“ਸਰਕਾਰ ਨੂੰ ਇੱਕ ਪਾਸਿਓਂ ਭ੍ਰਿਸ਼ਟ ਲੋਕਾਂ ’ਤੇ ਛਾਣਨੀ ਲਾਉਣੀ ਚਾਹੀਦੀ ਹੈ। ਇਕੱਲੇ ਇਕੱਲੇ ਦੀ ਜਾਇਦਾਦ ...”
(11 ਮਈ 2022)
ਮਹਿਮਾਨ: 48.
ਜਿਵੇਂ ਕਹਿੰਦੇ ਹਨ ਕਿ ਘਰ ਦੇ ਭੇਤੀ ਤੋਂ ਬਿਨਾਂ ਕੋਈ ਚੋਰ ਚੋਰੀ ਨਹੀਂ ਕਰ ਸਕਦਾ, ਬਿਲਕੁਲ ਇਸੇ ਤਰ੍ਹਾਂ ਭ੍ਰਿਸ਼ਟ ਅਧਿਕਾਰੀ ਤੇ ਕਰਮਚਾਰੀ ਕਿਸੇ ਨਾ ਕਿਸੇ ਰਾਹੀਂ ਰਿਸ਼ਵਤ ਲੈਂਦੇ ਹਨ। ਇਹ ਸਿਲਸਿਲਾ ਕੋਈ ਇੱਕ ਦਿਨ ਵਿੱਚ ਨਹੀਂ ਵਧ ਫੁੱਲ ਗਿਆ, ਸਗੋਂ ਕਈ ਦਹਾਕੇ ਲੱਗ ਗਏ ਹਨ। ਅਫਸਰਾਂ ਨੂੰ ਵੇਖ ਕੇ ਚਪੜਾਸੀ ਵੀ ਰਿਸ਼ਵਤ ਲੈਣ ਲੱਗ ਪਏ ਹਨ। ਹਰ ਮਹਿਕਮੇ ਵਿੱਚ ਇਸਦਾ ਬੋਲਬਾਲਾ ਹੋ ਗਿਆ ਹੈ। ਜਿਹੜਾ ਵੀ ਬੰਦਾ ਸਰਕਾਰੀ ਨੌਕਰੀ ਲੱਗ ਜਾਂਦਾ ਹੈ, ਉਸ ਨੂੰ ਆਪਣੀ ਤਨਖਾਹ ਮਾਮੂਲੀ ਲਗਦੀ ਹੈ। ਫਿਰ ਉਹ ਵੱਧ ਤੋਂ ਵੱਧ ਉੱਪਰੋਂ ਕਮਾਈ ਕਰਨ ਦੀ ਸੋਚਦਾ ਰਹਿੰਦਾ ਹੈ। ਗੱਲ ਭਾਵੇਂ ਕਿਸੇ ਵੀ ਮਹਿਕਮੇ ਦੀ ਕਰ ਲਈਏ, ਢਿੱਲ ਕੋਈ ਵੀ ਨਹੀਂ ਗੁਜ਼ਾਰਦਾ। ਪਰ ਅੱਜ ਮੈਂ ਸਿਰਫ ਪੰਜਾਬ ਪੁਲਿਸ ਦੀ ਹੀ ਗੱਲ ਕਰਨ ਜਾ ਰਿਹਾ ਹਾਂ। ਕਿਉਂਕਿ ਭਗਵੰਤ ਮਾਨ ਦੀ ਸਰਕਾਰ ਨੇ ਆਪਣੇ ਏਜੰਡੇ ਮੁਤਾਬਿਕ ਕੰਮ ਕਰਨ ਦਾ ਮਨ ਬਣਾ ਲਿਆ ਹੈ ਜੋ ਕਿ ਆਮ ਲੋਕਾਂ ਨੂੰ ਬਹੁਤ ਚੰਗਾ ਲੱਗ ਰਿਹਾ ਹੈ।
ਪੰਜਾਬ ਪੁਲਿਸ ਵਿੱਚ ਸਾਰੇ ਲੋਕ ਇੱਕੋ ਜਿਹੇ ਨਹੀਂ ਹਨ। ਬੱਸ ਅਸੀਂ ਤਾਂ ਉਹਨਾਂ ਲੋਕਾਂ ਦੀ ਗੱਲ ਕਰਨੀ ਚਾਹੁੰਦੇ ਹਾਂ ਜਿਹੜੇ ਰਿਸ਼ਵਤ ਨੂੰ ਆਪਣਾ ਹੱਕ ਸਮਝਦੇ ਹਨ। ਮਿਸਾਲ ਦੇ ਤੌਰ ’ਤੇ ਪੰਜਾਬ ਪੁਲਿਸ ਦਾ ਇੱਕ ਸਿਪਾਹੀ ਚਾਹੁੰਦਾ ਹੈ ਕਿ ਮੈਂ ਰਾਤੋ ਰਾਤ ਡੀ ਆਈ ਜੀ ਦੇ ਬਰਾਬਰ ਦੀਆਂ ਸਹੂਲਤਾਂ ਪ੍ਰਾਪਤ ਕਰ ਲਵਾਂ। ਹਰ ਇੱਕ ਮੁਲਾਜ਼ਮ ਦੀ ਤਨਖਾਹ ਵਿੱਚ ਤਾਂ ਪੰਜਾਬ ਵਿੱਚ ਥੋੜ੍ਹਾ ਬਾਹਲਾ ਫਰਕ ਹੀ ਹੁੰਦਾ ਹੈ ਪਰ ਇਕੱਲੀ ਤਨਖਾਹ ਉੱਤੇ ਕੋਈ ਨਿਰਭਰ ਨਹੀਂ ਰਹਿਣਾ ਚਾਹੁੰਦਾ। ਮੁਲਾਜ਼ਮਾਂ ਨੇ ਆਪਣੇ ਖਰਚੇ ਵਧਾ ਲਏ ਹੁੰਦੇ ਹਨ, ਫਿਰ ਉਹ ਲੋਕਾਂ ਦੀਆਂ ਜੇਬਾਂ ’ਤੇ ਧਿਆਨ ਰੱਖਣ ਲੱਗ ਜਾਂਦੇ ਹਨ। ਖਾਸ ਕਰਕੇ ਪੁਲਸੀਏ। ਚੋਰ ਨੂੰ ਫੜ ਵੀ ਲੈਣਗੇ ਤੇ ਫਿਰ ਬਾਹਰ ਦੀ ਬਾਹਰ ਛੱਡ ਵੀ ਦਿੰਦੇ ਹਨ, ਪੈਸੇ ਲੈ ਦੇ ਕੇ। ਚੋਰ ਆਪਣੀ ਥਾਂ ’ਤੇ ਖੁਸ਼ ਹੋ ਜਾਂਦਾ ਹੈ ਤੇ ਪੁਲਿਸ ਆਪਣੀ ਥਾਂ ’ਤੇ।
ਇਸੇ ਤਰ੍ਹਾਂ ਜਦੋਂ ਕਿਸੇ ਕੋਲੋਂ ਨਸ਼ਾ ਫੜ ਲੈਂਦੇ ਹਨ, ਉਸ ਉੱਤੇ ਪਰਚੇ ਵਿੱਚ ਘੱਟ ਹੀ ਪਾਉਂਦੇ ਹਨ, ਰਫ਼ਾ ਦਫ਼ਾ ਕਰਕੇ ਪੈਸੇ ਆਪਸ ਵਿਚ ਵੰਡ ਲੈਂਦੇ ਹਨ। ਪੁਲਸੀਆ ਬੇਸ਼ਕ ਟਰੈਫਿਕ ਉੱਤੇ ਤਾਇਨਾਤ ਹੋਵੇ, ਭਾਵੇਂ ਕਿਸੇ ਥਾਣੇ ਵਿੱਚ, ਭਾਵੇਂ ਜੇਲ੍ਹ ਦੇ ਬਾਹਰਵਾਰ ਜਾਂ ਜੇਲ੍ਹ ਦੇ ਅੰਦਰ ਡਿਊਟੀ ਕਰ ਰਿਹਾ ਹੋਵੇ, ਬੱਸ ਇਹਨਾਂ ਦਾ ਧਿਆਨ ਪੈਸੇ ਕਮਾਉਣ ਵਲ ਹੀ ਹੁੰਦਾ ਹੈ। ਹੁਣੇ ਹੁਣੇ ਇੱਕ ਦਲੇਰ ਜੇਲ੍ਹ ਅਧਿਕਾਰੀ ਨੇ ਹਿੰਮਤ ਵਿਖਾ ਕੇ ਇੱਕ ਕਾਂਸਟੇਬਲ ਦੀ ਪੈਂਟ ਲੁਹਾ ਕੇ ਨਸ਼ਾ ਅੰਦਰ ਲੈ ਕੇ ਜਾਂਦਾ ਫੜ ਲਿਆ। ਅਗਰ ਵੀਡੀਓ ਨਾ ਬਣਦੀ ਤਾਂ ਲੋਕਾਂ ਨੇ ਯਕੀਨ ਨਹੀਂ ਸੀ ਕਰਨਾ।
ਹੁਣ ਲੁਧਿਆਣੇ ਤੋਂ ਖਬਰ ਆ ਰਹੀ ਹੈ ਕਿ ਕਈ ਪੁਲਿਸ ਅਧਿਕਾਰੀ ਅਤੇ ਕਰਮਚਾਰੀ ਮੁਅੱਤਲ ਕੀਤੇ ਗਏ ਹਨ। ਮੈਂ ਸਮਝਦਾ ਹਾਂ ਕਿ ਇਹਨਾਂ ਦੀ ਸਾਰੀ ਦੀ ਸਾਰੀ ਜਾਇਦਾਦ ਕੁਰਕ ਕਰ ਲੈਣੀ ਚਾਹੀਦੀ ਹੈ। ਜਿਹੜੇ ਭ੍ਰਿਸ਼ਟ ਲੋਕਾਂ ਦੇ ਮੂੰਹ ਢਕਦੇ ਹਨ, ਉਹ ਵੀ ਗਲਤ ਗੱਲ ਹੈ। ਇਹਨਾਂ ਲੋਕਾਂ ਦੇ ਚਿਹਰੇ ਤਾਂ ਨੰਗੇ ਕਰਨੇ ਚਾਹੀਦੇ ਹਨ। ਫਿਰ ਇਹਨਾਂ ਦੇ ਚਿਹਰਿਆਂ ’ਤੇ ਪਰਦਾ ਕਿਉਂ। ਸਰਕਾਰ ਨੂੰ ਇੱਕ ਪਾਸਿਓਂ ਭ੍ਰਿਸ਼ਟ ਲੋਕਾਂ ’ਤੇ ਛਾਣਨੀ ਲਾਉਣੀ ਚਾਹੀਦੀ ਹੈ। ਇਕੱਲੇ ਇਕੱਲੇ ਦੀ ਜਾਇਦਾਦ ਦੀ ਛਾਣਬੀਣ ਕਰਕੇ ਸਾਰਾ ਗੰਦ ਸਾਫ ਕਰ ਦੇਣਾ ਚਾਹੀਦਾ ਹੈ। ਅਗਰ ਪੁਲਿਸ ਵਿੱਚੋਂ ਭ੍ਰਿਸ਼ਟਾਚਾਰ ਖਤਮ ਹੋ ਗਿਆ ਤੇ ਸਮਝੋ ਪੰਜਾਬ ਦਾ ਸਾਰਾ ਹੀ ਸਿਸਟਮ ਸੁਧਰ ਜਾਵੇਗਾ।
ਅੱਜ ਸਖਤ ਲੋੜ ਹੈ ਸਾਡੇ ਸਿਸਟਮ ਨੂੰ ਸੁਧਾਰਨ ਦੀ। ਫਿਰ ਹੋ ਸਕਦਾ ਹੈ ਸਾਡੀ ਨੌਜਵਾਨ ਪੀੜ੍ਹੀ ਬਾਹਰ ਜਾਣ ਤੋਂ ਬਚ ਜਾਵੇ। ਬਾਹਰਲੇ ਦੇਸ਼ਾਂ ਵਿੱਚ ਸਾਡੇ ਨਾਲੋਂ ਜ਼ਿਆਦਾ ਕੀ ਹੈ। ਬੱਸ ਇੱਕ ਸਿਸਟਮ ਚੰਗਾ। ਰਿਸ਼ਵਤ ਲੈਣ ਵਾਲੇ ਦੇ ਬਰਾਬਰ ਉੰਨਾ ਹੀ ਦੋਸ਼ੀ ਰਿਸ਼ਵਤ ਦੇਣ ਵਾਲਾ ਵੀ ਹੁੰਦਾ ਹੈ। ਆਓ ਆਪਾਂ ਰਲਕੇ ਸਾਰੇ ਇੱਕ ਮੁੱਠ ਹੋ ਕੇ ਆਵਾਜ਼ ਉਠਾਈਏ। ਭ੍ਰਿਸ਼ਟਾਚਾਰ ਖਤਮ ਕਰਕੇ ਇੱਕ ਨਿਰੋਗ ਸਮਾਜ ਦੀ ਸਿਰਜਣਾ ਕਰੀਏ। ਇਹ ਸਾਡਾ ਸਾਰਿਆਂ ਦਾ ਫਰਜ਼ ਬਣਦਾ ਹੈ। ਭ੍ਰਿਸ਼ਟ ਲੋਕਾਂ ਦੇ ਪਰਦੇ ਫਾਸ਼ ਕਰਕੇ ਇਹਨਾਂ ਨੂੰ ਕਾਨੂੰਨ ਦੇ ਹਵਾਲੇ ਕਰੀਏ। ਆਪਣੀ ਹੱਕ ਦੀ ਕਮਾਈ ਖਾਣਾ ਸਿੱਖੀਏ। ਸਾਡੀ ਧਰਤੀ ਗੁਰੂਆਂ ਪੀਰਾਂ ਪੈਗੰਬਰਾਂ ਅਤੇ ਯੋਧਿਆਂ ਦੀ ਹੈ। ਗੁਰੂ ਨਾਨਕ ਦੇਵ ਦੇਵ ਜੀ ਦੇ ਗੁਰਬਾਣੀ ਵਿੱਚ ਫਰਮਾਨ ਹੈ ਕਿ ਹੱਕ ਪਰਾਇਆ ਨਾਨਕਾ ਉਸ ਸੂਅਰ ਉਸ ਗਾਇ। ਆਪਾਂ ਇਸ ਕਥਨਾ ’ਤੇ ਪਹਿਰਾ ਦੇਈਏ।
ਕਿਸੇ ਵੀ ਮਾਲਾਜ਼ਮ ਨੂੰ ਆਪਣੀ ਅਤੇ ਆਪਣੇ ਮਹਿਕਮੇ ਦੀ ਚੰਦ ਕੁ ਪੈਸਿਆਂ ਪਿੱਛੇ ਬੇਇੱਜ਼ਤੀ ਨਹੀਂ ਕਰਵਾਉਣੀ ਚਾਹੀਦੀ। ਨੌਕਰੀ ਸੌਖੀ ਨਹੀਂ ਮਿਲਦੀ, ਬੜੀਆਂ ਘਾਲਣਾਂ ਘਾਲਣੀਆਂ ਪੈਂਦੀਆਂ ਹਨ। ਅਗਰ ਇੱਕ ਵਾਰ ਨੌਕਰੀ ਹੱਥੋਂ ਚਲੀ ਜਾਵੇ ਤੇ ਫਿਰ ਕੋਈ ਦਿਹਾੜੀ ’ਤੇ ਵੀ ਨਹੀਂ ਲੈ ਕੇ ਜਾਂਦਾ। ਮੈਂ ਬਹੁਤ ਸਾਰੇ ਪੁਲਸੀਆਂ ਦੀ ਹਾਲਤ ਆਪਣੀ ਅੱਖੀਂ ਵੇਖੀ ਹੈ ਜਿਹੜੇ ਰਿਸ਼ਵਤ ਲੈਂਦਿਆਂ ਫੜੇ ਗਏ ਸਨ, ਅੱਜ ਉਹਨਾਂ ਦੇ ਬੱਚੇ ਉਹਨਾਂ ਦੇ ਮੂੰਹ ਉੱਤੇ ਥੁੱਕਦੇ ਪਏ ਹਨ।
*****
ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
(3559)
(ਸਰੋਕਾਰ ਨਾਲ ਸੰਪਰਕ ਲਈ: