“ਇਸ ਕਹਿਰ ਨੇ ਕੈਪਟਨ ਨੂੰ ਵੀ ਹਿਲਾ ਕੇ ਰੱਖ ਦਿੱਤਾ ਹੈ, ਜਿਸ ਕਰਕੇ ...”
(9 ਅਗਸਤ 2020)

ਅਖ਼ਬਾਰਾਂ ਵਿੱਚ ਖ਼ਬਰਾਂ ਨੇ ਛਪਣਾ ਹੁੰਦਾ ਹੈ ਅਤੇ ਆਪਣੀ ਹੈਸੀਅਤ ਮੁਤਾਬਕ ਅਖ਼ਬਾਰ ਦੇ ਪੰਨੇ ’ਤੇ ਆਪਣੀ ਜਗ੍ਹਾ ਬਣਾਉਣੀ ਹੁੰਦੀ ਹੈ, ਜਿਸ ਨਾਲ ਅਖ਼ਬਾਰ ਦੇ ਪਾਠਕਾਂ ਦਾ ਧਿਆਨ ਖਿੱਚਦੀ ਹੈ। ਪਿਛਲੇ ਸਮੇਂ ਦੌਰਾਨ ਜਿੰਨਾ ਧਿਆਨ ਕਾਂਗਰਸੀ ਖ਼ਬਰਾਂ ਨੇ ਖਿੱਚਿਆ, ਉਹ ਵਰਨਣਯੋਗ ਸੀ। ਜਿਵੇਂ ਮੱਧ ਪ੍ਰਦੇਸ਼ ਦੀਆਂ ਖ਼ਬਰਾਂ ਨੇ ਧਿਆਨ ਮੰਗਿਆ ਅਤੇ ਦਰਸਾਇਆ ਕਿ ਕਿਵੇਂ ਕਾਂਗਰਸ ਦੀ ਬਹੁ-ਗਿਣਤੀ ਵਾਲੀ ਸਰਕਾਰ ਆਪਣਿਆਂ ਹੱਥੋਂ ਹੀ ਕੱਚ ਦੀ ਵੰਗ ਵਾਂਗ ਟੁੱਟ ਗਈ। ਕਾਰਨ ਭਾਵੇਂ ਕੁਝ ਵੀ ਹੋਵੇ, ਕਾਂਗਰਸ ਵਿੱਚ ਵੀ ਸਭ ਅੱਛਾ ਨਹੀਂ ਹੈ। ਪੁਰਾਣਾ ਡਸਿਪਲਿਨ ਰਿਹਾ ਹੀ ਨਹੀਂ।

ਉਪਰੋਕਤ ਪ੍ਰਦੇਸ਼ ਦੀਆਂ ਖ਼ਬਰਾਂ ਨੂੰ ਅਜੇ ਪੂਰਨ ਵਿਰਾਮ ਲੱਗਿਆ ਹੀ ਨਹੀਂ ਸੀ ਕਿ ਰਾਜਥਸਾਨ ਦਾ ਨਵਾਂ ਡਰਾਮਾ ਜਨਤਾ ਵਿੱਚ ਆ ਗਿਆ। ਰਾਜਸਥਾਨ ਵਿੱਚ ਵੀ ਨੌਜਵਾਨ ਲੀਡਰਸ਼ਿੱਪ ਪੁਰਾਣੀ ਲੀਡਰਸ਼ਿੱਪ ਤੋਂ ਖੁਸ਼ ਨਹੀਂ। ਇਸ ਸੂਬੇ ਵਿੱਚ ਵੀ ਕਾਂਗਰਸ ਦੀ ਲੀਡਰਸ਼ਿੱਪ ਦਾ ਸਭ ’ਤੇ ਕੰਟਰੋਲ ਨਹੀਂ ਹੈ। ਹੁਣ ਅਦਾਲਤਾਂ ਦੀ ਖੇਹ ਛਾਣ ਕੇ ਚੌਦਾਂ ਅਗਸਤ ਨੂੰ ਵਿਧਾਨ ਸਭਾ ਦਾ ਅਜਲਾਸ ਹੋ ਰਿਹਾ ਹੈ। ਦੇਖੋ ਊਠ ਕਿਸ ਕਰਵਟ ਬੈਠਦਾ ਹੈ। ਉਂਝ ਇਸ ਸਰਕਾਰ ਦਾ ਹੱਲ ਵੀ ਡੈਣ ਦੇ ਕੁੱਛੜ ਕੁੜੀ ਵਾਲਾ ਹੀ ਹੈ।

ਉਪਰੋਕਤ ਦੋਹਾਂ ਸੂਬਿਆਂ ਦੇ ਉਲਟ ਪੰਜਾਬ ਵਿਚਲੀ ਸਰਕਾਰ ਨੂੰ ਕੋਈ ਖਤਰਾ ਨਹੀਂ ਹੈ, ਪਰ ਇੱਥੇ ਦੀਆਂ ਵਾਪਰੀਆਂ ਘਟਨਾਵਾਂ ਨੇ ਆਮ ਜਨਤਾ ਦਾ ਧਿਆਨ ਇਕਦਮ ਆਪਣੇ ਵੱਲ ਖਿੱਚਿਆ ਹੈ। ਬਹੁਤੀਆਂ ਗੱਲਾਂ ਦਾ ਸੰਬੰਧ ਤਾਂ ਕੈਪਟਨ ਦੇ ਅਧੂਰੇ ਵਾਅਦਿਆਂ ਨਾਲ ਹੀ ਹੈ, ਜਿਹੜੇ ਅਜੇ ਤਕ ਪੂਰੇ ਨਹੀਂ ਹੋ ਸਕੇ। ਕੋਰੋਨਾ ਬਿਮਾਰੀ ਕਰਕੇ ਅਤੇ ਲਾਕਡਾਊਨ ਕਰਕੇ ਬਹੁ ਗਿਣਤੀ ਦੀਆਂ ਨੌਕਰੀਆਂ ਚਲੇ ਗਈਆਂ ਹਨ। ਮਜ਼ਦੂਰ ਕਾਰਖਾਨੇ ਬੰਦ ਹੋਣ ਕਰਕੇ ਬੇਰੁਜ਼ਗਾਰ ਬੈਠੇ ਹਨ। ਉਹ ਆਪਣੇ ਪ੍ਰਦੇਸ਼ਾਂ ਵਿੱਚੋਂ ਆ ਕੇ ਨਾ ਇੱਧਰ ਦੇ ਰਹੇ ਹਨ, ਨਾ ਉੱਧਰ ਦੇ ਰਹੇ ਹਨ। ਜਨਤਾ ਵਿੱਚ ਹਾਹਾਕਾਰ ਮਚੀ ਹੋਈ ਹੈ।

ਉੱਧਰੋਂ ਅਚਾਨਕ ਨਜਾਇਜ਼ ਸ਼ਰਾਬ ਦੇ ਧੰਦੇ ਕਰਕੇ ਕੋਈ ਦਸ ਦਰਜਨ ਤੋਂ ਵੱਧ ਵਿਅਕਤੀ ਆਪਣੀਆਂ ਜਾਨਾਂ ਗਵਾ ਚੁੱਕੇ ਹਨ। ਜਿਨ੍ਹਾਂ ਵਿੱਚੋਂ ਕਈ ਇੱਕ ਪਰਿਵਾਰ ਵਿੱਚੋਂ ਦੋ-ਦੋ ਜਣੇ ਵੀ ਹਨ। ਇਸ ਕਹਿਰ ਨੇ ਕੈਪਟਨ ਨੂੰ ਵੀ ਹਿਲਾ ਕੇ ਰੱਖ ਦਿੱਤਾ ਹੈ, ਜਿਸ ਕਰਕੇ ਕੈਪਟਨ ਨੂੰ ਡੀਜੀਪੀ ਨੂੰ ਜ਼ਹਿਰੀਲੀ ਸ਼ਰਾਬ ਦੇ ਮਾਮਲੇ ਵਿੱਚ ਸ਼ਾਮਲ ਮਾਫ਼ੀਆ ’ਤੇ ਧਾਰਾ 302 ਆਈਪੀਸੀ ਲਾਉਣ ਦੇ ਹੁਕਮ ਕਰਨੇ ਪਏ ਹਨ। ਸੂਬੇ ਦੇ ਮੁੱਖ ਮੰਤਰੀ ਨੇ ਆਪ ਮੰਨਿਆ ਹੈ ਕਿ ਪੰਜਾਬ ਵਿੱਚ ਐਮਰਜੈਂਸੀ ਵਰਗੇ ਹਾਲਾਤ ਬਣੇ ਹੋਏ ਹਨ। ਕਹਿਣ ਨੂੰ ਤਾਂ ਮੁੱਖ ਮੰਤਰੀ ਨੇ ਇੱਥੋਂ ਤਕ ਆਖ ਦਿੱਤਾ ਹੈ ਕਿ ਇਸ ਮਾਮਲੇ ਵਿੱਚ ਸਿਆਸੀ ਦਖ਼ਲ-ਅੰਦਾਜ਼ੀ ਬਰਦਾਸ਼ਤ ਨਹੀਂ ਕਰਾਂਗਾ। ਬਾਕੀ ਆਉਣ ਵਾਲੇ ਸਮੇਂ ਵਿੱਚ ਅਮਲਾਂ ਤੋਂ ਪਤਾ ਲੱਗ ਜਾਵੇਗਾ।

ਇਸ ਸਮੇਂ ਉਪਰੋਕਤ ਮਸਲਾ ਇੰਨਾ ਭਖ ਗਿਆ ਹੈ ਕਿ ਪਾਰਟੀ ਅੰਦਰੋਂ ਵੀ ਆਵਾਜ਼ਾਂ ਉੱਠਣੀਆਂ ਸ਼ੁਰੂ ਹੋ ਗਈਆਂ ਹਨ। ਦੂਲੋ ਅਤੇ ਬਾਜਵਾ ਦੇ ਬਾਗੀ ਤੇਵਰਾਂ ’ਤੇ ਮੰਤਰੀਆਂ ਨੇ ਰੋਸ ਜਿਤਾਇਆ ਹੈ। ਸਿਆਸੀ ਵਿਰੋਧੀ ਪਾਰਟੀਆਂ ਨੇ ਆਪਣੇ ਵਿੱਤ ਮੁਤਾਬਕ ਮੁਜ਼ਾਹਰੇ ਕਰਕੇ ਰੋਸ ਜਿਤਾਇਆ ਹੈ। ਵਿਰੋਧੀ ਪਾਰਟੀਆਂ ਨੇ ਇਸ ਖ਼ਿਲਾਫ਼ ਲੰਬੀ ਲੜਾਈ ਲੜਨ ਦਾ ਪ੍ਰਣ ਲਿਆ ਹੈ। ਵਿਰੋਧੀ ਪਾਰਟੀਆਂ ਵਾਲੇ ਮੁੱਖ ਮੰਤਰੀ ਅਤੇ ਵਜ਼ੀਰਾਂ ਦਾ ਘਿਰਾਓ ਕਰ ਰਹੇ ਹਨ। ਕਈਆਂ ਨੇ ਤਾਂ ਗ੍ਰਿਫ਼ਤਾਰੀਆਂ ਵੀ ਦਿੱਤੀਆਂ ਹਨ। ਕੋਈ ਵੀ ਛੋਟੀ ਤੋਂ ਛੋਟੀ ਪਾਰਟੀ ਇਸ ਕੰਮ ਵਿੱਚ ਪਿੱਛੇ ਨਹੀਂ ਹੈ।

ਉਪਰੋਕਤ ਸ਼ਰਾਬ ਦੀ ਘਿਨਾਉਣੀ ਘਟਨਾ ਖ਼ਿਲਾਫ਼ ਲੋਕਾਂ ਦਾ ਰੋਹ ਇਸ ਕਰਕੇ ਵੀ ਹੱਦੋਂ ਵੱਧ ਹੈ ਕਿਉਂਕਿ ਪਿਛਲੀਆਂ ਚੋਣਾਂ ਤੋਂ ਪਹਿਲਾਂ ਆਪ ਮੁੱਖ ਮੰਤਰੀ ਨੇ ਆਪਣੇ ਹੱਥ ਵਿੱਚ ਗੁਟਕਾ ਸਾਹਿਬ ਫੜ ਕੇ, ਆਪਣੇ ਮੱਥੇ ਨੂੰ ਲਾ ਕੇ ਆਪ-ਮੁਹਾਰੇ ਸਹੁੰ ਖਾਧੀ ਸੀ ਕਿ ਜੇਕਰ ਜਨਤਾ ਮੈਂਨੂੰ ਮੁੱਖ ਮੰਤਰੀ ਬਣਾਉਂਦੀ ਹੈ ਤਾਂ ਮੈਂ ਮੁੱਖ ਮੰਤਰੀ ਬਣਨ ਤੋਂ ਬਾਅਦ ਇੱਕ ਹਫ਼ਤੇ ਦੇ ਅੰਦਰ-ਅੰਦਰ ਪੰਜਾਬ ਵਿੱਚੋਂ ਨਸ਼ਾ ਖ਼ਤਮ ਕਰ ਦਿਆਂਗਾ। ਜਨਤਾ ਨੇ ਤਾਂ ਆਪਣੀ ਜ਼ਿੰਮੇਵਾਰੀ ਖ਼ੂਬ ਨਿਭਾਈ, ਪਰ ਰਾਜਾ ਆਪਣੇ-ਆਪ ਬਚਨ ਕਰਨ ਵਾਲਾ ਆਪਣੀ ਜ਼ਿੰਮੇਵਾਰੀ ਨਿਭਾਅ ਨਹੀਂ ਸਕਿਆ, ਜਿਸ ਕਰਕੇ ਜਨਤਾ ਵਿੱਚ ਕਦੇ ਨਾ ਠੰਢਾ ਹੋਣ ਵਾਲਾ ਗੁੱਸਾ ਮੌਜੂਦ ਹੈ।

ਦੂਜਾ ਗੁੱਸੇ ਦਾ ਵੱਡਾ ਕਾਰਨ ਇਹ ਹੈ ਕਿ ਇਹ ਮਹਿਕਮਾ ਆਬਕਾਰੀ ਅਤੇ ਗ੍ਰਹਿ ਵਿਭਾਗ ਵੀ ਕੈਪਟਨ ਸਾਹਿਬ ਪਾਸ ਹੀ ਹੈ। ਇਸਦੇ ਬਾਵਜੂਦ ਇਹ ਭਾਣਾ ਵਰਤ ਗਿਆ।

ਕੈਪਟਨ ਸਰਕਾਰ ਪਾਸ ਅਜੇ ਵੀ ਸਮਾਂ ਬਚਿਆ ਹੋਇਆ ਹੈ। ਉਹ ਚਾਹੇ ਤਾਂ ਸਰਕਾਰ ’ਤੇ ਲੱਗੇ ਅਜਿਹੇ ਕਲੰਕ ਨੂੰ ਧੋ ਸਕਦਾ ਹੈ। ਮਾਫੀਏ ’ਤੇ ਸਖਤੀ ਕਰਕੇ ਸਭ ਨਜਾਇਜ਼ ਕੰਮ ਰੋਕੇ ਜਾ ਸਕਦੇ ਹਨ। ਆਪਣੇ ਪਰਾਏ ਦਾ ਕੋਈ ਖ਼ਿਆਲ ਨਾ ਕਰੇ, ਜੋ ਦੋਸ਼ੀ ਪਾਏ ਜਾਣ, ਉਨ੍ਹਾਂ ਨੂੰ ਬਣਦੀ ਮਿਆਰੀ ਸਜ਼ਾ ਦਿੱਤੀ ਜਾਵੇ, ਤਾਂ ਕਿ ਫਿਰ ਤੋਂ ਕੋਈ ਸਿਰ ਉਠਾ ਨਾ ਸਕੇ। ਮਾਫ਼ੀਏ ਦਾ ਸੰਬੰਧ ਕਾਂਗਰਸ ਜਾਂ ਵਿਰੋਧੀ ਪਾਰਟੀਆਂ ਨਾਲ ਹੋ ਸਕਦਾ ਹੈ। ਬਾਰੀਕੀ ਨਾਲ ਪਛਾਣ ਕੀਤੀ ਜਾਵੇ। ਜੇਕਰ ਨੀਅਤ ਠੀਕ ਹੋਵੇ ਤਾਂ ਕੋਈ ਅਜਿਹਾ ਕੰਮ ਨਹੀਂ, ਜਿਹੜਾ ਸਿਰੇ ਨਾ ਚਾੜ੍ਹਿਆ ਜਾ ਸਕੇ।

ਕੈਪਟਨ ਸਾਹਿਬ ਨੂੰ ਉਸ ਸਿਆਣੇ ਜੱਟ ਤੋਂ ਸਿੱਖਣਾ ਹੋਵੇਗਾ, ਜਿਸ ਕਿਸਾਨ ਦੀ ਫ਼ਸਲ ’ਤੇ ਜਦ ਜਾਨਵਰ ਹਮਲਾ ਕਰਦੇ ਹਨ ਤਾਂ ਉਹ ਟਿੰਡ ਖੜਕਾ ਕੇ, ਰੌਲਾ ਪਾ ਕੇ ਜਾਨਵਰ ਨਹੀਂ ਉਡਾਉਂਦਾ, ਨਾ ਹੀ ਇੱਦਾਂ ਜਾਨਵਰ ਉੱਡਦੇ ਹਨ। ਸਿਆਣਾ ਜੱਟ ਟਿੰਡ ਨਹੀਂ ਖੜਕਾਉਂਦਾ, ਉਹ ਇੱਕ ਕਾਂ ਮਾਰ ਕੇ ਖੇਤਾਂ ਵਿੱਚ ਟੰਗ ਦਿੰਦਾ ਹੈ, ਜਿਸ ਨੂੰ ਦੇਖ ਕੇ ਕਾਂ ਅਤੇ ਜਾਨਵਰ ਰੌਲਾ ਤਾਂ ਖੂਬ ਪਾਉਂਦੇ ਹਨ, ਪਰ ਉਹ ਫ਼ਸਲ ਦਾ ਨੁਕਸਾਨ ਨਹੀਂ ਕਰਦੇ। ਇਸ ਕਰਕੇ ਕੈਪਟਨ ਸਾਹਿਬ, ਉਸ ਕਿਸਾਨ ਤੋਂ ਸਿੱਖੋ, ਕਾਂ ਮਾਰ ਕੇ ਟੰਗੋ, ਨਾ ਕਿ ਟਿੰਡ ਖੜਕਾਓ।

ਅਖੀਰ ਵਿੱਚ ਬਿਨਾਂ ਪੁੱਛਿਆਂ ਇਹੀ ਸਲਾਹ ਦੇ ਸਕਦੇ ਹਾਂ ਕਿ ਮਰ ਗਏ ਇਨਸਾਨਾਂ ਦੇ ਪਰਿਵਾਰਾਂ ਨੂੰ ਦਿਲ ਖੋਲ੍ਹ ਕੇ ਮੁਆਵਜ਼ਾ ਦਿੱਤਾ ਜਾਵੇ। ਹਰ ਪਰਿਵਾਰ ਨੂੰ ਉਨ੍ਹਾਂ ਦੀ ਬਣਦੀ ਯੋਗਤਾ ਮੁਤਾਬਕ ਨੌਕਰੀ ਦਿੱਤੀ ਜਾਵੇ। ਆਪਣੇ ਕੀਤੇ ਵਾਅਦਿਆਂ ਨੂੰ ਪੂਰਾ ਕਰੋ। ਕੋਈ ਵਾਅਦਾ ਤੁਸੀਂ ਆਪਣੇ ਪੱਲਿਓਂ ਪੂਰਾ ਨਹੀਂ ਕਰਨਾ,ਸਰਕਾਰੀ ਖਜ਼ਾਨੇ ਵਿੱਚੋਂ ਪੂਰਾ ਕਰਨਾ ਹੈ। ਇਸ ਤਰ੍ਹਾਂ ਕਰਕੇ ਤੁਸੀਂ ਮੁੜ ਜਨਤਾ ਦਾ ਵਿਸ਼ਵਾਸ ਜਿੱਤ ਸਕਦੇ ਹੋ ਅਤੇ ਕਾਂਗਰਸ ਨੂੰ ਵੀ ਡੁੱਬਣੋ ਬਚਾ ਸਕਦੇ ਹੋ।

*****

ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।)

(2288)

(ਸਰੋਕਾਰ ਨਾਲ ਸੰਪਰਕ ਲਈ: This email address is being protected from spambots. You need JavaScript enabled to view it.gmail.com