“ਮੋਦੀ ਸਾਹਿਬ ਨੂੰ ਪਤਾ ਲੱਗ ਚੁੱਕਾ ਸੀ ਕਿ ਰੈਲੀ ਵਾਲੀ ਥਾਂ ਖਾਲੀ ਕੁਰਸੀਆਂ ਉਸ ਨੂੰ ਉਡੀਕਦੀਆਂ ...”
(9 ਜਨਵਰੀ 2022)
ਫੇਰ ਢਾਈ ਵਜੇ ਬੰਬ ਫਟਣ ਵਾਂਗ ਖ਼ਬਰ ਆਈ ਕਿ ਪ੍ਰਧਾਨ ਮੰਤਰੀ ਆਪਣੀ ‘ਜਾਨ ਬਚਾ ਕੇ’ ਵਾਪਸ ਦਿੱਲੀ ਪਰਤ ਗਏ ਹਨ। ਮੈਂਨੂੰ ਬੜਾ ਧੱਕਾ ਲੱਗਾ। ਮੇਰਾ ਮਨ ਬੜਾ ਦੁਖੀ ਹੋਇਆ। ਰੱਬ ਖ਼ੈਰ ਕਰੇ! ਕੁਝ ਗ਼ਲਤ ਵਾਪਰ ਸਕਦਾ ਹੈ। ਕੋਈ ਬੜੀ ਵੱਡੀ ਸਾਜਿਸ਼ ਹੋ ਰਹੀ ਹੈ।
ਵਾਕਈ ਬੜੀ ਵੱਡੀ ਸਾਜਿਸ਼ ਹੋ ਰਹੀ ਹੈ। ਬੀ.ਜੇ.ਪੀ. ਵੱਲੋਂ ਧੂੰਆਂ-ਧਾਰ ਬਿਆਨ ਦਿੱਤੇ ਜਾ ਰਹੇ ਹਨ। ਚੁਰਾਸੀ ਦੇ ਦੰਗੇ ਦੁਹਰਾਉਣ ਦੀਆਂ ਗੱਲਾਂ ਹੋ ਰਹੀਆਂ ਹਨ। ਪੰਜਾਬੀਆਂ, ਵਿਸ਼ੇਸ਼ ਤੌਰ ’ਤੇ ਸਿੱਖਾਂ ਪ੍ਰਤੀ ਨਫ਼ਰਤ ਉਗਲੀ ਜਾ ਰਹੀ ਹੈ। ਸਾਰੀਆਂ ਪਾਰਟੀਆਂ ਦੇ ਆਗੂ ਆਪਣੇ ਆਪਣੇ ਨਜ਼ਰੀਏ ਤੋਂ ਬਿਆਨ ਦਾਗ਼ ਰਹੇ ਹਨ। ਅਸਲ ਤੱਥ ਲੱਭਣ ਲਈ ਕਮੇਟੀ ਅਤੇ ਕਮਿਸ਼ਨ ਬਿਠਾਏ ਜਾ ਰਹੇ ਹਨ। ਹਾਈ ਕੋਰਟ ਅਤੇ ਸੁਪਰੀਮ ਕੋਰਟ ਦੇ ਦਰਵਾਜ਼ੇ ਖੜਕਾਏ ਜਾ ਰਹੇ ਹਨ। ਕੋਈ ਕਹਿ ਰਿਹਾ ਹੈ ਕਿ ਇਹ ਰਾਜਨੀਤਕ ਮਸਲਾ ਨਹੀਂ ਹੈ, ਪ੍ਰਸ਼ਾਸਨਿਕ ਮਸਲਾ ਹੈ। ਕੋਈ ਕਹਿ ਰਿਹਾ ਹੈ ਕਿ ਇਹ ਪ੍ਰਸ਼ਾਸਨਿਕ ਨਹੀਂ, ਨਿਰੋਲ ਸਿਆਸੀ ਮਸਲਾ ਹੈ। ਠੀਕ, ਇਹ ਪ੍ਰਸ਼ਾਸਨਿਕ ਮਸਲਾ ਨਹੀਂ ਹੈ। ਇਹ ਸਿਆਸੀ ਮਸਲਾ ਹੈ, ਨਿਰੋਲ ਸਿਆਸੀ। ਮੋਦੀ ਸਾਹਿਬ ਨੂੰ ਪਤਾ ਲੱਗ ਚੁੱਕਾ ਸੀ ਕਿ ਰੈਲੀ ਵਾਲੀ ਥਾਂ ਖਾਲੀ ਕੁਰਸੀਆਂ ਉਸ ਨੂੰ ਉਡੀਕਦੀਆਂ ਪਈਆਂ ਹਨ। ਦੋ ਵਜੇ ਤਕ ਵੀ ਖਾਲੀ ਕੁਰਸੀਆਂ ਹੀ ਉਹ ਦੇਖ ਰਿਹਾ ਸੀ। ਹੁਣ ਮੋਦੀ ਸਾਹਿਬ ਭਲਾ ਕੀ ਕਹਿੰਦੇ ਕਿ ਖਾਲੀ ਕੁਰਸੀਆਂ ਕਰਕੇ ਉਹ ਵਾਪਸ ਜਾ ਰਿਹਾ ਹੈ? ਕੀ ਉਸ ਨੇ ਆਪਣੀ ਪਾਰਟੀ ਦੀ ਬੇਇਜ਼ਤੀ ਕਰਨੀ ਸੀ ਇਹ ਕਹਿ ਕੇ ਕਿ ਉਸ ਦੀ ਪੰਜਾਬ ਦੀ ਪਾਰਟੀ ਦਰਸ਼ਕਾਂ ਦੀ ਭੀੜ ਨਹੀਂ ਜੁਟਾ ਸਕੀ? ਕੀ ਮੋਦੀ ਨੇ ਆਪਣੇ ਸਿਰ ਆਪ ਹੀ ਖੇਹ ਪਾਉਣੀ ਸੀ? ਮੋਦੀ ਸਾਹਿਬ ਬੜੇ ਮੰਝੇ ਹੋਏ ਰਾਜਨੇਤਾ ਹਨ। ਇਸੇ ਲਈ ਉਨ੍ਹਾਂ ਨੇ ਇਹ ਪੈਂਤੜਾ ਅਪਣਾ ਲਿਆ, ਜਿਹੜਾ ਉਸ ਨੂੰ ਰਾਜਨੀਤਕ ਤੌਰ ’ਤੇ ਲਾਹੇਬੰਦ ਲਗਦਾ ਹੋਵੇਗਾ। ਮੋਦੀ ਅਤੇ ਮੋਦੀ ਦੀ ਪਾਰਟੀ ਰਾਜਨੀਤਕ ਤੌਰ ’ਤੇ ਕਿਉਂ ਹਾਰੇ? ਤਿੰਨੇ ਕਾਨੂੰਨ ਵਾਪਸ ਲੈਣ ਦੀ ਨਮੋਸ਼ੀ ਤੋਂ ਤਾਂ ਉਹ ਅਜੇ ਤਕ ਵੀ ਨਹੀਂ ਸੰਭਲੇ।
ਅੱਜ ਭਾਰਤ ਵਿੱਚ ਮੋਦੀ ਤੇ ਉਸ ਦੀ ਪਾਰਟੀ ਬੀ.ਜੇ.ਪੀ.ਅਤੇ ਭਾਰਤ ਦੇ ਲੋਕਾਂ ਵਿੱਚ ਰਾਜਨੀਤਕ ਲੜਾਈ ਸ਼ੁਰੂ ਹੈ। ਰਾਜਨੀਤਕ ਲੜਾਈ ਕੀ ਹੈ? ਉਹ ਹੈ ਸਾਮਰਾਜ ਦੀਆਂ ਨਵ-ਉਦਾਰਵਾਦੀ ਪਾਲਿਸੀਆਂ ਨੂੰ ਲਾਗੂ ਕਰਵਾਉਣਾ। ਆਈ.ਐੱਮ.ਐੱਫ ਅਤੇ ਡਬਲਿਯੂ.ਟੀ.ਓ. ਦੀਆਂ ਲੋਕ-ਮਾਰੂ ਨੀਤੀਆਂ ਦਾ ਜੂਲਾ ਲੋਕਾਂ ਉੱਤੇ ਲੱਦਣਾ। ਪੂੰਜੀਵਾਦੀਆਂ ਅਤੇ ਕਾਰਪੋਰੇਟ ਸੈਕਟਰ ਕੋਲ ਦੇਸ਼ ਦੀ ਜ਼ਮੀਨ, ਧੰਨ ਦੌਲਤ, ਖਣਿਜ ਪਦਾਰਥਾਂ ਨੂੰ ਸੌਂਪਣਾ। ਇਹ ਇਕੱਲਾ ਸਾਡੇ ਦੇਸ਼ ਭਾਰਤ ਵਿੱਚ ਹੀ ਨਹੀਂ ਹੋ ਰਿਹਾ, ਸੰਸਾਰ ਭਰ ਵਿੱਚ ਹੋ ਰਿਹਾ ਹੈ। ਇੱਕ ਪਾਸੇ ਆਰ.ਐੱਸ.ਐੱਸ. ਸਾਮਰਾਜੀਆਂ ਅਤੇ ਕਾਰਪੋਰੇਟ ਪੱਖੀ ਹਨ, ਦੂਜੇ ਪਾਸੇ ਉਹ ਪਾਰਟੀਆਂ ਹਨ, ਜਿਹੜੀਆਂ ਲੋਕ-ਪੱਖੀ ਹਨ। ਕਿਸਾਨ ਸੰਘਰਸ਼ ਨੇ ਤਿੰਨ ਕਿਸਾਨਾਂ ਵਿਰੋਧੀ ਕਾਨੂੰਨਾਂ ਵਿਰੁੱਧ ਲੰਮੀ ਲੜਾਈ ਲੜਕੇ ਭਾਰਤ ਦੇ ਲੋਕਾਂ ਨੂੰ ਹੀ ਨਹੀਂ ਬਲਕਿ ਕੁਲ ਸੰਸਾਰ ਨੂੰ ਸਿਆਸੀ ਤੌਰ ’ਤੇ ਜਾਗ੍ਰਤ ਕੀਤਾ ਹੈ। ਪੂੰਜੀਪਤੀਆਂ ਵਿਰੁੱਧ ਲੜਾਈ ਦਿਨੋ ਦਿਨ ਤੇਜ਼ ਹੋਣੀ ਹੈ।
5 ਜਨਵਰੀ ਨੂੰ ਪ੍ਰਧਾਨ ਮੰਤਰੀ ਮੋਦੀ ਦਾ ‘ਜਾਨ ਬਚਾ ਕੇ’ ਆਉਣ ਦਾ ਨਾਟਕ ਕਰਨਾ ਕੋਈ ਨਵੀਂ ਗੱਲ ਨਹੀਂ ਹੈ। ਇਹ ਹੁੰਦਾ ਹੀ ਰਹਿੰਦਾ ਹੈ। ਭਾਰਤ ਵਿੱਚ ਲੜਾਈ ਹੁਣ ਸਿੱਧੀ ਅਤੇ ਤਿੱਖੀ ਹੋ ਰਹੀ ਹੈ। ਦੇਸ਼ ਵੇਚਣ ਵਾਲਿਆਂ ਅਤੇ ਦੇਸ਼ ਦੇ ਰੱਖਿਅਕਾਂ ਵਿਚਾਲੇ ਲੜਾਈ ਤਿੱਖੀ ਹੋਣ ਜਾ ਰਹੀ ਹੇ। ਅੱਜ ਲੋੜ ਹੈ ਕਿ ਦੇਸ਼ ਵਿੱਚ ਪਬਲਿਕ ਸੈਕਟਰ ਤਕੜਾ ਹੋਵੇ। ਸਾਰੇ ਕੰਮ-ਧੰਦੇ ਕੌਮੀ ਕੀਤੇ ਜਾਣ। ਕਿਰਤੀਆਂ ਅਤੇ ਕਿਸਾਨਾਂ ਕੋਲ ਪੈਸਾ ਹੋਵੇ। ਉਹਨਾਂ ਦੀ ਖ਼ਰੀਦ ਸ਼ਕਤੀ ਵਧੇ। ਇਸੇ ਨਾਲ ਦੇਸ਼ ਗਰੀਬੀ ਅਤੇ ਬੇਰੁਜ਼ਗਾਰੀ ਦੀ ਜਿੱਲ੍ਹਣ ਵਿੱਚੋਂ ਨਿਕਲ ਸਕਦਾ ਹੈ। ਲੋਕ ਦੋਖੀਆਂ ਅਤੇ ਲੋਕ ਪੱਖੀਆਂ ਦੀ ਲੜਾਈ ਹੁਣ ਤਿੱਖੀ ਤੋਂ ਤਿੱਖੇਰੀ ਹੋਣੀ ਹੀ ਹੋਣੀ ਹੈ। ਜਿੱਤ ਆਖ਼ਰ ਲੋਕ-ਪੱਖੀਆਂ ਦੀਆਂ ਹੋਣੀ ਹੈ। ਸਾਰੇ ਸੰਸਾਰ ਵਿੱਚ ਹੋਣ ਜਾ ਰਹੀ ਹੈ।
ਮੋਦੀ ਦੇ ਫਿਰੋਜ਼ਪੁਰ ਕਾਂਡ ਦਾ ਕੁਝ ਨਹੀਂ ਬਣਨਾ, ਕਿਸਾਨਾਂ ਵਿਰੁੱਧ ਪਾਸ ਕੀਤੇ ਤਿੰਨ ਕਾਨੂੰਨਾਂ ਵਰਗਾ ਹਸ਼ਰ ਇਸਦਾ ਵੀ ਹੋਣਾ ਹੈ। ਸੰਸਾਰ ਭਰ ਵਿੱਚ ਜੋਕਾਂ ਅਤੇ ਲੋਕਾਂ ਦੀ ਲੜਾਈ ਵੀ ਅੱਜ ਏਜੰਡੇ ਉੱਤੇ ਹੈ। ਫਿਰੋਜ਼ਪੁਰ ਦਾ ਕਾਂਡ ਉਸੇ ਦਾ ਹਿੱਸਾ ਹੈ।
*****
ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
(3266)
(ਸਰੋਕਾਰ ਨਾਲ ਸੰਪਰਕ ਲਈ: This email address is being protected from spambots. You need JavaScript enabled to view it.)