“ਅੱਜ ਗੁਜਰਾਤ ਦੇ ਸੂਰਤ ਅਤੇ ਮੱਧ ਪ੍ਰਦੇਸ਼ ਦੇ ਇੰਦੌਰ ਲੋਕ ਸਭਾ ਹਲਕੇ ਅੰਦਰ ਜੋ ਹੋਇਆ ਹੈ, ਉਹ ਹਰ ਕਿਸਮ ਦੇ ਵਿਰੋਧ ...”
(24 ਮਈ 2024)
ਇਸ ਸਮੇਂ ਪਾਠਕ: 370.
ਭਾਰਤ ਅੰਦਰ ਜਮਹੂਰੀ, ਜਮਹੂਰੀਅਤ, ਜਮਹੂਰੀ ਢੰਗ-ਤਰੀਕਾ, ਜਮਹੂਰੀ ਚੋਣਾਂ, ਜਮਹੂਰੀ ਪਾਰਲੀਮਾਨੀ ਢਾਂਚਾ ਹੋਣ ਦਾ ਰਾਗ ਹਰ ਪਾਸਿਓਂ ਹੀ ਅੱਜ ਕੱਲ੍ਹ ਸੁਣਾਈ ਦੇ ਰਿਹਾ ਹੈ। ਲੇਕਿਨ ਜਮਹੂਰੀਅਤ ਦਾ ਹੋਕਾ ਇਸ ਮੁਲਕ ਦੇ ਲੋਕਾਂ ਦੀ ਜ਼ਿੰਦਗੀ ਦੀ ਬਿਹਤਰੀ ਕਰਨ ਦੇ ਤਾਂ ਰਾਸ ਨਹੀਂ ਆਇਆ, ਉਲਟਾ ਲੋਕਾਂ ਦੀ ਹਾਲਤ ਤਾਂ 1947 ਤੋਂ ਵੀ ਪਹਿਲਾਂ ਵਾਲੀ ਅੰਗਰੇਜ਼ ਬਸਤੀਵਾਦੀਆਂ ਦੇ ਸਿੱਧੇ ਰਾਜ ਵਾਲੇ ਸਮੇਂ ਨਾਲੋਂ ਵੀ ਬਦਤਰ ਹੋਈ ਪਈ ਹੈ।
ਹਕੀਕੀ ਰੂਪ ਵਿੱਚ ਹਾਕਮ ਜਮਾਤਾਂ ਲਈ ਜਮਹੂਰੀਅਤ ਦਾ ਝੰਡਾ ਚੁੱਕਣ ਵਾਲੀਆਂ ਰਵਾਇਤੀ ਸਿਆਸੀ ਪਾਰਟੀਆਂ ਹਰ ਪੱਧਰ ਦੀਆਂ ਚੋਣਾਂ ਅੰਦਰ ਆਪਣੀ ਜਿੱਤ ਹਾਸਲ ਕਰਨ ਲਈ ਜਾਂ ਜਿੱਤ ਯਕੀਨੀ ਬਣਾਉਣ ਲਈ ਹਰ ਕਿਸਮ ਦੇ ਹੱਥਕੰਡੇ ਅਪਣਾਉਂਦੀਆਂ ਹਨ। ਹਕੂਮਤੀ ਕੁਰਸੀ ’ਤੇ ਬਿਰਾਜਮਾਨ ਸਿਆਸੀ ਪਾਰਟੀ ਕੋਲ ਬਾਕੀ ਦੀਆਂ ਪਾਰਟੀਆਂ ਦੇ ਮੁਕਾਬਲੇ ਵੋਟ ਸਿਆਸਤ ਨੂੰ ਆਪਣ ਹੱਕ ਵਿੱਚ ਭੁਗਤਾਉਣ ਲਈ ਅਨੇਕਾਂ ਕਿਸਮ ਦੇ ਸੰਦ-ਸੰਦੇੜੇ ਮੌਜੂਦ ਹੁੰਦੇ ਹਨ। ਇਹਨਾਂ ਵਿੱਚ ਵੋਟਰਾਂ ਨੂੰ ਵੋਟਾਂ ਪਾਉਣ ਤੋਂ ਰੋਕਣਾ, ਪੋਲਿੰਗ ਸਟੇਸ਼ਨਾਂ ਤੇ ਪੋਲਿੰਗ ਬੂਥਾਂ ਨੂੰ ਕਬਜ਼ੇ ਹੇਠ ਲੈ ਕੇ ਆਪਣੇ ਪਸੰਦੀਦਾ ਉਮੀਦਵਾਰ ਦੇ ਹੱਕ ਵਿੱਚ ਵੋਟਾਂ ਪੋਲ ਕਰਨੀਆਂ, ਵੋਟਰਾਂ ਨੂੰ ਆਪਣੇ ਹੱਕ ਵਿੱਚ ਭੁਗਤਾਉਣ ਲਈ ਫਿਰਕੇ, ਧਰਮ, ਇਲਾਕੇ, ਜਾਤ-ਬਰਾਦਰੀ ਆਦਿ ਦੇ ਹੋਕਰੇ ਮਾਰਨੇ, ਆਪਣੇ ਵਿਰੋਧੀ ਉਮੀਦਵਾਰਾਂ ਨੂੰ ਕੁਰਸੀ ਦਾ ਲਾਲਚ ਦੇ ਕੇ, ਪੈਸੇ ਨਾਲ ਖਰੀਦਕੇ ਅਤੇ ਇਨਕਮ ਟੈਕਸ, ਈਡੀ, ਐਨਆਈਏ ਤੇ ਹੋਰ ਸਰਕਾਰੀ ਸੰਸਥਾਨਾਂ ਦੇ ਛਾਪਿਆਂ ਦੇ ਡਰਾਵੇ ਦੇ ਕੇ ਸ਼ਾਂਤ ਕਰਨਾ ਤਾਂ ਇਹਨਾਂ ਹਰ ਰੰਗ ਵਿੱਚ ਰੰਗੀਆਂ ਸਿਆਸੀ ਪਾਰਟੀਆਂ ਦਾ ਮਨਭਾਉਂਦਾ ਖੇਡ-ਤਮਾਸ਼ਾ ਹੈ।
2024 ਦੀਆਂ ਪਾਰਲੀਮਾਨੀ ਚੋਣਾਂ ਅੰਦਰ ਅਜਿਹੇ ਸੱਭੇ ਰੰਗਾਂ ਦੀ ਬੈਂਗਣੀ ਲੋਕਾਂ ਦੀ ਕਚਹਿਰੀ ਅੰਦਰ ਉੱਘੜਕੇ ਸਾਹਮਣੇ ਹਾਜ਼ਰ ਹੋਈ ਹੈ। ਪਰ ਜਿਵੇਂ-ਜਿਵੇਂ ਹਾਕਮ ਜਮਾਤਾਂ ਦਾ ਆਲਮੀ ਪੱਧਰ ਅਤੇ ਕੌਮੀ ਪੱਧਰ ’ਤੇ ਵੀ ਸਿਆਸੀ ਤੇ ਆਰਥਿਕ ਸੰਕਟ ਕਿਸੇ ਢੁਕਵੇਂ ਹੱਲ ਦੇ ਨੇੜ-ਤੇੜ ਵੀ ਨਹੀਂ ਦਿਸ ਰਿਹਾ ਤਾਂ ਇਹਨਾਂ ਜਮਾਤਾਂ ਅੰਦਰ ਵੀ ਗਲ ਵੱਢਵੀਂ ਲੜਾਈ ਜ਼ੋਰ ਫੜ ਰਹੀ ਹੈ।
22 ਅਪਰੈਲ 2024 ਨੂੰ ਗੁਜਰਾਤ ਦੇ ਸੂਰਤ ਲੋਕ ਸਭਾ ਹਲਕੇ ਤੋਂ ਭਾਜਪਾ ਦੇ ਉਮੀਦਵਾਰ ਨੂੰ ਚੋਣ ਅਧਿਕਾਰੀ ਨੇ ਬਿਨਾਂ ਮੁਕਾਬਲਾ ਜੇਤੂ ਕਰਾਰ ਦੇ ਦਿੱਤਾ। 2024 ਦੀਆਂ ਇਹਨਾਂ ਪਾਰਲੀਮਾਨੀ ਚੋਣਾਂ ਅੰਦਰ ਭਾਜਪਾ ਦੀ ਇਹ ਪਹਿਲੀ ਜਿੱਤ ਹੈ। ਬਿਨਾਂ ਕਿਸੇ ਮੁਕਾਬਲੇ ਤੋਂ ਹੀ ਸੂਰਤ ਦੇ ਲੋਕਾਂ ਤੇ ਵੋਟਰਾਂ ਦੀ ਕਿਸੇ ਕਿਸਮ ਦੀ ਸ਼ਮੂਲੀਅਤ ਅਤੇ ਰਜ਼ਾ ਤੋਂ ਬਿਨਾਂ ਹੀ ਭਾਜਪਾ ਦੀ ਟਿਕਟ ’ਤੇ ਚੋਣ ਲੜਨ ਦੇ ਇੱਛਕ ਵਿਅਕਤੀ ਨੂੰ ਹੀ ਪਾਰਲੀਮੈਂਟ ਦਾ ਪਲੇਠਾ ਮੈਂਬਰ ‘ਚੁਣ’ ਦਿੱਤਾ ਗਿਆ ਹੈ। ਮੱਧ ਪ੍ਰਦੇਸ਼ ਦੇ ਇੰਦੌਰ ਲੋਕ ਸਭਾ ਸੀਟ ਤੋਂ ਵੀ ਅਜਿਹਾ ਹੀ ਕਾਂਡ ਦੁਹਰਾ ਦਿੱਤਾ ਹੈ। ਪਾਰਲੀਮਾਨੀ ਜਮਹੂਰੀਅਤ ਦਾ ਇਹ ਨੰਗਾ ਨਾਚ ਹੈ, ਜਿਸਦੇ ਵਿੱਚੋਂ ਲੋਕ ਮਨਫੀ ਹਨ ਅਤੇ ਪੈਸਾ-ਟਕਾ ਤੇ ਤਾਕਤਵਰ-ਸਾਧਨ-ਸੰਪੰਨ ਹੋਣਾ ਹੀ ਹਰ ਸ਼ੈਅ ਹੈ, ਜੋ ਕਿ ਮਾਅਨੇ ਰੱਖਦੀ ਹੈ।
ਆਪਣੇ ਵਿਰੋਧੀਆਂ ਨੂੰ ਗੁੱਠੇ ਲਾਉਣ ਲਈ ਇਸ ਵਰਤਾਰੇ ਨਾਲ ਜੁੜੀ ਹੋਈ ਭਾਜਪਾ ਦੇ ‘ਕਾਂਗਰਸ-ਮੁਕਤ ਭਾਰਤ’ ਵਾਲੇ ਨਾਅਰੇ ਅੰਦਰ ਛੁਪੀ ਹੋਈ ਹਕੀਕਤ ਨੂੰ ਵੀ ਸਮਝਣ ਦੀ ਲੋੜ ਹੈ। ਜਿਵੇਂ ਕਿ ਦੇਖਣ ਵਿੱਚ ਆਇਆ ਹੈ ਕਿ ਸੰਕਟ ਮੂੰਹ ਆਈਆਂ ਹਾਕਮ ਜਮਾਤਾਂ ਹਰ ਹੀਲੇ ਆਪਣੇ ਹਿਤਾਂ ਨੂੰ ਸੁਰੱਖਿਅਤ ਕਰਨ ਲਈ ਤਹੂ ਹਨ। ਅਜਿਹੇ ਹਾਲਤ ਵਿੱਚ ਉਹ ਕਿਸੇ ਵੀ ਹੱਦ ਤਕ ਜਾ ਕੇ ਆਪਣੀ ਚਹੇਤੀ ‘ਜਮਹੂਰੀਅਤ’ ਨੂੰ ਹੀ ਪੂਰੀ ਤਰ੍ਹਾਂ ਤੱਜ ਸਕਦੀਆਂ ਹਨ।
ਅੱਜ ਗੁਜਰਾਤ ਦੇ ਸੂਰਤ ਅਤੇ ਮੱਧ ਪ੍ਰਦੇਸ਼ ਦੇ ਇੰਦੌਰ ਲੋਕ ਸਭਾ ਹਲਕੇ ਅੰਦਰ ਜੋ ਹੋਇਆ ਹੈ, ਉਹ ਹਰ ਕਿਸਮ ਦੇ ਵਿਰੋਧ ਤੇ ਵਿਰੋਧੀਆਂ ਦਾ ਹੀ ਗਲਾ ਘੁੱਟਣਾ ਹੈ ਅਤੇ ਮੁਲਕ ਦੇ ਸਮੁੱਚੇ ਢਾਂਚੇ ਨੂੰ ਭਗਵੇਂ ਰੰਗ ਵਿੱਚ ਰੰਗਣਾ ਹੈ। ਸੂਰਤ ਵਿੱਚ ਵਿਰੋਧੀ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਤੇ ਕਵਰਿੰਗ ਉਮੀਦਵਾਰ ਦੇ ਨਾਮਜ਼ਦਗੀ ਪੇਪਰਾਂ ਵਿੱਚ ਖਾਮੀਆਂ ਹੋਣ ਕਾਰਨ ਉਹਨਾਂ ਨੂੰ ਰੱਦ ਕਰ ਦਿੱਤਾ ਗਿਆ ਅਤੇ ਹੋਰਨਾਂ ਉਮੀਦਵਾਰਾਂ ਨੂੰ ਡਰਾ-ਧਮਕਾ ਕੇ ਅਤੇ ਲਾਲਚ ਦੇ ਕੇ ਉਹਨਾਂ ਨੂੰ ਆਪਣੇ ਨਾਮਜ਼ਦਗੀ ਪੇਪਰਾਂ ਨੂੰ ਵਾਪਸ ਲੈਣ ਲਈ ਮਜਬੂਰ ਕਰਕੇ ਇਕੱਲੀ ਭਾਜਪਾ ਦੇ ਉਮੀਦਵਾਰ ਦੇ ਨਾਮਜ਼ਦਗੀ ਪਰਚੇ ਦੇ ਹੀ ਦਰੁਸਤ ਪਾਏ ਜਾਣ ਦੀ ਸੂਰਤ ਵਿੱਚ ਸੂਰਤ-ਏ-ਹਾਲ ਭਾਜਪਾ ਹੀ ਸੂਰਤ ਲੋਕ ਸਭਾ ਹਲਕੇ ਤੋਂ ਜੇਤੂ ਕਰਾਰ ਦੇ ਦਿੱਤੀ ਗਈ। ਮੋਦੀ ਦੀ ਅਗਵਾਈ ਵਾਲੀ ਭਾਜਪਾ ਸਰਕਾਰ ਜਿਸ ਢੰਗ ਨਾਲ ਜ਼ਿੰਦਗੀ ਦੇ ਹਰ ਖੇਤਰ ਅੰਦਰ ਫਾਸ਼ੀਵਾਦ ਨੂੰ ਫੈਲਾ ਰਹੀ ਹੈ, ਉਹ ਦਿਨ ਦੂਰ ਨਹੀਂ, ਜਦੋਂ ਮਨੂਵਾਦੀ ਸੰਵਿਧਾਨ ਲਾਗੂ ਕਰਦਿਆਂ ਨਾਮ-ਨਿਹਾਦ ਜਮਹੂਰੀਅਤ ਦੀ ਸਫ ਵੀ ਵਲੇਟ ਦਿੱਤੀ ਜਾਵੇਗੀ ਅਤੇ ਫਾਸ਼ੀਵਾਦੀ ਡਿਕਟੇਟਰਸ਼ਿੱਪ ਲਾਗੂ ਕਰ ਦਿੱਤੀ ਜਾਵੇਗੀ।
* * * * *
ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
(4993)
(ਸਰੋਕਾਰ ਨਾਲ ਸੰਪਰਕ ਲਈ:(This email address is being protected from spambots. You need JavaScript enabled to view it.)
