬਸੰਤੀ ਵੱਲ ਜ਼ਿਆਦਾ ਪ੍ਰੇਰਿਤ ਕਿਉਂ ਨਹੀਂ ਹੁੰਦੇਆਖਰ ਚੌਧਰ ਦਾ ਭੂਤ ਲੋਕਾਂ ਦੇ ਸਿਰੋਂ ਕਦੋਂ ਉੱਤਰੇਗਾ? ਦਰਅਸਲ ‘ਮਾਇਆ ਮਮਤਾ ਮੋਹਿਣੀ’ ਵੱਡੀ ਬੀਮਾਰੀ ਹੈ, ਇਹ ਨਾ ਤਾਂ ਕਿਸੇ ਦੀ ਬਣੀ ਹੈ ਤੇ ਨਾਂ ਹੀ ਬਣਨੀ ਹੈਹਰੇਕ ਨੂੰ ਇਹ ਵੀ ਪਤਾ ਹੈ ਕਿ ਇਹਨੇ ਕਿਸੇ ਦੇ ਨਾਲ ਨਹੀਂ ਜਾਣਾ ਫਿਰ ਵੀ ਲੋਕ ਮਨਾਂ ਵਿੱਚੋਂ ਇਹਦਾ ਲਾਲਚ ਨਹੀਂ ਜਾਂਦਾ

ਸਾਲ 2018 ਦੀ ਇਹ ਵੀ ਖਾਸੀਅਤ ਰਹੀ ਹੈ ਕਿ ਇਸ ਦੌਰਾਨ ਬੜੀਆਂ ਨਾਮੀ ਗਰਾਮੀ ਹਸਤੀਆਂ ਜਿਨ੍ਹਾਂ ਵਿੱਚ ਉਦਯੋਗਪਤੀਆਂ ਦੇ ਬੱਚੇ ਤੇ ਸੈਲੀਬਰਿਟੀ ਵੀ ਸਨ, ਇਸ ਸਾਲ ਦੌਰਾਨ ਗ੍ਰਹਸਤ ਮਾਰਗ ਵਿੱਚ ਪ੍ਰਵੇਸ਼ ਕਰ ਗਏ ਹਨਸਭ ਤੋਂ ਪਹਿਲਾਂ ਕ੍ਰਿਕਟ ਖਿਡਾਰੀ ਵਿਰਾਟ ਕੋਹਲੀ ਦਾ ਵਿਆਹ ਫਿਲਮੀ ਹੀਰੋਇਨ ਅਨੂਸ਼ਕਾ ਸ਼ਰਮਾ ਨਾਲ ਹੋਇਆ ਜਿਹੜਾ ਕਾਫੀ ਦੇਰ ਸੁਰਖੀਆਂ ਵਿੱਚ ਰਿਹਾ ਸੀਫੇਰ ਦੀਪਿਕਾ ਪਾਦੁਕੋਣ ਵੀ ਆਪਣੇ ਪਰੇਮੀ ਰਣਬੀਰ ਸਿੰਘ ਨਾਲ ਵਿਆਹ ਬੰਧਨ ਵਿੱਚ ਬੱਝ ਗਈਹੁਣ ਤਾਜਾ ਤਾਜਾ ਵਿਆਹ ਕਪਿਲ ਸ਼ਰਮਾ ਕਮੇਡੀਅਨ ਦਾ ਜਲੰਧਰ ਵਿਖੇ ਗਿਨੀ ਚਤਰਥ ਨਾਲ ਬੜੀ ਧੂਮ ਧਾਮ ਨਾਲ ਹੋਇਆ ਹੈਇਸ ਤੋਂ ਕੁਝ ਹੀ ਦਿਨ ਪਹਿਲਾਂ ਮੁਕੇਸ਼ ਅੰਬਾਨੀ ਦੀ ਬੇਟੀ ਵੀ ਵਿਆਹ ਬੰਧਨ ਵਿੱਚ ਬੱਝੀ ਹੈ ਜਿਸ ਵਿੱਚ ਵਿਦੇਸ਼ੀ ਮਹਿਮਾਨ ਖਾਸਕਰ ਹਿਲੇਰੀ ਕਲਿੰਟਨ ਦਾ ਸ਼ਿਰਕਤ ਕਰਨਾ ਸੁਰਖੀਆਂ ਵਿੱਚ ਰਿਹਾ ਹੈਸਵਾਲ ਪੈਦਾ ਹੁੰਦਾ ਹੈ ਕਿ ਇੱਕ ਪਾਸੇ ਤਾਂ ਇਹ ਅਮੀਰ ਘਰਾਣਿਆਂ ਦੇ ਬੇਟੇ ਬੇਟੀਆਂ ਦੇ ਵਿਆਹ ਹਨ, ਜਿੱਥੇ ਕਰੋੜਾਂ ਰੁਪਏ ਖਰਚ ਹੁੰਦੇ ਹਨ, ਵਿਦੇਸ਼ੀ ਮਹਿਮਾਨ ਸ਼ਾਮਲ ਹੁੰਦੇ ਹਨ ਤੇ ਵਿਆਹਾਂ ਦੀ ਰੀਸੈਪਸ਼ਨ ਤੱਕ ਵਿਦੇਸ਼ਾਂ ਵਿੱਚ ਸੰਪਨ ਹੁੰਦੀ ਹੈ ਤੇ ਦੂਜੇ ਪਾਸੇ ਇਸ ਹੀ ਦੇਸ਼ ਵਿੱਚ ਅਣਗਿਣਤ ਲੋਕਾਂ ਦੇ ਬੱਚੇ ਕੁਪੋਸ਼ਣ ਦਾ ਸ਼ਿਕਾਰ ਹੋ ਕੇ ਬੀਮਾਰੀਆਂ ਦੀ ਭੇਟ ਚੜ੍ਹ ਜਾਂਦੇ ਹਨਫਿਰ ਇੱਕ ਹੀ ਦੇਸ਼ ਦੇ ਲੋਕਾਂ ਲਈ ਹੀਣਭਾਵਨਾ ਤੋਂ ਬਚਣ ਲਈ ਅਨੂਸ਼ਾਸਨ ਨਾਂ ਦੀ ਤਾਂ ਕੋਈ ਚੀਜ਼ ਨਾ ਹੋਈ?

ਖੈਰ! ਇਹ ਦੁਨੀਆਂ ਬੜੀ ਅਜੀਬ ਹੈਇੱਥੇ ਕਦੋਂ ਕੀ ਹੋ ਜਾਏ, ਕੁਛ ਪਤਾ ਨਹੀਂ ਚੱਲਦਾਇਸ ਸਾਲ ਦੇ ਆਖਰੀ ਮਹੀਨੇ ਇੱਕ ਹੋਰ ਮਹੱਤਵਪੂਰਨ ਘਟਨਾ ਵੀ ਵਾਪਰੀ ਹੈ34 ਸਾਲ ਦੇ ਲੰਬੇ ਅਰਸੇ ਬਾਦ ਇਸ ਸਾਲ 1984 ਦੰਗਿਆਂ ਦੇ ਕੁਝ ਦੋਸ਼ੀਆਂ ਨੂੰ ਸਜ਼ਾਵਾਂ ਮਿਲੀਆਂ ਹਨਪਹਿਲਾਂ ਕੁਝ ਦੋਸ਼ੀਆਂ ਨੂੰ ਮੌਤ ਤੇ ਉਮਰ ਕੈਦ ਦੀ ਸਜ਼ਾ ਹੋਈ ਸੀ, ਹੁਣ ਲੋਕਾਂ ਦੀਆਂ ਅੱਖਾਂ ਵਿੱਚ ਰੜਕਦੇ ਦੋਸ਼ੀ ਸੱਜਣ ਕੁਮਾਰ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾ ਕੇ ਕਾਨੂੰਨ ਨੇ ਆਪਣੀ ਹੋਂਦ ਦਰਸਾ ਦਿੱਤੀ ਹੇ ਤੇ ਇਹ ਸਪਸ਼ਟ ਕੀਤਾ ਹੈ ਕਿ ਨਿਆਂ ਵਿੱਚ ਦੇਰ ਜ਼ਰੂਰ ਹੋਈ ਹੈ, ਅੰਧੇਰ ਨਹੀਂ ਹੋਇਆ ਕਾਨੂੰਨ ਤੇ ਇਨਸਾਫ ਸਰਕਾਰ ਦੇ ਜ਼ਰੂਰੀ ਮੁੱਖ ਪਹਿਲੂ ਹੁੰਦੇ ਹਨਸਰਕਾਰਾਂ ਤਾਂ ਬਦਲਦੀਆਂ ਰਹਿੰਦੀਆਂ ਹਨ, ਨਿਯਮਾਂ ਨਾਲ ਸਮਝੌਤਾ ਨਹੀਂ ਹੋਣਾ ਚਾਹੀਦਾ

ਤਨਖਾਹਾਂ, ਭੱਤੇ, ਰੁਜ਼ਗਾਰ ਤੇ ਹੋਰ ਸਹੂਲਤਾਂ ਲਈ ਮੁਲਾਜ਼ਮ ਤੇ ਪੈਨਸ਼ਰ ਚਿਰਾਂ ਤੋਂ ਸੰਘਰਸ਼ ਕਰਦੇ ਆ ਰਹੇ ਹਨਨਾ ਉਹਨਾਂ ਨੂੰ ਮਹਿੰਗਾਈ ਭੱਤਾ ਹੀ ਮਿਲਿਆ ਹੈ ਤੇ ਨਾ ਹੀ ‘ਇੱਕ ਅਸਾਮੀ ਇੱਕ ਤਨਖਾਹ’ ਲਾਗੂ ਹੋਈ ਹੈ ਜਦੋਂ ਕਿ ਸਰਕਾਰ ਦੁਆਰਾ ਆਪਣੇ ਵਿਧਾਇਕਾਂ ਦੀ ਤਨਖਾਹ ਵਿੱਚ ਅਚਾਨਕ ਹੀ ਢਾਈ ਗੁਣਾਂ ਵਾਧੇ ਦੀਆਂ ਖਬਰਾਂ ਆ ਰਹੀਆਂ ਹਨਨਿਯਮ ਤੇ ਖਜ਼ਾਨਾ ਸਾਰਿਆਂ ਲਈ ਹੀ ਬਰਾਬਰ ਹੋਣਾ ਚਾਹੀਦਾ ਹੈ

ਨਵਾਂ ਸਾਲ ਫਿਰ ਲੋਕ ਸਭਾ ਦੀਆਂ ਚੋਣਾਂ ਨਾਲ ਚੋਣਾਂ ਦਾ ਸਾਲ ਬਣ ਕੇ ਆਉਣ ਵਾਲਾ ਹੈਵੇਖਣਾ ਹੋਵੇਗਾ ਕਿ ਇਹ ਵੀ ਪਹਿਲਾਂ ਦੀ ਤਰ੍ਹਾਂ ਲਾਰਿਆਂ ਵਾਅਦਿਆਂ ਦਾ ਸਾਲ ਬਣ ਕੇ ਆਉਂਦਾ ਹੈ ਜਾਂ ਫਿਰ ਕੋਈ ਤਬਦੀਲੀ ਮਨੁੱਖਤਾ ਦੇ ਅਧਾਰ ’ਤੇ ਚੋਣਾਂ ਲੜਨ ਵਾਲੀਆਂ ਪਾਰਟੀਆਂ ਅਤੇ ਉਮੀਦਵਾਰਾਂ ਦੇ ਜ਼ਿਹਨ ਵਿੱਚ ਆਉਂਦੀ ਹੈਸ਼ਾਲਾ! ਆਉਣ ਵਾਲਾ ਨਵਾਂ ਸਾਲ ਸਾਰਿਆਂ ਲਈ ਖੁਸ਼ੀ ਦਾ ਪੈਗਾਮ ਲੈ ਕੇ ਆਵੇਪ੍ਰਮਾਤਮਾ ਸਾਰਿਆਂ ਨਾਗਰਿਕਾਂ ਨੂੰ ਸੁਮੱਤ ਬਖਸ਼ੇ ਤਾਂ ਕਿ ਇਥੇ ਕੋਈ ਵੀ ਕਿਸੇ ਨੂੰ ਜਾਤਾਂ-ਪਾਤਾਂ ਤੇ ਊਚ ਨੀਚ ਦੇ ਭਰਮਾਂ ਵਿੱਚ ਉਲਝਾ ਕੇ ਆਪਣਾ ਉੱਲੂ ਸਿੱਧਾ ਕਰਨ ਦੀ ਕੋਸ਼ਿਸ਼ ਨਾ ਕਰੇਸਿਆਸਤਦਾਨ ਚੋਣਾਂ ਲੜਨ ਜੀ ਸਦਕੇ ਲੜਨ, ਪਰ ਲੋਕਾਂ ਨੂੰ ਬੁੱਧੂ ਬਣਾਉਣ ਦੇ ਮਨਸ਼ੇ ਤੇ ਲਾਭ ਕਮਾਉਣ ਦੇ ਟੀਚੇ ਨਾਲ ਨਹੀਂ ਸਗੋਂ ਸੁਹਿਰਦਤਾ ਨਾਲ ਮਨੁੱਖਤਾ ਦੀ ਸੇਵਾ ਦਾ ਪ੍ਰਣ ਕਰਕੇ ਲੜਨਅਮੀਰੀ ਤੇ ਪੈਸਾ ਜ਼ਿੰਦਗੀ ਜੀਣ ਦੇ ਸਾਧਨ ਹਨ, ਮਾਲਕ ਨਹੀਂਫਿਰ ਇਸ ਸੰਸਾਰ ਵਿੱਚੋਂ ਜਦੋਂ ਸਿਕੰਦਰ ਮਹਾਨ ਵਰਗੇ ਵਰਗੇ ਨਾਲ ਕੁਝ ਨਹੀਂ ਲਿਜਾ ਸਕੇ ਤਾਂ ਹੋਰ ਕੋਈ ਭਲਾ ਕਿੰਜ ਲਿਜਾ ਸਕੇਗਾ? ਵਿਅਕਤੀ ਵਿਸ਼ੇਸ਼ ਦੀਆਂ ਚੰਗਿਆਈਆਂ ਤੇ ਭਲੇ ਕੰਮ ਹੀ ਯਾਦ ਰਹਿੰਦੇ ਹਨ, ਬੁਰੇ ਕੰਮਾਂ ਤੇ ਵਧੀਕੀਆਂ ਨੂੰ ਲਾਹਨਤਾਂ ਹੀ ਪੈਂਦੀਆਂ ਨੇ

*****

(1445)

(ਸਰੋਕਾਰ ਨਾਲ ਸੰਪਰਕ ਲਈ: This email address is being protected from spambots. You need JavaScript enabled to view it.om)

About the Author

ਦਰਸ਼ਨ ਸਿੰਘ ਰਿਆੜ

ਦਰਸ਼ਨ ਸਿੰਘ ਰਿਆੜ

Jalandhar, Punjab, India.
Phone: (91 - 93163 - 11677)
Email: (darshansriar@gmail.com)

More articles from this author