“ਉਦੇਸ਼ ਦੀ ਪ੍ਰਾਪਤੀ ਲਈ ਸਮੇਂ ਦੀ ਅਹਿਮ ਭੂਮਿਕਾ ਹੁੰਦੀ ਹੈ। ਦ੍ਰਿੜ੍ਹ ਵਿਸ਼ਵਾਸੀ ਹਮੇਸ਼ਾ ਹੀ ਸਮੇਂ ਦਾ ਸਦਉਪਯੋਗ ...”
(3 ਮਾਰਚ 2024)
ਇਸ ਸਮੇਂ ਪਾਠਕ: 285.
ਉਹ ਲੋਕ ਹਮੇਸ਼ਾ ਕਾਮਯਾਬ ਹੁੰਦੇ ਹਨ ਜਿਨ੍ਹਾਂ ਦੇ ਇਰਾਦੇ ਮਜ਼ਬੂਤ ਹੁੰਦੇ ਹਨ। ਸੰਸਾਰ ਵਿੱਚ ਅਨੇਕਾਂ ਲੋਕ ਅਜਿਹੇ ਹੋਏ ਹਨ ਜਿਨ੍ਹਾਂ ਨੇ ਕਿਸੇ ਸੰਕਲਪ ਨੂੰ ਲੈ ਕੇ ਉਸ ਨੂੰ ਪੂਰਾ ਕਰਨ ਲਈ ਆਪਣਾ ਜੀਵਨ ਲਗਾ ਦਿੱਤਾ ਅਤੇ ਸਫ਼ਲਤਾ ਹਾਸਲ ਕੀਤੀ। ਅਜਿਹੇ ਵੀ ਲੋਕ ਦੁਨੀਆਂ ਵਿੱਚ ਹੋਏ ਹਨ ਜਿਨ੍ਹਾਂ ਨੇ ਮਿਸ਼ਨ ਹਾਸਿਲ ਕਰਨ ਲਈ ਆਪਣੇ ਪ੍ਰਾਣ ਤਕ ਤਿਆਗ ਦਿੱਤੇ। ਪ੍ਰੰਤੂ ਅਜਿਹੇ ਸਾਹਸੀ ਲੋਕ ਘੱਟ ਹੁੰਦੇ ਹਨ। ਅਸਲ ਵਿੱਚ ਬਹੁਤ ਘੱਟ ਲੋਕ ਹੁੰਦੇ ਹਨ ਜੋ ਨਿਸ਼ਚੇ ਪੂਰਵਕ ਕਹਿ ਸਕਦੇ ਹਨ ਕਿ ਉਹ ਜੋ ਕਰਨਾ ਚਾਹੁੰਦੇ ਹਨ, ਉਸ ਨੂੰ ਕਰ ਸਕਦੇ ਹਨ। ਜਿਨ੍ਹਾਂ ਨੂੰ ਆਪਣੀ ਸ਼ਕਤੀ ਉੱਤੇ ਵਿਸ਼ਵਾਸ ਹੁੰਦਾ ਹੈ, ਉਹਨਾਂ ਨੂੰ ਮੁਸ਼ਕਿਲ ਤੋਂ ਮੁਸ਼ਕਿਲ ਮੁਕਾਮ ਉੱਤੇ ਪਹੁੰਚਣ ਵਿੱਚ ਵੀ ਕੋਈ ਸਮੱਸਿਆ ਨਹੀਂ ਆਉਂਦੀ। ਸੰਕਲਪ ਅਤੇ ਪ੍ਰਤਿਗਿਆ ਪੂਰੀ ਕਰਨ ਦਾ ਵਿਸ਼ਵਾਸ ਮਜ਼ਬੂਤ ਇਰਾਦੇ ਵਾਲੇ ਲੋਕਾਂ ਵਿੱਚ ਹੀ ਹੁੰਦਾ ਹੈ। ਉਹ ਜਿਸ ਕੰਮ ਨੂੰ ਹੱਥ ਪਾ ਲੈਂਦੇ ਹਨ, ਉਸ ਨੂੰ ਪੂਰਾ ਕਰਕੇ ਹੀ ਛੱਡਦੇ ਹਨ।
ਵਿਅਕਤੀ ਕੋਈ ਵੀ ਮਹਾਨ ਕੰਮ ਤਾਂ ਹੀ ਕਰ ਸਕਦਾ ਹੈ, ਜਦੋਂ ਉਹ ਉਸਦੇ ਲਈ ਸੰਕਲਪ ਕਰਦਾ ਹੈ, ਪ੍ਰਣ ਕਰਦਾ ਹੈ ਅਤੇ ਉਸ ਨੂੰ ਪੂਰਾ ਕਰਨ ਲਈ ਦਿਨ-ਰਾਤ ਇੱਕ ਕਰ ਦਿੰਦਾ ਹੈ। ਆਤਮ ਵਿਸ਼ਵਾਸ ਜਿੰਨਾ ਜ਼ਿਆਦਾ ਹੋਵੇਗਾ, ਸਫ਼ਲਤਾ ਦਾ ਰਾਹ ਉੰਨਾ ਹੀ ਸੌਖਾ ਹੋਵੇਗਾ। ਦ੍ਰਿੜ੍ਹ ਨਿਸ਼ਚੇ ਦੀ ਮਾਤਰਾ ਅਨੁਸਾਰ ਹੀ ਸਫ਼ਲਤਾ ਦੀ ਮਾਤਰਾ ਹੁੰਦੀ ਹੈ। ਕੁਝ ਲੋਕ ਕਦੇ ਵੀ ਕਿਸੇ ਵੀ ਕੰਮ ਨੂੰ ਨਿਸ਼ਚੇ ਪੂਰਵਕ ਨਹੀਂ ਕਰਦੇ ਉਹ ਹਮੇਸ਼ਾ ਅਨਿਸ਼ਚਿਤਤਾ ਦੀ ਸਥਿਤੀ ਵਿੱਚ ਰਹਿੰਦੇ ਹਨ। ਉਹ ਨਹੀਂ ਜਾਣਦੇ ਕਿ ‘ਜੇ’ ‘ਪਰ’ ਕਿਸਮਤ ਦੀਆਂ ਗੱਲਾਂ ਕਰਨ ਨਾਲ ਇੱਛਾ ਸ਼ਕਤੀ ਕਮਜ਼ੋਰ ਹੁੰਦੀ ਹੈ। ਬਹੁਤ ਸਾਰੇ ਲੋਕ ਹਰ ਗੱਲ ਭਗਵਾਨ ਉੱਤੇ ਸੁੱਟਦੇ ਹਨ, ਉਹ ਆਪਣੀ ਸ਼ਕਤੀ ਉੱਤੇ ਭਰੋਸਾ ਨਾ ਕਰਕੇ ਭਗਵਾਨ ਰੂਪੀ ਸ਼ਕਤੀ ਦੇ ਸਹਾਰੇ ਮੰਜ਼ਲ ’ਤੇ ਪਹੁੰਚਣਾ ਚਾਹੁੰਦੇ ਹਨ। ਅਜਿਹੇ ਲੋਕਾਂ ਵਿੱਚ ਆਤਮ ਵਿਸ਼ਵਾਸ ਦੀ ਕਮੀ ਹੁੰਦੀ ਹੈ। ਅਜਿਹੇ ਲੋਕਾਂ ਦਾ ਤਰਕ ਖੋਖਲਾ ਹੁੰਦਾ ਹੈ। ਉਨ੍ਹਾਂ ਨੂੰ ਇਹ ਵੀ ਸਮਝ ਨਹੀਂ ਕਿ ਤੁਸੀਂ ਉਸ ਪਰਮ ਪਿਤਾ ਪ੍ਰਮੇਸ਼ਵਰ ਦੇ ਹੀ ਅੰਸ਼ ਹੋ, ਜੋ ਸ੍ਰਿਸ਼ਟੀ ਦਾ ਰਚਨਹਾਰ ਹੈ, ਜਿਸਨੇ ਤੁਹਾਨੂੰ ਸੰਪੂਰਨ ਅਤੇ ਸ਼੍ਰੇਸ਼ਠ ਬਣਾਇਆ ਹੈ। ਤੁਹਾਨੂੰ ਅਸੀਮ ਸ਼ਕਤੀ ਦਿੱਤੀ ਹੈ। ਤੁਹਾਡੇ ਕੋਲ ਕੀ ਨਹੀਂ? ਸ਼ਕਤੀ, ਬੁੱਧੀ, ਗਿਆਨ ਅਤੇ ਮਜ਼ਬੂਤ ਇਰਾਦੇ ਨਾਲ ਤੁਸੀਂ ਸੰਸਾਰ ਦੇ ਸਾਰੇ ਕੰਮ ਕਰ ਸਕਦੇ ਹੋ।
ਹਮੇਸ਼ਾ ਆਪਣੇ ਨਿਸ਼ਚੇ ’ਤੇ ਦ੍ਰਿੜ੍ਹ ਰਹੋ। ਤੁਹਾਡੀ ਹਰ ਗੱਲ ਪੱਥਰ ਉੱਤੇ ਲਕੀਰ ਹੋਣੀ ਚਾਹੀਦੀ ਹੈ। ਜੋ ਤੁਸੀਂ ਕਹਿ ਦਿਓ, ਉਹ ਕਰਕੇ ਰਹੋ। ਤੁਹਾਡੀ ਕਥਨੀ ਅਤੇ ਕਰਨੀ ਵਿੱਚ ਕੋਈ ਫਰਕ ਨਹੀਂ ਹੋਣਾ ਚਾਹੀਦਾ। ਆਪਣੀ ਸਫ਼ਲਤਾ ਉੱਤੇ ਸੰਦੇਹ ਕਰਕੇ ਇਹ ਨਾ ਕਹੋ ਕਿ ਕਦੇ ਨਾ ਕਦੇ ਸਫ਼ਲਤਾ ਮਿਲ ਜਾਵੇਗੀ, ਬਲਕਿ ਇਹ ਕਹੋ ਕਿ ਸਫ਼ਲਤਾ ਤਾਂ ਨਿਸ਼ਚਿਤ ਹੈ। ਤੁਸੀਂ ਸਫਲ ਵਿਅਕਤੀ ਹੋ, ਸਫ਼ਲਤਾ ਉੱਤੇ ਤੁਹਾਡਾ ਪੂਰਾ ਅਧਿਕਾਰ ਹੈ। ਸਫ਼ਲਤਾ ਦੀਆਂ ਗੱਲਾਂ ਕਰਨਾ ਤੁਹਾਡੀ ਆਦਤ ਹੋਣੀ ਚਾਹੀਦੀ ਹੈ। ਬੱਸ ਤੁਹਾਡਾ ਇਹ ਦਾਅਵਾ ਅਤੇ ਗਾਰੰਟੀ ਹੋਣੀ ਚਾਹੀਦੀ ਹੈ ਕਿ ਤੁਸੀਂ ਇੱਕ ਵਾਰ ਜੋ ਫੈਸਲਾ ਲੈਂਦੇ ਹੋ, ਉਸ ਨੂੰ ਨਿਸ਼ਚੇ ਹੀ ਪੂਰਾ ਕਰਦੇ ਹੋ। ਤੁਸੀਂ ਇੱਛਾ ਅਤੇ ਕਲਪਨਾ ਨੂੰ ਕਾਰਜ ਰੂਪ ਵਿੱਚ ਤਬਦੀਲ ਕਰਕੇ ਹੀ ਸਾਹ ਲੈਂਦੇ ਹੋ।
ਮਨ ਦੀਆਂ ਭਾਵਨਾਵਾਂ ਵਿੱਚ ਵਿਰਾਟ ਸ਼ਕਤੀ ਹੁੰਦੀ ਹੈ। ਤੁਸੀਂ ਜਿਹੋ ਜਿਹਾ ਸੋਚੋਗੇ, ਉਹੋ ਜਿਹੀ ਪ੍ਰਾਪਤੀ ਹੀ ਹੋਵੇਗੀ। ਜਦੋਂ ਤੁਹਾਡੇ ਮਨ ਵਿੱਚ ਇਹ ਭਾਵਨਾਵਾਂ ਆਉਂਦੀਆਂ ਹਨ ਕਿ ਤੁਹਾਨੂੰ ਖੁਦ ਉੱਤੇ ਪੂਰਨ ਵਿਸ਼ਵਾਸ ਹੈ, ਤੁਸੀਂ ਜੋ ਚਾਹੋਗੇ ਕਰ ਦੇਵੋਗੇ, ਇਸ ਨਾਲ ਤੁਹਾਡੀ ਕਾਰਜ ਸ਼ਕਤੀ ਵਿੱਚ ਵਾਧਾ ਹੁੰਦਾ ਹੈ ਅਤੇ ਉਤਸ਼ਾਹ ਵਧਦਾ ਹੈ ਜਦੋਂ ਕਿ ਅਨਿਸ਼ਚਿਤਤਾ ਨਿਰਾਸ਼ਾ ਨੂੰ ਜਨਮ ਦਿੰਦੀ ਹੈ। ਸੰਕਲਪ ਵਿੱਚ ਬੜੀ ਸ਼ਕਤੀ ਹੁੰਦੀ ਹੈ। ਆਤਮ ਵਿਸ਼ਵਾਸ ਨੂੰ ਸੰਸਾਰ ਵਿੱਚ ਅਦਭੁੱਤ ਸ਼ਕਤੀ ਕਿਹਾ ਗਿਆ ਹੈ। ਤੁਸੀਂ ਸਵੇਰੇ ਜਲਦੀ ਉੱਠਣਾ ਚਾਹੁੰਦੇ ਹੋ ਤਾਂ ਸੌਣ ਤੋਂ ਪਹਿਲਾਂ ਪ੍ਰਤਿਗਿਆ ਕਰੋ, ‘ਮੈਂ ਸਵੇਰੇ ਚਾਰ ਵਜੇ ਉੱਠ ਜਾਵਾਗਾਂ।’ ਜੇ ਤੁਹਾਡੇ ਸ਼ਬਦਾਂ ਵਿੱਚ ਵਿਸ਼ਵਾਸ ਹੈ ਤਾਂ ਤੁਸੀਂ ਅਵੱਸ਼ ਚਾਰ ਵਜੇ ਉੱਠ ਜਾਵੋਗੇ। ਤੁਸੀਂ ਪ੍ਰਤਿਗਿਆ ਕਰੋ ਕਿ ਬਿਮਾਰ ਨਹੀਂ ਹੋਵੋਗੇ ਤੇ ਜੇਕਰ ਤੁਹਾਡੀ ਦ੍ਰਿੜ੍ਹ ਇੱਛਾ ਹੈ ਤਾਂ ਤੁਸੀਂ ਬਿਮਾਰ ਨਹੀਂ ਹੋ ਸਕਦੇ।
ਜੇਕਰ ਤੁਹਾਡਾ ਵਿਸ਼ਵਾਸ ਉਦੇਸ਼ ਉੱਤੇ ਦ੍ਰਿੜ੍ਹ ਨਹੀਂ ਤਾਂ ਖੁਦ ਨਾਲ ਗੱਲ ਕਰਕੇ ਵਿਸ਼ਵਾਸ ਨੂੰ ਦ੍ਰਿੜ੍ਹ ਬਣਾਓ। ਦ੍ਰਿੜ੍ਹ ਸ਼ਬਦਾਂ ਵਿੱਚ ਕਹੋ – ਮੈਂ ਮਹਾਨ ਇਨਸਾਨ ਬਣਨਾ ਚਾਹੁੰਦਾ ਹਾਂ - ਬਣਦਾ ਜਾ ਰਿਹਾ ਹਾਂ ਤੇ ਬਣਨ ਲਈ ਪੈਦਾ ਹੋਇਆ ਹਾਂ। ਸ਼ਾਮ ਨੂੰ ਵੀ ਦੁਬਾਰਾ ਦੁਹਰਾਓ - ਮੈਂ ਮਹਾਨ ਆਦਮੀ ਹਾਂ - ਅੱਜ ਮੈਂ ਜੋ ਭੁੱਲਾਂ ਕੀਤੀਆਂ ਹਨ, ਉਹ ਮੇਰੇ ਲਈ ਠੀਕ ਨਹੀਂ। ਹੁਣ ਮੈਂ ਸਧਾਰਣ ਵਿਅਕਤੀ ਨਹੀਂ ਹਾਂ। ਮਹਾਨ ਲੋਕ ਅਜਿਹੀਆਂ ਗਲਤੀਆਂ ਨਹੀਂ ਕਰਦੇ। ਜੇਕਰ ਤੁਹਾਡੇ ਵਿੱਚ ਇਹ ਕਮੀ ਹੈ ਕਿ ਤੁਸੀਂ ਦੇਰ ਨਾਲ ਨਿਰਣਾ ਲੈਂਦੇ ਹੋ ਅਤੇ ਤੁਸੀਂ ਆਲਸ ਕਾਰਨ ਕੰਮ ਨੂੰ ਟਾਲਦੇ ਹੋ, ਇਹ ਦੋਵੇਂ ਆਦਤਾਂ ਬੁਰੀਆਂ ਹਨ, ਤੁਹਾਡੀ ਸਫ਼ਲਤਾ ਦੇ ਰਾਹ ਵਿੱਚ ਰੋੜਾ ਹਨ। ਬਿਨਾਂ ਦੇਰ ਕੀਤੇ ਇਹ ਆਦਤ ਛੱਡ ਦਿਓ।
ਉਦੇਸ਼ ਦੀ ਪ੍ਰਾਪਤੀ ਲਈ ਸਮੇਂ ਦੀ ਅਹਿਮ ਭੂਮਿਕਾ ਹੁੰਦੀ ਹੈ। ਦ੍ਰਿੜ੍ਹ ਵਿਸ਼ਵਾਸੀ ਹਮੇਸ਼ਾ ਹੀ ਸਮੇਂ ਦਾ ਸਦਉਪਯੋਗ ਕਰਦਾ ਹੈ। ਉਹ ਸਮੇਂ ਨੂੰ ਵਿਅਰਥ ਨਹੀਂ ਜਾਣ ਦਿੰਦਾ। ਉਹ ਹਰ ਨਿਰਣਾ ਸਮੇਂ ’ਤੇ ਲੈਂਦਾ ਹੈ। ਸਮਾਂ ਬੜਾ ਬਲਵਾਨ ਹੁੰਦਾ ਹੈ। ਅਗਰ ਤੁਸੀਂ ਸਮੇਂ ਦਾ ਪਾਲਣ ਨਹੀਂ ਕਰਦੇ, ਕ੍ਰੋਧ ਆਉਂਦਾ ਹੈ, ਜਲਦੀ ਭੜਕ ਜਾਂਦੇ ਹੋ, ਦੂਸਰਿਆਂ ਨਾਲ ਗਲਤ ਵਿਵਹਾਰ ਕਰਦੇ ਹੋ, ਉਦੋਂ ਤੁਹਾਡਾ ਮਨ ਕਮਜ਼ੋਰ ਹੋ ਜਾਂਦਾ ਹੈ। ਮਨ ਦੀ ਇਸ ਦੁਰਬਲਤਾ ਨੂੰ ਦੂਰ ਕਰੋ। ਇਸਦੇ ਲਈ ਦਿਨ ਭਰ ਵਿੱਚ ਕੀਤੀਆਂ ਭੁੱਲਾਂ ਨੂੰ ਰਾਤ ਨੂੰ ਵਿਚਾਰ ਕਰਕੇ ਭਵਿੱਖ ਵਿੱਚ ਨਾ ਕਰਨ ਦਾ ਦ੍ਰਿੜ੍ਹ ਸੰਕਲਪ ਕਰੋ। ਆਤਮ ਪੜਚੋਲ ਕਰੋ। ਸਫਲਤਾ ਦੇ ਲਈ ਆਤਮ-ਚਿੰਤਨ ਸਭ ਤੋਂ ਸਰਲ ਅਤੇ ਉੱਤਮ ਉਪਾਅ ਹੈ। ਤੁਸੀਂ ਸਵੇਰੇ ਜਲਦੀ ਉੱਠਦੇ ਹੋ, ਜੇ ਨਹੀਂ ਉੱਠਦੇ ਤਾਂ ਉੱਠੋ। ਸਵੇਰੇ ਉੱਠ ਕੇ ਸ਼ੁੱਧ ਹਵਾ ਵਿੱਚ ਟਹਿਲਣ ਜਾਓ। ਸ਼ਾਂਤ ਸਥਾਨ ’ਤੇ ਬੈਠ ਕੇ ਆਪਣੇ-ਆਪ ਨੂੰ ਕਹੋ – “ਮੈਂ ਹਰੇਕ ਹਾਲਾਤ ਦਾ ਮੁਕਾਬਲਾ ਸ਼ਾਂਤ ਮਨ, ਵਿਵੇਕ ਅਤੇ ਬੁੱਧੀ ਨਾਲ ਕਰਾਂਗਾ। ਮੈਂ ਅੱਗੇ ਵਧ ਰਿਹਾ ਹਾਂ ਅਤੇ ਲਗਾਤਾਰ ਵਧਦਾ ਜਾਵਾਂਗਾ।” ਇਸ ਪ੍ਰਤਿਗਿਆ ਨਾਲ ਤੁਹਾਡੀ ਆਤਮ ਸ਼ਕਤੀ ਵਧਦੀ ਹੈ। ਆਤਮ ਸੁਧਾਰ ਹੋਵੇਗਾ। ਤੁਹਾਡੀ ਤਰੱਕੀ ਹੁੰਦੀ ਚਲੀ ਜਾਵੇਗੀ।
ਤੁਸੀਂ ਵੱਡੇ ਕੰਮ ਕਰਨ ਲਈ ਪੈਦਾ ਹੋਏ ਹੋ,ਤੁਸੀਂ ਬੁਰੇ ਕੰਮ ਕਰਕੇ ਬਦਨਾਮ ਹੋ ਕੇ ਜਿਊਣ, ਅਪਰਾਧ ਕਰਕੇ ਖੁਦ ਨੂੰ ਛੋਟਾ ਬਣਾਉਣ ਜਾਂ ਗਰੀਬ ਬਣ ਕੇ ਤਰਸਯੋਗ ਸਥਿਤੀ ਵਿੱਚ ਜੀਣ ਲਈ ਦੁਨੀਆਂ ਵਿੱਚ ਨਹੀਂ ਆਏ ਹੋ। ਤੁਸੀਂ ਮਨੁੱਖ ਹੋ। ਮਨੁੱਖ ਹੀ ਈਸ਼ਵਰ ਦੀ ਸਰਵ ਸ੍ਰੇਸ਼ਠ ਰਚਨਾ ਹੈ। ਉਹ ਈਸ਼ਵਰ ਦੇ ਸਭ ਤੋਂ ਨੇੜੇ ਹੈ। ਉਸ ਨੂੰ ਦੀਨ-ਹੀਣ ਜਾਂ ਗਿਰਿਆ ਹੋਇਆ ਨਹੀਂ ਹੋਣਾ ਚਾਹੀਦਾ। ਜੋ ਮਨੁੱਖ ਹੱਸਦੇ ਹੱਸਦੇ ਕੰਮ ਕਰਦੇ ਹਨ ਅਤੇ ਕੰਮ ਨੂੰ ਆਪਣੇ ਜੀਵਨ ਦਾ ਅੰਗ ਸਮਝ ਕੇ ਕਰਦੇ ਹਨ, ਉਹ ਹੀ ਮਹਾਨ ਬਣਦੇ ਹਨ। ਵਾਸਤਵਿਕ ਵਿੱਚ ਸਫ਼ਲਤਾ ਦਾ ਮਾਰਗ ਪ੍ਰਸੰਨਤਾ ਪੂਰਵਕ ਕੀਤੀ ਗਈ ਮਿਹਨਤ ਹੈ। ਜੇਕਰ ਤੁਸੀਂ ਕੋਈ ਵੀ ਕੰਮ ਰੁਚੀ ਨਾਲ ਨਹੀਂ ਕਰਦੇ, ਤੁਸੀਂ ਸਫਲ ਨਹੀਂ ਹੋ ਸਕਦੇ। ਇੱਛਾ ਸ਼ਕਤੀ, ਮਾਨਸਿਕ ਸ਼ਕਤੀ ਅਤੇ ਸਾਰੀਆਂ ਸਰੀਰਕ ਸ਼ਕਤੀਆਂ ਮਿਲ ਕੇ ਹੀ ਮਜ਼ਬੂਤ ਇਰਾਦੇ ਦੀ ਨੀਂਹ ਰੱਖਦੀਆਂ ਹਨ ਅਤੇ ਸੰਕਲਪ ਦੀ ਪ੍ਰਾਪਤੀ ਦੀ ਕੁੰਜੀ ਹਨ।
ਲੋਕ ਦੂਸਰਿਆਂ ਦੀ ਤਰੱਕੀ ਦੇਖ ਕੇ ਅਕਸਰ ਸੋਚਦੇ ਹਨ ਕਿ ਉਹ ਇੰਨੀ ਜਲਦੀ ਉਚਾਈ ’ਤੇ ਕਿਵੇਂ ਪਹੁੰਚ ਗਏ। ਉਹ ਲੋਕ ਇਹ ਨਹੀਂ ਸੋਚਦੇ, ਜੋ ਸਥਾਨ ਉਨ੍ਹਾਂ ਨੇ ਪਾਇਆ ਹੈ, ਉਹ ਉਨ੍ਹਾਂ ਨੇ ਵਰ੍ਹਿਆਂ ਦੀ ਕਠੋਰ ਤਪੱਸਿਆ ਨਾਲ ਪ੍ਰਾਪਤ ਕੀਤਾ ਹੈ। ਉਨ੍ਹਾਂ ਨੇ ਰਾਤਾਂ ਨੂੰ ਜਗਰਾਤਾ ਕੱਟਿਆ ਹੈ। ਸਾਰਾ ਸਾਰਾ ਦਿਨ ਮਨ ਲਗਾ ਕੇ ਕੰਮ ਕੀਤਾ ਹੈ। ਇਹ ਮੰਨਿਆ ਗਿਆ ਸਿਧਾਂਤ ਹੈ, ਜਿਸਦਾ ਧਿਆਨ ਤੁਸੀਂ ਰੱਖੋਗੇ, ਉਹ ਤੁਹਾਡਾ ਧਿਆਨ ਰੱਖੇਗਾ। ਜੇ ਤੁਸੀਂ ਕੰਮ ਦਾ ਧਿਆਨ ਰੱਖੋਗੇ ਤਾਂ ਕੰਮ ਤੁਹਾਡਾ ਧਿਆਨ ਰੱਖੇਗਾ। ਕਿਉਂਕਿ ਕੰਮ ਹੀ ਪੂਜਾ ਹੈ। ਧਰਮ ਸਮਝ ਕੇ ਕੀਤਾ ਗਿਆ ਕੰਮ ਪ੍ਰਸੰਨਤਾ ਦਿੰਦਾ ਹੈ ਅਤੇ ਫਲ ਵੀ। ਸੋ ਅਗਰ ਤੁਸੀਂ ਕੁਝ ਬਣਨਾ ਚਾਹੁੰਦੇ ਹੋ ਤਾਂ ਦ੍ਰਿੜ੍ਹ ਇਰਾਦੇ ਅਤੇ ਪ੍ਰਸੰਨਤਾ ਪੂਰਵਕ ਕੰਮ ਕਰੋ। ਮਜ਼ਬੂਤ ਇਰਾਦੇ ਵਾਲੇ ਲੋਕਾਂ ਨੂੰ ਮੰਜ਼ਿਲ ’ਤੇ ਪਹੁੰਚਣ ਤੋਂ ਕੋਈ ਰੋਕ ਨਹੀਂ ਸਕਦਾ। ਆਓ ਮਜ਼ਬੂਤ ਇਰਾਦੇ ਲੈ ਕੇ ਚੱਲੀਏ ਅਤੇ ਮਹਾਨ ਇਨਸਾਨ ਬਣੀਏ।
* * * * *
ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
(4772)
(ਸਰੋਕਾਰ ਨਾਲ ਸੰਪਰਕ ਲਈ: (