“ਸਵੇਰੇ ਇੱਕ ਜਾਣਕਾਰ ਮੁਲਾਜ਼ਮ ਰਾਹੀਂ ਸਬੰਧਤ ਬਿਜਲੀ ਸੈਂਟਰ ਵਿੱਚੋਂ ਪਤਾ ਲੱਗਿਆ ਕਿ ...”
(15 ਅਪਰੈਲ 2025)

ਸਰਕਾਰਾਂ ਦੁਆਰਾ ਔਨਲਾਇਨ ਸ਼ਿਕਾਇਤਾਂ ਵਾਰੇ ਬਹੁਤ ਢੰਡੋਰਾ ਪਿੱਟਿਆ ਜਾਂਦਾ ਹੈ ਕਿ ਘਰ ਬੈਠੇ ਤੁਹਾਡੀਆਂ ਸ਼ਿਕਾਇਤਾਂ ਅਤੇ ਮਸਲਿਆਂ ਦਾ ਹੱਲ ਹੋ ਜਾਵੇਗਾ ਪਰ ਅਸਲ ਵਿੱਚ ਇਹ ਉੰਨੀਆਂ ਕਾਰਗਰ ਨਹੀਂ ਹੁੰਦੀਆਂ, ਜਿੰਨਾ ਇਨ੍ਹਾਂ ਵਾਰੇ ਪ੍ਰਚਾਰਿਆ ਜਾਂਦਾ ਹੈ। ਮਾਰਚ ਮਹੀਨੇ ਦੇ ਅੱਧ ਦੀ ਗੱਲ ਹੈ, ਰਾਤ ਸਾਢੇ ਅੱਠ ਵਜੇ ਮਾਮੂਲੀ ਮੀਂਹ ਅਤੇ ਹਨੇਰੀ ਕਾਰਨ ਸਾਡੇ ਪਿੰਡ ਦੀ ਬਿਜਲੀ ਚਲੀ ਗਈ। ਸਵੇਰੇ ਬਾਹਰ ਜਾਣ ਦੇ ਪ੍ਰੋਗਰਾਮ ਕਾਰਨ ਮੈਂ ਪ੍ਰੈੱਸ ਆਦਿ ਕਰਨੀ ਸੀ ਇਸ ਲਈ ਘੰਟੇ ਕੁ ਦੀ ਉਡੀਕ ਤੋਂ ਬਾਅਦ ਮੈਂ 1912 ’ਤੇ ਸ਼ਿਕਾਇਤ ਦਰਜ਼ ਕਰਾ ਦਿੱਤੀ। ਤੁਰੰਤ ਬਾਅਦ ਸ਼ਿਕਾਇਤ ਦਰਜ (Register), ਫਿਰ ਕੰਮ ਚੱਲ ਰਿਹਾ ਹੈ (Work in progress) ਅਤੇ ਕੁਝ ਸਮੇਂ ਬਾਅਦ ਸ਼ਿਕਾਇਤ ਹੱਲ (Resolved) ਦਾ ਸੁਨੇਹਾ ਵੀ ਆ ਗਿਆ ਪਰ ਬਿਜਲੀ ਆਉਣ ਦਾ ਕੋਈ ਨਾਂ ਨਿਸ਼ਾਨ ਨਹੀਂ ਸੀ। ਦੁਬਾਰਾ ‘ਤਸੱਲੀ ਨਹੀਂ’ (Not Satisfied) ਦੀ ਬੇਨਤੀ ਪਾਉਣ ’ਤੇ ਸਬੰਧਤ ਬਿਜਲੀ ਗਰਿੱਡ ਦੇ ਸ਼ਿਕਾਇਤ ਸੈਂਟਰ ਨਾਲ ਗੱਲ ਕਰਨ ਲਈ ਮੋਬਾਇਲ ਨੰਬਰ ਮੈਸੇਜ ਰਾਹੀਂ ਭੇਜ ਦਿੱਤਾ ਗਿਆ। ਉਸ ਨੰਬਰ ’ਤੇ ਗੱਲ ਕਰਨ ’ਤੇ ਪਤਾ ਲੱਗਿਆ ਕਿ ਉਹਨਾਂ ਨੂੰ ਕੋਈ ਜਾਣਕਾਰੀ ਹੀ ਨਹੀਂ ਸੀ ਕਿ ਫਲਾਣੇ ਪਿੰਡ ਵਿੱਚ ਪਿਛਲੇ ਤਿੰਨ ਘੰਟਿਆਂ ਤੋਂ ਬਿਜਲੀ ਗੁੱਲ ਹੈ। ਮੇਰੇ ਪੂਰੀ ਗੱਲ ਦੱਸਣ ’ਤੇ ਉਹਨਾਂ ਸਬੰਧਤ ਕਰਮਚਾਰੀਆਂ ਨਾਲ ਗੱਲ ਕਰਕੇ ਦੱਸਣ ਲਈ ਕਿਹਾ ਪਰ ਉਨ੍ਹਾਂ ਆਪਣੇ-ਆਪ ਕੋਈ ਜਾਣਕਾਰੀ ਨਾ ਦਿੱਤੀ। ਦੁਬਾਰਾ ਫੋਨ ਕਰਨ ’ਤੇ ਉਹਨਾਂ ਦੱਸਿਆ ਕਿ ਡਿਊਟੀ ਕਰਮਚਾਰੀਆਂ ਨੇ ਫੋਨ ਹੀ ਨਹੀਂ ਚੁੱਕਿਆ। ਇਨਵਰਟਰ ’ਤੇ ਪੱਖਾ ਚਲਦਾ ਹੋਣ ਕਾਰਨ ਮੈਂ ਇਹ ਸੋਚ ਕੇ ਸੌਂ ਗਿਆ ਕਿ ਸਵੇਰ ਤਕ ਤਾਂ ਲਾਇਟ ਆ ਹੀ ਜਾਵੇਗੀ, ਕੱਪੜੇ ਪ੍ਰੈੱਸ ਸਵੇਰੇ ਕਰ ਲਵਾਂਗਾ।

ਹੱਦ ਉਦੋਂ ਹੋ ਗਈ ਜਦੋਂ ਸਵੇਰ ਤਕ ਬਿਜਲੀ ਨਾ ਆਉਣ ਕਾਰਨ ਦੁਬਾਰਾ ਸ਼ਿਕਾਇਤ ਕਰਨ ਤੋਂ ਬਾਅਦ ਪਹਿਲਾਂ ਕੱਟ ਤੋਂ ਬਾਅਦ ਬਹਾਲ (Restored after shutdown) ਦਾ ਸੁਨੇਹਾ ਆਇਆ ਅਤੇ ਦੁਬਾਰਾ ਸਵਾ ਸੱਤ ਵਜੇ ਫਿਰ ਹੱਲ (Resolved) ਦਾ ਮੈਸੇਜ ਆ ਗਿਆ। ਰਾਤ (ਸੌਣ ਤੋਂ ਬਾਅਦ) ਨੂੰ ਆਏ ਸੁਨੇਹੇ ਚੈੱਕ ਕਰਨ ’ਤੇ ਦੇਖਿਆ ਕਿ ਦੋ ਹੋਰ ਸੁਨੇਹੇ; ਸ਼ਿਕਾਇਤ ਸਬੰਧਤ ਐੱਸ ਡੀ ਓ ਨੂੰ ਭੇਜਣ (Escalated to concerned SDO) ਅਤੇ ਸ਼ਿਕਾਇਤ ਸਬੰਧਤ ਸੀਨੀਅਰ ਐਕਸੀਅਨ ਨੂੰ ਭੇਜਣ (Esca।ated to concerned Sr Xen) ਦੇ ਵੀ ਆਏ ਹੋਏ ਸਨ ਪਰ ਨਾ ਕਿਸੇ ਦੀ ਮਿੱਸ ਕਾਲ, ਨਾ ਕਾਲ ਅਤੇ ਨਾ ਹੀ ਬਿਜਲੀ ਆਉਣ ਨਾ ਆਉਣ ਸਬੰਧੀ ਕੋਈ ਹੋਰ ਜਾਣਕਾਰੀ ਮੁਹਈਆ ਕਰਵਾਈ ਗਈ! ਜਦੋਂ ਕਿ ਬਿਜਲੀ ਸਵੇਰੇ ਨੌਂ ਵਜੇ ਆਈ।

ਸਵੇਰੇ ਇੱਕ ਜਾਣਕਾਰ ਮੁਲਾਜ਼ਮ ਰਾਹੀਂ ਸਬੰਧਤ ਬਿਜਲੀ ਸੈਂਟਰ ਵਿੱਚੋਂ ਪਤਾ ਲੱਗਿਆ ਕਿ ਰਾਤ ਸਾਢੇ ਅੱਠ ਵਜੇ ਫਾਲਟ ਪਿਆ ਸੀ ਅਤੇ ਪਿੰਡ ਵਿੱਚ ਰਾਤ ਦੀ ਡਿਊਟੀ ਲਈ ਮੁਲਾਜ਼ਮ ਨਾ ਹੋਣ ਕਾਰਨ ਇਹ ਸਵੇਰੇ ਠੀਕ ਕੀਤਾ ਗਿਆ ਹੈ। ਸੋਚਣ ਵਾਲੀ ਗੱਲ ਇਹ ਹੈ ਕਿ ਬਿਜਲੀ ਗੁੱਲ ਹੋਣ ਦਾ ਕਾਰਨ ਕੀ ਸੀ ਅਤੇ ਸੁਨੇਹਿਆਂ ਰਾਹੀਂ ਜਾਣਕਾਰੀ ਕੀ ਦਿੰਦੇ ਰਹੇ! ਸ਼ਿਕਾਇਤ ਦਾ ਹੱਲ ਕਰਨਾ ਦੂਰ ਦੀ ਗੱਲ, “ਵਰਤੋਂਕਾਰ’ ਨੂੰ ਸਹੀ ਜਾਣਕਾਰੀ ਵੀ ਨਹੀਂ ਦਿੱਤੀ ਗਈ। ਕੰਪਿਊਟਰਾਈਜ਼ਡ ਸੁਨੇਹਿਆਂ ਰਾਹੀਂ ਗੁਮਰਾਹਕੁੰਨ ਜਾਣਕਾਰੀ ਦਿੱਤੀ ਜਾਂਦੀ ਰਹੀ।

ਇਸੇ ਤਰ੍ਹਾਂ ਅੱਜ ਕੱਲ੍ਹ ਇਰਾਨ-ਇਜ਼ਰਾਇਲ-ਅਮਰੀਕਾ ਵਿਚਕਾਰ ਚੱਲ ਰਹੀ ਜੰਗ ਕਾਰਨ ਹੋਈ ਗੈਸ ਕਿੱਲਤ ਦੇ ਸਬੰਧ ਵਿੱਚ ਹੋ ਰਿਹਾ ਹੈ। ਸਿਲੰਡਰ ਬੁੱਕਿੰਗ ਵਾਲੇ ਔਨਲਾਇਨ ਨੰਬਰ ਜ਼ਿਆਦਾਤਰ ਰੁੱਝੇ ਹੀ ਰਹਿੰਦੇ ਹਨ ਅਤੇ ਸ਼ਿਕਾਇਤ ਵਾਲੇ ਨੰਬਰ ਤਾਂ ਮਿਲਦੇ ਹੀ ਨਹੀਂ। ਕੀ ਔਨਲਾਇਨ ਸ਼ਿਕਾਇਤ ਪੋਰਟਲ ਨੰਬਰ ਸਿਰਫ ਟਾਈਮ ਪਾਸ ਲਈ ਹੀ ਹਨ?

*       *       *       *       *

ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
ਪਾਠਕਾਂ ਨਾਲ ਆਪਣੇ ਵਿਚਾਰ ਸਾਂਝੇ ਕਰਨ ਲਈ ਸਰੋਕਾਰ ਨਾਲ ਸੰਪਰਕ ਕਰੋ: (This email address is being protected from spambots. You need JavaScript enabled to view it.om)